Willisau

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Willisau
Wappe vo Willisau
Basisdate
Staat: Schwiiz
Kanton: Lozärn (LU)
Amt: Willisauw
BFS-Nr.: 1151i1f3f4
Poschtleitzahl: 6130
UN/LOCODE: CH WSU
Koordinate: 642072 / 21901947.120837.993053557Koordinate: 47° 7′ 15″ N, 7° 59′ 35″ O; CH1903: 642072 / 219019
Höchi: 557 m ü. M.
Flächi: 41.69 km²
Iiwohner: 7439 (31. Dezämber 2012)[1]
Website: www.willisau.ch
S onder Tor

S onder Tor

Karte
Sempachersee Mauensee (Gewässer) Soppensee Tuetesee Kanton Aargau Kanton Bern Kanton Solothurn Wahlkreis Entlebuch Wahlkreis Hochdorf Wahlkreis Luzern-Land Wahlkreis Luzern-Stadt Wahlkreis Sursee Alberswil Altbüron Altishofen Dagmersellen Ebersecken Ebersecken Egolzwil Ettiswil Fischbach LU Gettnau Grossdietwil Grossdietwil Grossdietwil Hergiswil bei Willisau Luthern Menznau Nebikon Pfaffnau Reiden Roggliswil Schötz Ufhusen Wauwil Wikon Willisau Zell LUKarte von Willisau
Iber des Bild
ww

Willisou (amtlig: Willisau) esch sittem 1. Jänner 2006 e politischi Gmein im glichgnannte Wahlchreis vom Kanton Lozärn y de Schwyyz.

Am 25. Jänner 2004 het s Stemmvouch vo Willisou Stadt ond säubige vo Willisou Land de Fusionierig per 1. Jänner 2006 zue gstomme.

Geografii[ändere | Quälltäxt bearbeite]

Willisou liid im Lozärner Henderland am Rand vo de nördleche Uusläufer vom Willisouer Huusbärg, em Napf. Am Zämefloss vo de Buech- ond de Änziwegere. Oms Historischi Städtli ome send i de letschte 40 Johr laufend nöi Quartier entstande. Sett de Fusionierig isch Willisou met sine 4169 Hektaare und knapp sebetuusigzwöihondert Ywonner sowol vo de Flächi wie au vo de Ywonnerzahl här die gröschti Gmein im Wahlchreis.

D'Gmein esch en Teil vom sogenannte Ennere Willisouer Bärgland, wo im Norde dörs Quärtau Hottu - Gättnou - Auberswiu begränzt werd. S'Gmeindegebiet erstreckt sich zom gröschte Täil öber die nördleche Uusläufer vom Napf und chonnt debii glichzitig mettem obere Weggertau in Berüerig.

D'Landschaft esch houptsächlech dör die unverwächsubare bsondrige Eigeschafte vo de Napfabdachig prägt, met de Egge und Chrache, de usdehnte Höguzög met stotzige ond weniger stäyle Abhäng ond de wasserriche Schmauere und breitere Tauböde.

Rächt gross si d Höeondersched ennerhaub vo de Gmein: Wydemöli 534 m, Guetegg im Mänzbärggebiet 1070 m. Die wächsuvou Landschaft met erem Waudrichtom bietet verschednigi Räiz und könnt es eher ruchs, hüüfig em Wend usgsetzts Klima.

Näbem Städtli und de Aglomeration gets no wiiteri Sedlige i de Gmein; Däiu (a de Houptstross Willisou-Mänznou), Schüüle (ufem haube Wäg zom Mänzbärg uf ca. 800 m.), Rohrmatt, Oschtergou ond Chäppelimatt. Zodäm gets unzähligi Buurehöf öber die ganz Gmein verteilt.


Nochbergmeynde[ändere | Quälltäxt bearbeite]

Willisou gränzt a Auberswiu, Ettiswiu, Gättnou, Grosswange, Hergiswiu, Lutere, Mänznou, Ufhuse ond Zäu.

Bevöukerig[ändere | Quälltäxt bearbeite]

D'Ywonnerzau esch öber langi Ziit chlii blobe, trotz em mettuauterleche Stadträcht. De grossi Teil vo de Bevöukerig het ned i de Stadt sondern osserhaub gläbt. As Foug vo de Abwanderig ond vo de Landflocht hett d Bevöukerig vo 1850 bes 1900 abgno. Markant zuegno het si aber vor allem zwösche 1950 ond 1970 ond ähnlech starch zwösche 1980 bes 2004. Das esch vorauem of d'Bautätigkeite in Willisou säuber zroggzfüere.

Sproche[ändere | Quälltäxt bearbeite]

D'Autagssproch esch Buuredüütsch, en hochallemannischi Mondart.

Gloube ond Konfessione[ändere | Quälltäxt bearbeite]

Früener esch dye ganz Bevöukerig Metgled vo de römisch-katholische Chele gse, hötsotags (Stand 2000) gets 81% römisch-katholischi und 8.9% evangelisch-reformierti Chreschte. Wiiters fendet me 2.8% Musliim ond 7.3% Aghörigi vo andere, ned chrestleche Religione oder haut konfessionslosi. Die meischte Moslem sey aubanischer, kordischer ond törkischer Härkonft; e Menderheit vo Aghörige us andere Religione send fasch usschliesslech Hindus tamilischer Abstammig us Sri Lanka.

Härkonft - Nationalitäte[ändere | Quälltäxt bearbeite]

Vo de 7'135 Ywonner Ändi 2006 sey 6535 Schwyyzer und 600 (= 8.4 %) Ossländer. Die gröschti Ywanderergruppene sey us Serbie-Montenegro (die meiste sey Aubaner, aber es het ou Slawe), Mazedonie (die meischte sey Aubaner), Düütschland, Italie, Portugau, Kroazie, Öschtrich, Törggei und us Sri Lanka (Tamile).

Politik[ändere | Quälltäxt bearbeite]

Metgleder vom Stadroot

  • Robärt Chöng (FDP), Stadtpräsidänt
  • Wändelin Hodu (CVP), Stadtamme
  • Hedy Börgisser (FDP), Sozialvorsteheri
  • Edwin Häller (CVP), Stadroot
  • Brigitt Troxler (SP), Stadträtin

Verchehr[ändere | Quälltäxt bearbeite]

Willisou liid a de Bahnstrecki Lozärn-Langetu. Verantwortlech före Betreb esch d BLS AG. Denäbe bestöi d Buslinie Willisou-Ettiswiu-Sorsi, Willisou-Ettiswiu-Näbike-Autishofe ond Willisou-Hergiswiu-Höbali. Willisou liid a de Houptstross Dagmersöuue-Wouhuse-Lozärn. Sitt 1999 werd de Transitvercher öber d Omfahrig gleitet. Dye nöchste Outobahnaschlöss sey a de A2 in Dagmersöuue 11 km ond z Sorsi 13 km wiit wägg.

Sehenswördigkeyte[ändere | Quälltäxt bearbeite]

Roothuus[ändere | Quälltäxt bearbeite]

S Roothuus esch nochem Stadtbrand vo 1704 aus Chaufhuus met Schaal (Metzg), Chorn- ond Tuechlaube bouet worde, s'Willisouer Ellemass (63 cm) esch bem Igang aabrocht, s'Ärdgschoss esch bes 1956 auus Schlachthuus und sethär auus Börgersaau gnotzt worde, chorz noch 1800 esch usem Chloster St. Orbe es spotbarocks Schueutheater ibouet worde; eis vo öutischte i dere Bouart i de Schwyyz. 1989 - 1991 esches vouständig restoriert worde, wobii me saute Theater im Estrech neu installiert het.

Pfarrchele[ändere | Quälltäxt bearbeite]

D Pfarrchele esch 1805 bes 1810 ufere em Schlossrii vorglagerte Terasse us Chauchtoff bauet worde ond die grössti uf de Lozärner Landschaft. D'Architekte send dye beyde Ennerschwyyzer Chelebouer Josef Purtschert us Pfaffnou ond de Joseph Singer us Lozärn. Archäologischi Grabige hey zeygt, dass mindestens 4 chlyneri Chele a der gliiche Stell gstande sey. D'Gröndig vo de erste Chele esch öuter aus d'Gröndig vo de Stadt. Usem 13. Johrhondert stammt de am bescht erhaltnig romanischi Cheletorm vom Kanton, ou Heidetorm gnannt. De monumentali, zwöigschossigi Gloggetorm vom Adolf Gaudy us Rorschch göut aus en Architektonischi Pionierleistig im Ysebetonbereich und het alässlech vonere ziitbezogene Renovierig 1928/29 de zierlech, zchli wordnig Dachriiter ersetzt. Noch ere omfassende Restorierig vo 1991 bes 1997 wyst de Bau hötzotags weder de ursprönglech Charakter vonere klassizistische Pfylerhalle-Chele uf. Si werd ziert vo Ydröckleche Autarböuder ond Deckefreske vom Willisouer Moler Xaver Hecht ond de Süddütsche J.A. Mesmer ond J.G. Vollmar und elegante Stukkature vom Vorarlbärger Johann Moosbrogger.

Obertor[ändere | Quälltäxt bearbeite]

S'Obertor werd au as s'nedrige Tor bezeichnet, wöus weniger höch esch aus s'Ondertor; ursprönglech esches vermuetlech en gäge s'Städtli hii offene Torm gse, bim drette Stadtbrand vo 1471 esches teilwiis abebrönnt und om 1550 met de Höuf vo de lozärnische Obrigkeit weder ufbouet worde; es zeichnet sech dör en eifachi Befeschtigong mit hochrächteggige Öffnige us; het aber auus Kerker dienet, denäbscht esches nor öber en Leitere begehbar; öberem Portau befende sech stadtiiwärtz zwöi Löie mittem Lozärner ond em Willisouer Wappeschöud, sitt 1886 esches im Bsetz vo de Korporation Willisau.

Ontertor[ändere | Quälltäxt bearbeite]

Onder Tor

Früener eschs Ondertor ou as Zytturm bezeichnet worde. Es esch bem grosse Stadtbrand vo 1471 vernechtet worde ond methöuf vom Lozärner Root 1543 weder ufbouet worde; be de Füürbronscht vo 1704 esches im Gägesatz zum Obertor starch beschädigt worde; gmäss enere y de Tormchopple gfondne Urchond esches 1768 renoviert ond 1805 nöi deckt worde, 1854 esches aber, wöus Boufällig worde esch, weder abgresse worde. 1980 esches denn aber Dank ere Stefftig vom Willisouer Ehrebörger Eugen Meyer nach aute Vorlage mit vergrösseretem Dorchgang nöi bouet worde, me hett d'Tormuhr vo 1544 ond Tormglogge vo 1706 weder ibouet. Gägewärtig esches metteme vöusiitige Gloggeschpeu akustisch berycheret.

Auti Stadtmöli[ändere | Quälltäxt bearbeite]

Teylwys stammt s'Fondamänt vo de aute Stadtmöli us de Stadtgröndigsziit 1302/04, d Weschtfassade grössteils us de mettuauterleche Stadtmuur, 1585 esches auus Houzbou mit stadtsiitiger Ständerkonschtruktion ond legendem Dachstueu bauet worde, het aber scho s'höttige Gebäudevolume erreycht; de vo de Wegere abgeleitety Mölibach esch au för d Bekämpfig vo Hüserbränd ond zor Stadtreinigong ygsetzt worde; 1918 – 1920 send d Möliyrechtige technisch ernöieret worde und me het d'Fassade met de höttige Fenschterschtellig erstöut, bes 1989 esch im Gebäu e Möli betrebe worde, 1998 esches vo de Aubärt-Chöchlin-Steftig kouft ond vouständig renoviert worde, hötzotags eschs Wasserrad sogar met Transmission weder en Betreb ond d Möli werd aus Kouturzentrum mettere feschtbeschtehende Sammlig vo historische Musigenschtrumänt gnotzt.

Ursprungshuus vo de Willisouer Rengli[ändere | Quälltäxt bearbeite]

S Geböi bstod us zwöi Ursprongshüüser, s'lengge esch vom Léon Nordme för d Waarehuuschetti Manor gmietet worde, s rächti esch aber s Ursprongshuus vo de Willisouer Rengli, om 1850 esches zom erschte Mou vom Heinrech Muurer härgstöut worde, s urspröngleche Rezäpt eschem dör sini zwöit Frou, Martha Peyer, Chöchin ufem Schloss Heydegg öbergä worde, 1880 esch do s Huus verpachtet ond spöter a Moritz Amrein-Brügger verchouft worde, 1924 sey die beide Hüüser zome Gschäfts- ond Wohnhuus ombouet worde, 1930 do omnes Café erwiiteret worde schliesslech in Gebr. Amrein & Co d'Rengliproduktion omgnännt worde; drofabe esches zersch döre Wauter Ränggli-Amrein ond später de döre Wauter Ränggli-Schöppech und hötzotags döre Michael Ränggli-Kuurme wiitergfüert worde.

Möligass 2[ändere | Quälltäxt bearbeite]

S'Huus en de Möligass 2 esch vermuetlech söutischte Huus vo Willisou, of Grond vonere Joorrengzählig a de Baukke ond em Muurwärch esches om 1340 ad Stadtmuur bouet worde, nochem Stadtbrand vo 1375 esch en zwöit Bou met eme tormartige, ad Stadtmuur agfüegte Ybou us Muurwärch, vermuetlech auus füürsecherem Ufbewahrigsort; de höttigi Bou esch auus Ständerbou met houzigem Obergschoss vo 1471 - 1472 bouet worde, s'erschti Obergschoss het en spotgotischy Decki; s Huus hed de Stadtbrand vo 1704 unversehrt öberstande, 1991 hett mers denn vouständig restauriert; 1994 esch en Fassade auus Meschig zwösche nöi ond aut de de urspröngleche Farb enstande.

Spittel[ändere | Quälltäxt bearbeite]

S'Spittel esch nochem Brand vo 1704 a de nach em benannte Stetugass bouet worde, es hett aus Pflägestazion för mettulosi Chranki und Auti aber ou aus Wäisehuus ond Herbärg för armi Lüüt dienet; bes 1961 esches aus Autersheim gnotzt worde. Im 19 Johrhondert esches döre Ybezog vom südlech aschliessende Huus vergrösseret worde, d Glederig vo de drügschossige Fassade esch wiitgehend ursprönglech; 1995/96 esches vouständig restoriert worde; im Estrech sey no vier höuzigi Chammere erhaute, zwöi defo aus Arrästzälle.

Bronne[ändere | Quälltäxt bearbeite]

D Houptgass esch dör drüü Bronne, om 1600 entstande, glederet; früener sey si ou vorderi Bronne gannt worde, d Quelle sey ennerhaub vo de Rengmuure am Schlossbärg (hender de Chele). Dye Bronne wysed dye sehr säutnig Form vome Sebenegg uf, scho im 18. Johrhondert hey Bronnesüüle met Statue existiert, 1951 - 1956 sey dye enzwösche boufällig wordene, vom yheimische Steymetz Gottlieb Chreiliger nochem aute Ress ond Mass neu erstellt worde; sit de 60er Johre sey si met Bronzefiguure usgstattet.

Ondere Brunne[ändere | Quälltäxt bearbeite]

Chelepatron Paulus, vom Luzärner Böudhouer Rouf Brem.

Mettlere Brunne[ändere | Quälltäxt bearbeite]

Maria mettem Chendli, vom Luzerner Böudhouer Franco Annoni; dä Bronne esch vor 1950 no achteggig gse.

Obere Brunne[ändere | Quälltäxt bearbeite]

Chelepatron Petrus; vom Zörcher Böudhouer Eugen Häfufenger.

S'Heyligbluet (-Kapelle)[ändere | Quälltäxt bearbeite]

Ursprönglech eschs s'Heyligbluet en houzigi Kapälle gse ond do 1497 ine goschtete gotische Steybou omgwandlet worde, 1674 het me si ine Renassancebau mettere offne toskanische Vorhalle omgwandlet, si wyst drey figureriichi höuzigi Früebarockiautär uf ond ou acht Öugmäud vo 1684 met de Gröndigslegände. 1854 esch en dekoratifi Houzdecki met neuteschtamäntleche Szene, Apostle ond de Näbepatrone vo de Kapälle bouet worde.

D'Heiligbluet-Legände esch die fougendi: Es sey mou drey Speler gse, de ersti het, nochdem är sis ganzi Gäud verlore hed, fluechend sis Schwärt id Loft gstosse om de Lyb Christi zdörboore, drofabe sey föif Bluetstropfe ofe Tisch gheit ond de Gottesläschterer esch vom Tüüfu ghout worde, ou die bede andere hey en schreckleche Tod erlette.

Es esch früecher en starch bsuechte Waufahrtsort gse; es Ablassfäst mit Sühneprozässion fendet am zwöite Sonndig noch Pfingschte statt ond erenneret an d Frevutat vom 7. Juli 1392.

Ehemoligs Schueuhuus Willisou-Land[ändere | Quälltäxt bearbeite]

Bim ehemolige Schueuhuus Willisou-Land handlets sech om en of Repräsentation usgleggte Zwäckbou im Jogendstiu, dör Landabtusch escher im Johr 1907 ufem Gebiet vo de Stadt Willisou bouet worde; de Vorgängerbou esch en markanti Zähnteschüür, ou Schötte gnännt, gse. Bes 1965 esches aus Schueuhuus gnotzt worde ond i de sebzger Johr esch en umfassende, zytgmässe Enne-Uusbou för d Omnotzig aus Verwautigsgeböi vorgno worde, im Stägehuus fendet me sehenswärti Hendergmäud vome us Hergiswiu stammende Konschtmoler Joseph Schwägler (1906-1987).

Landvogteyschloss[ändere | Quälltäxt bearbeite]

Ursprönglech esch a de Stöu vom Landvogteyschloss nome en offnige Torm, Chutzetorm gnannt, gse; är esch för d Abwehr id Stadtmuur bouet worde; 1690 bes 1695 esch de Abou vome Schloss före jewiiligi Landvogt vo Willisou vorgno worde, de Architekt esch onbekannt, d Ossewänd wiised Sgraffitodekoratione, d Ennerüüm richi Stuckature, Grisäiemolereie, Schnetzereie, Täferwärch, konstvolli Wand- und Deckemolereie usem Barock uf; im ersten Obergschoss befendet sech en Böuderzüklus vo de Heiligbluet-Legände vo 1638; 1833 - 1836 esches es Lokau vonere höchere Schueu gsi onderem dütsche Pädagog Friedrich Fröbel, em Begrönder vo de Chindergärte; spöter esches au normaus Schulhaus gnotzt worde; noch de Ronovierig vo 1979 – 1982 esch d Hans-Rölli-Stobe ybouet worde, wo a de z Willisou gebornig Liedermacher, Sänger ond Dechter erenneret, hötzotags esches de Setz vom Amtsgrecht.

Borghügu met de St. Niklousekapäue[ändere | Quälltäxt bearbeite]

D Alag met de habsborgerische Borg "Aut Willisou" ond enere Kapälle stammt vom Ändi vom 12. Johrhonder, esch 1321 de Habsborger verpfändet ond 1386 im Sämpacherchrieg zerstört worde, wobi d Borgkapälle vor de Zerstörig verschont het. Die esch ursprönglech e chlineri ond nedrigeri Kapälle met romaische Rondbogefensterli gse. Die öutischt Glogge vom Kanton Lozärn mettere hebräische Enschreft esch om 1200 gmacht worde. im 14. Johrhondert esch d Kapälle nöi bauet worde, Ändi vom 15. Johrhondert esch si vergrösset worde, wobii die öutischti Molerei öberem Chorboge entstande esch. Usem 16. Johrhondert stammt d Rankemolerei im Chor ond sgrossi Wandböud mettem Martyrium vo de Zäätuusig Ritter of de lengge Siite, 1655 esch en barockisierte Nöibou met de höttige Fensteröffnige, dekorative Wyranke i de Fensterlybige ond em Portau met schötzendem Vorzeyche ond Empore.

Gschecht[ändere | Quälltäxt bearbeite]

893: En alemannischi Hofsedlig Cozeriswilare/Gesserswiu (Gesserswil) em Willisouer Bärgland esch aktechondig.

1101: Erstmaligi Erwähnig vom Ort Willineshôwo.

1302/03: A de Stöu vom höttige Pfarrdorf werd vo de Freyherre vo Haaseborg en befestigts Zentrum.

1330: Willisou bechont s Rächt zor Abhautig vo Johres- ond Wochemärt.

1367: Dör Hürot wärde d Grafe vo Aarbärg Willisouer Stadtherre.

1375: Im Guglerchrieg werd die schlächt bewehrti Stadt vom Härzog Leopoud abebrönnt.

1386: De Härzog Leopoud III. (Habsborg) beföut bem Uuszog us Willisou weder d Vernechtig vo de Stadt (das esch vor de Schlacht be Sämpech gse).

1407: D Nochfahre vo de Haaseborger verchoufe d Stadt ond d Grafschaft ad Stadt Lozärn - dye lokrativi Landvogtei Willisou esch vier Johrhondert lang e Teil vom Stadtstaat Lozärn.

1471: Willisou werd dör en Stadtbrand zerstört.

1704: De Grossteil vo de Stadt brönnt zom vierte Mol ab.

1798: Im Gfoug vo de Staatsomwäuzig verlüred d Stadtbörger eri Vorrächt. D Stüürbezerk Stadt ond Chelegang osserhaub vo de Stadt wärdid zu Munizipalitäte.

1803: D Mediationsregierung erchlärt de Munizipalitäte Stadt und Landschaft zo eigeständige Gmende.

Ab 1990: Willisou-Stadt und Willisou-Land verstärched eri Zämenarbet ond lösed emmer me Ufgabe gmeynsam.

2004: Am 25. Jänner 2004 werd öber d Vereynigong vo de Gmeynde Willisou-Land ond -Stadt abgstomme. Binre sehr höche Waubeteyligong vo (80% Willisau-Stadt, 81% Willisau-Land) werd d Vorlag dütlech agno.

2006: Am 1. Jänner fusioniere die beide Gmeinde zo Willisou.

Bes Endi 2012: Wilisou esch de Houptort vom glichgnannte Amt gse. Uf e 1. Januar 2013 esch s Amt dor e Wahlchreis (oni Houptort) ersetzt worde.

Koutur ond Bruchtom[ändere | Quälltäxt bearbeite]

Met de Stadtgröndig vo 1303 het Willisou s Märträcht öbercho. No höt fendet drom a yedem legschte Donstig im Monet e Märt im Städtli statt. Ofem Roothuusplatz fendet am Samschtig alle de Buuremärt statt.

Willisou esch en Fasnachtshochborg. Yedes Johr am Frytig nochem Drükönigstag werd d Fasnacht eröffnet ond de Zonftmeyschter zied met de Guuggemusige is Städtli y. Am Sonndig vorem Schmotzige Donnstig fendet jewyls d Städtlifasnacht statt. Au paar Johr füehrt d Karnöffuzonft es enternationaus Narreträffe döre. Emmer am Gödismändig stod de traditionelli Spröchliobe ofem Programm.

Willisou esch traditionell katholisch prägt. Im Mai/Juni fende am Frohlichnam (eme höche katholische Fyiertig) ond am Sondig druf, am Willisouer Heilig-Bluet-Fäscht, grossi Prozässione dör s'Städtli ond dör die Omlegende Gebiet statt. Met debi sey alle d Herrgotsgrenadier ond d Corpis Chresti Brüederschaft met de Kanonier, wo ofem Schlossfäud Böllerschöss ablöy. Demet werd alle d Dorchfüerig vo de Prozässione ond die Litorgische Höhepönkt aköndigt.

Emmer Ändi Ougste / Afangs Septämber werd z Willisou sed de 70er s Enternationale Jazz Festival Willisau döregfüert.

Jewius am drette Oktoberwochenänd (Samschtig - Mändig) fendet im Städtli ond ofem Zähnteplatz dye gross Willisouer Chöubi (Kirchweih, vgl. Jahrmarkt) statt.

Sitt nünzäsächsenünzg fendet afangs Dezämber im Städtli de Chreschchendlimärt statt.

Schuele, Sportalage[ändere | Quälltäxt bearbeite]

Ofem Schlossfäud oberhaub vom Städtli befendet sech en grossartigi Schueu- ond Sportalag. Näb de Vouchsschueu (1. - 9. Klass), ufteilt uf d Schueualaage Schloss und Schlossfäud esch au d Kantonsschueu und Gwärbeschueu ofem gliiche Areau. D Sportalag bietet föif Raseplätz, en 400 m Rondbahn, drey Hartplätz, nün Tornhalle, devo zwöi drüfach Tornhalle ond es Hallebad. Drnäbst gets nos Freyziitzentrum Willisou met Tennishalle ond Tennisplatz. Es ghört aber ou no en Minigoufalag, es Fitnesscenter, en Squashhalle ond e Sauna met Dampf ond Sprodubad ond natürli es Restaurant dezue. Dye beyde Chendergärte befende sech im Pfarreyheim ond a de Mänzbärgschtrooss. D Heylpädogogisch Sonderschueu esch im Momänt zwöiteylt, s Houptgeböi stod am Schötzerain. Denäbscht gets au Schueuzemmer i de Pavions ufem Schlossfäud. Osserhaub vom städtische Gebiet werd no i de Chäppelimatt Chenzgi bes sächsti Klass (jewyls in dopu Klasse) sowie i de Schüüle, äbefaus Chendergarte bes sächsti Klass (jewyls in drüer Klasse) onderrechtet.

Bekannti Willisouer[ändere | Quälltäxt bearbeite]

Fuessnote[ändere | Quälltäxt bearbeite]

  1. Statistik Schweiz – STAT-TAB: Ständige und Nichtständige Wohnbevölkerung nach Region, Geschlecht, Nationalität und Alter (Ständige Wohnbevölkerung)

Websiite[ändere | Quälltäxt bearbeite]

 Allmänd (Commons): Willisau – Sammlig vo witere Multimediadateie