Jean Bonvin

De Jean Bonvin

De Jean Bonvin (* 6. März 1934 z Chermignon im Kanton Wallis; † 17. März 2017 z Paris) isch en Ökonomieprofässer und Diplomat us der Schwiiz gsi.

Läbe

De Jean Bonvin isch z Chermignon, emene Dorf am Bärg im Wallis oberhalb vo Siders, uf d Wält cho. Dä Oort ghört hüt zu der Gmeind Crans-Montana. De Bonvin het a der Wirtschaftshochschuel z Sanggalle und am Collège de France z Paris studiert. Vom Johr 1964 a isch er Forscher und Dozänt a der Uni Paris gsi und gly drufabe Mitarbeiter vom Internazionale Bildigsinschtitut vo der Unesco.

1970 bis 1979 isch är Konsul vo Burundi gsi. I däm Land het er d Wirtschaftsfakultät vo der Uni neu ufbout und di wüsseschaftlech Fäldforschig im Land wyter gfüert. Do derby het er psunders d Sprichwörter vo de Lüt uf em Land dokumäntiert. Mit der neue Schuel Gitega het er möglech gmacht, dass au Mäitli der Wäg a d Uni gfunde hend. Zäme mi de Karmeliterinne vo Pole het er de Froue inere Region vo Burundi e besseri medizinischi Hilf und neui Fäldkulture procht.

1980 het d Organisazion für wirtschaftligi Zämenarbet und Entwiklig OECD de Jean Bonvin als Diräkter vo der Forschig agstellt, und vo 1993 bis 1999 isch er Presidänt vom Entwikligszäntrum vo der OECd gsi. Dört het är Kontakt zu de Regierige vo vilne Entwikligsländer und vo 1981 a psunders au mit China gha.

Derzue isch de Bonvin Profässer für internazionali Wirtschaft a der Katholische Uni vo Lille, a der Uni Paris-Descartes und am Institut de hautes études en administration publique z Losann gsi.

Als höche Diplomat vo der OECD het är grossi internazionali Konferänze organisiert und gleitet:

• Di Internazionali Wirtschaftskonferänz, Peking, 1995
• Konferänz Management de l’environnement dans le sud-est asiatique, z Hanoi, Vietnam, 1993
• Konferänz India’s Policy Reforms for structural adjustments and competitiveness, Neu-Deeli, Indie, 1995
• Konferänz Growth and Competition in the New Global Economy, Seoul, Südkorea, 1996
• Konferänz Économie mondiale en l’an 2020. Quelles perspectives pour la Chine ?, Peking, 1998
• Di erschti Konferänz z Waschington über d Rolle vo der Privatwirtschaft im Kampf gäge d Korruption, 1999
• Konferänz über d Entwiklig vo der Wirtschaft vo Chile, Paris, 1999

Kultur

Im Wallis het de Jean Bonvin Programm und Organisazione für d Pfläg vo der klassische Musigg gleitet, vo 2000 bis 2010 als Presidänt s Internazionale Giigefeschtival z Sitte, und sid 2011 au als Presidänt de Veräin Crans-Montana Classics, wo d Gmeinde Chermignon, Leis, Icogne, Montana, Randogne und Mollens zäme Meischterklasse für begabti Schüeler und Konzärt organisiere.

Anderi Ämter

De Bonvin het z Europa und z Asie no anderi Uufgabe übercho:

• Beroter vom Chineesische Verein für di fridlechi Nutzig vo der Milidäärtechnik
• Forschigsberoter vo der Schtiftig für Forschige über di internazionali Entwiklig, z Tokio, Japan
• Presidänt vom japanische Rot vom Empress Shôken Fund z Gämf
• Mitgliid vom Internazionale Komitee vom Roote Chrüz, z Gämf
• Verwaltisgrot vom Inschtitut Kurt Bösch z Sitte im Wallis
• Verwaltigsrot vo der Hochschuel Wallis
• Presidänt vo der Schwiizer Schuel für Oschteopathie z Losann

Wärch

• Analyse du système d’enseignement suédois. UNESCO, Paris 1969
• Le système d’enseignement japonais. UNESCO, Paris 1969
• L’éducation facteur de croissance et de développement économique. Bärn 1971
• Techniques d’approche anthropologique au moyen de proverbes en Afrique centrale. Friburg 1979
• The Challenge of the least developed countries: present dilemmas, future strategies. OECD, Paris 1981
• Least developed countries: human ressources, wealth of the poorest. 1982
• Les stratégies de développement des pays les moins avancés pour les années 80. 1984
• La Suisse, une nation solidaire. In: Revue Crans-Montana, 1984
• Changements sociaux et productivité agricole en Afrique centrale. OECD, Paris 1986
• Social security in developing countries: a more active role in the economic development process. Taipei 1987
• Europa 1992. una fortezza inespugnabile ? 1989
• Les nouveaux pays industriels: défi et opportunités pour les industries de l’OCDE. Sao Paulo 1989
• Pour un Ordre du Jour africain. 1990
• L’Organisation de Coopération et de Développement Économiques (OCDE). Paris 1998
• Lutte contre la corruption dans les pays en développement et les économies émergentes: le rôle du secteur privé. OECD 2000

Weblink

• Crans-Montana Classics
• Pressemittäilig vom Präsidium vo Burundi, 9 Märze 2013