Vorlage:AdW/53
Der junge Lord|Der junge Lord
Der junge Lord ischt a durchkomboniirda Komischa Opr en zwoi Uffziig vom deitscha Kombonischda Hans Werner Henze (1926–2012). S Libreddo stammt vo dr eschtreichischa Schriftstellere Ingeborg Bachmann (1926–1973) ond beruaht uff-em Märle Der Affe als Mensch vom schwäbischa Dichter Wilhelm Hauff (1802–1827). Zom erschda Mol uff a Bihne komma isch des Werk am 7. April 1965 an dr Deitscha Opr Berlin. A Uffihrong dauret rond zwoi-dreivirdel Stond.
Firs Orkeschtr braucht-mr zwoi Fleeda, zwoi Obooa, zwoi Klarinedda, zwoi Fagodd, viir Herner, zwoi Trombeeda, zwoi Posauna, a Tuba, a grauß Schlagwerk, a Harf, a Tscheleschda, a Klaviir, a Gidarr, a Mandoline ond a Streichergrubbe. Fir d Bihnamusik braucht mr Leit fir a Garnisons-Kabell mit zwoi Piccolofleeda, zwoi Obooa, zwoi Klarinedda, zwoi Trombeeda, zwoi Posauna, a Tuba ond a kloina Schlagwerk-Grubbe.
Dui Opr spiilt em fikdiva deitscha Residenz-Städtle Hülsdorf-Gotha em Johr 1830.
D Uruffihrong am 7. April 1965 ischt vom Reschiseer Rudolf Sellner inszeniirt worra. Am Pult gstanda isch dr Christoph von Dohnányi. En de Hauptrolla hot mir da Otto Graf, da Barry McDaniel, da Loren Driscoll, d Patricia Johnson, d Edith Mathis ond da Donald Grobe seha ond heera kenna.