Underdanegebiet

As Underdanegebiet oder Underdaneland het mä in dr Alten Eidgenosseschaft die Gebiet bezeichnet, wo kei politischi Sälbstständigkeit gha hai.

Es het im wäsentlige drei Arte vo Underdanegebiet gee:

D Biet vo de Stadtort. D Macht in de Stadtort isch vo de Bürger vo dr Hauptstadt usgange, beziehigswiis von ere chliine Oberschicht, de Patrizier. Dr Räst vo dene Ort isch faktisch Underdaneland gsi. Allerdings het s au do föderalistischi Strukture gee, wo uf altüberliiferete Freiheitsrächt berueht hai. Innerhalb vom Kanton Bärn het zum Bispil d Stadt Länzbrg oder d Landschaft Haslidaal e Deil vo de lokale Behörde sälber chönne wehle. Im Kanton Züri hai die sogenannte Munizipalstedt Winterthur und Stei am Rhii ihrersiits Underdanegebiet gha.
D Underdanegebiet vo de Landort. Do isch d Macht vo de Landsgmeinde usgange, aber im Herrschaftsberiich vo dene Ort het s Bezirk gee, wo d Iiwohner kei Mitsproochrächt gha hai. Die Gebiet si gsi:
- Im Kanton Zug d Gmeinde Cham, Hünebärg, Risch (denn Gangolfswil), Steihuuse und Walchwil.
- Im Kanton Schwyz d Bezirk March, Hööf, Eisiidle und Chüsnacht.
- Im Kanton Glarus d Grofschaft Wärdebärg (hüte im Kanton Sanggalle).
- Im Kanton Uri s Urseredaal und s Livinedaal (Leventina, hüt im Kanton Tessin).
Die Gmeine Herrschafte. Die si mehreren Ort gmeinsam understellt gsi.

Dr Underdanestatus isch vo dr Helvetische Republik in dr ganze Schwiiz abgschafft worde. D Asträngige vo de reaktionäre Kantön währed dr Restauration en wider iizfüehre, si am Widerstand vo de früehnere Underdanegebiet und de europäische Grossmächt gschiiteret.

Lueg au

Dä Artikel basiert uff ere fräie Übersetzig vu dere Version vum Artikel „Untertanengebiet“ vu de dütsche Wikipedia. E Liste vu de Autore un Versione isch do z finde.