Peter und Paul

Us der alemannische Wikipedia, der freie Dialäkt-Enzyklopedy
D Apostel Petrus und Paulus mit em Christusmonogramm Chi-Rho, es Fresko i de Katakombe z Rom, 4. Jh.

Peter und Paul (Hl. Petrus und hl. Paulus) isch de Name vom Fest vo de Apostel Petrus und Paulus. S Fest wird i villne christliche Konfessione am 29. Juni gfiiret. I de römisch-katholische Chile häts de Rang vom ene Hochfest.

S Fest goot nöd uf de Todestag vo de Hailige zrugg – es hät mit de Öberliferig ztue, as zur Zit vo de Christeverfolgig under em römische Kaiser Valerian (253–260) a dem Tag d Reliquie vo de beede Heilige i d Sebastians-Katakombe a de Via Appia z Rom öbertrait worde seged.[1] Di ältischt Fiir vo dem Gedächnis isch us em Johr 354 belait.[2]

Petrus und Paulus uf ere russische Ikone us em 13. Johrhundert

Wil die baide Hailige e bsunderi Bedütig i de Chilegschicht händ, wärded si mängmol au ehrevoll as „Apostelfürst“ (latiinprinceps apostulorum, vo princeps; de Erst, Füerer, Fürst) bezaichnet.

Es git es paar Chirche, wo s Patrozinium Peter und Paul händ; z. B. z Bärn, z Züri, z Hirsau usw. Z Sanggalle isch de Name vom Wildpark Peter und Paul.

I de noo katholische Diözese isch a däm Fest d Spändig vom Weihesakrament, aso d Weih zum Diakon, Priester oder Bischof. Im Kanton Tessin, in es paar italienischsprochige Gmainde vom Bündnerland und in es paar Gmainde vom Kanton Lozärn isch Peter und Paul en gsetzliche Fiirtig.[3]

Weblink[ändere | Quälltäxt bearbeite]

 Commons: Peter und Paul – Sammlig vo Multimediadateie

Fuessnote[ändere | Quälltäxt bearbeite]

  1. Frank Kolb, Rom, die Geschichte der Stadt in der Antike, C. H. Beck, München 1995, ISBN 3-406-39666-6, S. 641 Online Uusgoob
  2. Schott Messbuch, Herder-Verlag (Onlineversion)
  3. Fiirtig im Kanton Tessin uf feiertage-schweiz.ch