Simon Petrus

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Dr Petrus mit de Himmelsschlüssel, gmalt vom Peter Paul Rubens.

Dr Simon Petrus (Geburtsdatum unbekannt; † öppe 64 z Rom) isch en wichtige, wenn nit dr wichtigscht Jünger vom Jesus vo Nazaret gsii. Er ghört zu de Aposchtel.

Dr Simon, wie men em gseit het, isch Fischer am See Genezareth z Judäa gsii und het i dr Ortschaft Kafarnaum gwohnt, bevor er sich em Jesus und sine Jünger agschlosse het. Dr Jesus het ihn nach siire Beruefig Kephas gnennt, was wie Petrus au Fels heisst.

Sehr wichtig isch dr Petrus für die römisch-katholischi Kirche: Gemäss Matthäus 16,18 het ihm dr Jesus gseit: "Du bist Petrus [also ebe dr Fels], und auf diesem Felsen will ich meine Gemeinde bauen. […] Ich will dir des Himmelreiches Schlüssel geben. […]" Negativ in Erschiinig träte isch dr Petrus nur eis Mol, churz vor dr Chrüzigung vom Jesus. Wie dä ihm prophezeit het, het er ihn verlügnet, indem er, um sich sälber z rette, de Gegner gseit het, er heigi mit Jesus nüt z tue ghaa. Er hets denn aber schnell bereut, wie me im Markusevangelium cha läse. (Markus 14, 66 bis 72). Dr Petrus gilt als Augezüüge vo dr Uuferschtehig vo Jesus, und es heisst, dr Evangelischt Markus seig siin Schüeler gsii, wo s Petrus-Wort relativ wortgetreu niedergschriibe heig.

Gschtorbe isch dr Petrus gmäss nit ganz sichere Informatione ane 64 noch Chrischtus als Märtyrer bi de Chrischteverfolgige under em Kaiser Nero z Rom, won er die erschti Chrischtegmeind gründet gha het.

Wil dr Petrus ebe vermuetli z Rom am Hoger Mons Vaticanus dr Märtyrertod gschtorben isch, het dr Bischof vo Rom scho im 3. Johrhundert dr Vorrang in dr ganze chrischtleche Kirche für sich verlangt, und im 5. Johrhundert het er vom ene Konzil denn au dr Papscht-Titel zuegsprochen überchoo.

Z Rom stoot dr Petersdom sid em 16. Jorhhundert a dere Stell, wo me sit dr Spotantike s Grab vom Petrus pflegt.

Chile mit em Patrozinium vom Heilige Petrus het’s au z Dillinga, z Bärn, z Stroossburg und z Löörech. Dr Rägenschburger Dom isch e wichtigi Chile, wo em Petrus gweit isch. Z Basel stoot d Peterschile und z Züri dr Sankt Peeter.

Literatur[ändere | Quälltäxt bearbeite]

  • Düütschi Bibelstiftig Stuttgart: Die Bibel nach der Übersetzung Martin Luthers
  • Rene Pfeilschifter: Die Spätantike - Der eine Gott und die vielen Herrscher

Weblingg[ändere | Quälltäxt bearbeite]

 Commons: Simon Petrus – Sammlig vo Multimediadateie

Wikisource S dütschsprochig Wikiquote hät Zitat zum Thema „Simon Petrus