Sankt Peter und Paul
Sankt Peter und Paul isch di chrischtkatholeschi Chilche vo dr Stadt Bärn.
S Gebäu isch vo 1858 bis 1864 als di erschti katholeschi Chilche i dr Stadt Bärn bout worde. Si stoot grad näb em Bärner Roothuus a dr Roothuusgass 2.
D Bouplään sind vom französische Architekt Pierre Joseph Edouard Deperthes, wo au s Roothuus vo Paris entworfe het, mit Hilf vo anderne Architekte gmacht worde. Si sind em Stiil vom Hischtorismus ghalte. Dr erscht Gottesdienscht isch i dere Chilche am 13. Novämber 1864 gfyret worde. Am Ändi vom 19. Joorhundert het me de Inneruum nöi gstaltet, deils scho mid Elemänt vom Jugendstiil.
Ane 1875 het di katholeschi Pfarrei vo Bärn wäret em Kulturkampf meerheitlech zu der nöje chrischtkatholische Bewegig gwächselt. D Chilche mit em Patrozinium Peter und Paul isch sider nid nur d Bärner Pfarrchilche, sondern au d Kathedraale vom chrischtkatholische Bischof vo der Schwiiz.
Literatur[ändere | Quälltäxt bearbeite]
- Jan Straub: Die christkatholische Kirche St. Peter und Paul in Bern. (Schweizerische Kunstführer, Nr. 904, Serie 91). Hrsg. Gesellschaft für Schweizerische Kunstgeschichte GSK. Bern 2012, ISBN 978-3-03797-045-4.
Weblink[ändere | Quälltäxt bearbeite]
Commons: Kirche Sankt Peter und Paul (Bern) – Sammlig vo Multimediadateie