Isis

Us der alemannische Wikipedia, der freie Dialäkt-Enzyklopedy
Dä Artikel behandlet e ägyptischi Göttin. Wyteri Bedütige findt me under Isis (Begriffsklärig).
D Isis, mit em Dron as Chopfbedeckig

D Isis, au Aset, Ese usw, isch eini vo de wichdigschde Göttinne im alten Ägypte gsi. Au usserhalb vo Ägypte het si im römische Kaiserriich vili Ahänger gha und d Schdatue vo dr Isis lactans, dr süügende Isis, wo ihrem Sohn Horus d Bruscht git, het dr chrischdlig Mariekult beiiflusst.[1] Dr Isistämpel, wo as letschte im sächste Johrhundert noch dr Ziitwändi gschlosse worden isch vo de chrischtlige Behörde, isch dä z Philae ganz im Süde vom Land gsi (südlich vo Assuan, Oberägypte).[2]

Name[ändere | Quälltäxt bearbeite]

Isis isch dr Name wo d Grieche dr Göttin ge hai. In dr hieroglyphische Schrift isch er
stt
,
B1
odr
Astt
,
B1
[3] gschriibe worde (As.t in dr MdC Umschriibig), wo öbbe „Die vom Dron“ bedütet.

D Familie[ändere | Quälltäxt bearbeite]

D Isis isch eini vo de Döchter vom Ärdgott Geb und dr Himmelsgöttin Nut. Mit ihrem Brueder Osiris het si es Chind, dr Horus, gha. Si het non ä Brueder, dr Seth und ä Schwöschder gha, d Nephthys. Dr Seth isch iifersüchtig uf dr Osiris gsi und het en umbrocht. D Isis het ihre Ma gsuecht, in schböötere Mythe het en dr Seth in Schdück verschnitte, het en mumifiziert und isch schwanger worde von em.[4] Denn het si en begrabe und zsämme mit dr Nephthys am Grab wachgschdande und ihn betruurt.

Die beide Schwöschdere wärde hüfig zsämme zeigt. As Truurendi si si as zwei Raubvögel abbildet worde. Uf dä Särg het s Bilder von enä in Menschegschdalt mit Flügel, wie si dr Dot mit de Flügel beschütze. Und im Amduat wärde si zsämme zeigt as zwei Schlange, wo vorne im Sunneschiff vom Re schdöhn.[5]

Isis lactans, mit dr Chopfbedeckig vo dr Hathor

Verwandti Gottheite[ändere | Quälltäxt bearbeite]

Im Neue Riich isch d Isis mit dr Hathor identifiziert worde und mit dr Hathor ihre Chuehörner mit dr Sunneschiibe derzwüsche abbildet worde. Sie isch au eini vo de Göttinne gsi, wo as Aug vom Re zellt hai.

D Schutzgöttin[ändere | Quälltäxt bearbeite]

D Isis het dr Horus elei und im Verschdeckte müesse ufzieh und ihn vor de vili Gfohre, wie Schlange und Skorpion, wo s im Nildelta ge het, müesse beschütze. Meh as jedi anderi ägyptischi Göttin isch si dorum mit dr Mueterrolle identifiziert worde, und isch, vor allem im römische Usland, hüfig zsämme mit em Horus as Mueter und Chind abbildet worde.

S Isisbluet[ändere | Quälltäxt bearbeite]

Em Tet-Zeiche, dr Hieroglyphe
V39
, wo dr Gürtelschleife vo de Götter ähnlig isch, hai d Ägypter au „Bluet vo dr Isis“ gsait. Mä kennt si urschbrüngligi Bedütig nit. Es isch as Amulett de Dote mit ins Grab gä worde. Uf de Dekoratione in de Tämpel, uf Bett und uf Sarkophäg wird s Tet-zeiche hüfig zsämme mit em Dsched
R11
  (MdC Umschriibig Dd), emä Symbol vom Osiris wo für „Unändlikeit“ schdoht, abbildet.[6]

Isis-Tämpel i de Schwiz[ändere | Quälltäxt bearbeite]

Uf em Gebiet vo de hütige Schwiz häts au en Isis-Tämpel gee. Er isch z Aquae Helveticae (hüt Bade) oder z Wettige gstande, was de Fund vo de Isis-Inschrift i säbere Region belait.

Fuessnote[ändere | Quälltäxt bearbeite]

  1. Erik Hornung, The Secret Lore of Egypt: Its Impact on the West, Cornell University Press 2001, S.75
  2. George Hart, The Routledge Dictionary Of Egyptian Gods And Goddesses, Routledge 2005, ISBN 0415344956, S.9
  3. Erman, Adolf & Grapow, Hermann, 1926–1953. Wörterbuch der aegyptischen Sprache im Auftrage der deutschen Akademien. 6 vols. Leipzig: J. C. Hinrichs'schen Buchhandlungen. (Neue Auflage Berlin: Akademie-Verlag GmbH, 1971) 1, 20; 4, 8.11-13
  4. David P. Silverman, Searching for Ancient Egypt, Cornell University Press 1997, S.71
  5. Manfred Lurker, Lexikon der Götter und Symbole der alten Ägypter, Scherz 1998, S.107f.
  6. Manfred Lurker, Lexikon der Götter und Symbole der alten Ägypter, Scherz 1998, S.109