Aquae Helveticae

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

Aquae Helveticae (lat. "Helvetischi Bäder") isch e römischi Sidlig an ere Flussschlaufe vo de Limmat gsi, wo hüt s Bäderquartiir vo de Schtadt Bade ligt. D Thermalquelle derte sind vo de Römer für es Thermalbad bruucht worde.

Gschicht[ändere | Quälltäxt bearbeite]

Im Johr 15 v. Chr. hei d Römer s Mittelland bsetzt und zur Sicherig vom eroberte Biet chlineri und grösseri Militärschtützpunkt aagleit. Eis vo de gröschte isch s Römerlager vo Vindonissa gsi, uf em Gebiet vo de hütige Gmeind Windisch. Ab em Johr 14 n. Chr. hei d Römer dann aagfange d Thermalquelle z nutze, wo numme öppe füf Kilometer von Vindonissa entfärnt si gsi. Um di Thermalbäder umme isch e Sidlig entschtande, wo Kauflüt und Handwerker sich aagsidlet hei. D Sidlig isch vermuetlich ufgäh worde, wo d Römer e chli vor oder im Johr 406 Vindonissa verloh hei.

Sidlig[ändere | Quälltäxt bearbeite]

Inschrift vom Isistempel, wo hüt in de St. Sebaschtian-Chile z Wettige iigmuuret isch

Bisherigi Grabige hei zeigt, dass d Sidlig am Aafang us Holz bauet gsi isch und schpöter di Holzbaute durch Steihüüser ersetzt worde sind. Bei Usgrabige hät me nöd numme am linke Limmatufer Gebäude gfunde, sondern au uf de Ännetbadner Siite. Nochgwisse isch au d Exischtenz vo eme Isis-Tempel, vo dem mer aber nöd weiss, wo-n-er genau gsi isch. Es git vermuetige, dass er usserhalb vo de Sidling, uf em Gebiet vom hütige Wettige gsi isch. Z Aquae Helveticae hei sowohl Römer wi au Helvetier gläbt und d Sidlig isch an de Schtroos vo Augusta Raurica (Augscht) und Vindonissa gläge, wo uf Vitudurum (Oberwinti) und Brigantium (Breagaz) gfüürt hät. Vo Aquae Helveticae us het au e Schtroos uf Turicum (Züri) abzweigt.

Literatur[ändere | Quälltäxt bearbeite]

  • Martin Hartmann, Hans Weber: Die Römer im Aargau. Verlag Sauerländer, Aarau 1985, ISBN 3-7941-2539-8, S. 161–164.
  • Otto Mittler: Geschichte der Stadt Baden – Band I: Von der frühesten Zeit bis um 1650. Verlag Sauerländer, Aarau 1962, S. 17–36.