Jahr des Affen

Us der alemannische Wikipedia, der freie Dialäkt-Enzyklopedy

Dr "Aff" als Tierchreiszeiche im Kowloon Walled City Park z Kowloon City, Hong Kong

Aff (猴 hóu) isch eis vode zwöuf Tier im chinesische Kaländer. Affejohr (申 shēn) si gsi:

• 2. Februar 1908 bis 21. Jänner 1909 - Erde
• 20. Februar 1920 bis 7. Februar 1921 - Metall
• 6. Februar 1932 bis 25. Jänner 1933 - Wasser
• 25. Jänner 1944 bis 12. Februar 1945 - Holz
• 12. Februar 1956 bis 30. Jänner 1957 - Füür
• 30. Jänner 1968 bis 16. Februar 1969 - Erde
• 16. Februar 1980 bis 4. Februar 1981 - Metall
• 4. Februar 1992 bis 22. Jänner 1993 - Wasser
• 22. Jänner 2004 bis 8. Februar 2005 - Holz
• 8. Februar 2016 bis 27. Jänner 2017 - Füür

[ändere] Ds Charakterbiud

Verstang für zwöi, aber immer drmit beschäftigt, d Positione ds wächsle oder ds verändere, wöu sie aus gli wider längwilet. Ruehlos, wändig, aber ou oberflächlech. Sie si ufdräiti, funkesprüehende, bewunderigswürdigi >unmügleche< Persone, wone ganzi Gseuschaft im Schwung hautet, säubst wen d Party scho lang fertig isch.
Ihri schlimmsti Eigeschaft si ihri Unzuelänglechkeit, ihres ungstüme Ufträte, Ihre Mangu für Usdur und mängisch ou ihri Schwindeleie und Betrügereie. Ihri guete Eigeschafte setzte sich us ihrer fabuhafte Überredigskünste, ihri unbesigbari gueti Lune, ihrem wändige Geist und ihrne Fähigkeite zämme, sich vo keim persönleche Missgschick abemache ds loh, sondern sofort ds nöchste Thema i Agriff ds näh.
Im Grund gnoh wei d Affe-Lüt nid erwachse wärde. J.M. Barrie, wo "Peter Pan" gschribe het, isch säuber ä Aff gsi und öppis vo däm Märlibueb steckt i jedem Aff. Sie versueche, die letschti und entscheidendi Verantwortig vo sich furtdsschiebe, sie wehre sich, ä Vater-Figur ds wärde oder ä ächti Muetter-Roue ds übernäh. Sie chöi die Rouene zwar spile, so wieme ä Roue imene Theaterstück übernimmt, aber sie si nid imstang, sie tatsächlech ds verkörpere.
Grunsätzlech finge sie längwilig, Stritgspräch liebe sie. Pflicht, Ghorsam, moraleschi Überzügig - das het i ihrne Wärtvorsteuige weni Platz, drfür spile die persönlechi Befridigung, d Neugiir und aui dehnbare und nid so genau definierte ethische Asichte ä wesentlich grösseri Roue.
Steuet euch ä Aff vor, wo im Boum vor Erkenntnis, Im Boum vo Guet und Bös umeturnet, do hei sie ds beste Symbou für ihre ruelose und forschende Geist.

[ändere] Ds Affe-Ching

Dr chli Aff isch ufgweckt, wändig und sehr läbhaft, wird aber ängslech und unsicher, wen är nid dr Schutz vonere zueverlässige und unwandubare Umgäbig um sich gspürt. Nie sehr tapfer, es sig den, är cha sic uf sini Kamerade fäusefescht verloh. Besitzt ä untrügleche Instinkt für aues was ir Färni und im Cho isch. Ir Schueu glänzt är i aune Fächer oder isch so fu, dass är überau verseit. Meistens schnidet är aber guet bi aune Prüefige ab, säubst wen är sich sini schuelische Arbeite kes einzigsmau dürelist.

[ändere] Dr extrovertiert Aff

Affe si entweder extrovertiert oder introvertiert, oder sie verfüege vo beidem öppis, wobi ds einte Extreme stercher usprägt si wird. Extrovertierti Affe - und das si die meiste vo ihne - gniesse Gseuschaft und Gsäuigkeit und chömme glänzend mit Mönsche auer Klasse, Temprämänt und Type dsrächt. Affe beurteile d Dinge nach ihrem üssere Aschin und chümmere sich nid drum, was unger dr Oberflächi verborge lige chönnt.

[ändere] Dr introvertiert Aff

Sie si schlau, rücksichtsvou und witzig - sich säubst gägeüber. Mängi Sache schribe sie lieber uf, aus dass sie ämene angere mündlech gstoh. Sie würke chli nachdänklecher und töifer aus die angere Affe, hei öppis vomene Wüsseschaftler oder vomene Philosoph a sich.

[ändere] Was Affe gärn mache

Typische Affe-Sportarte si Chorbbau, Tschtennis, und aui angere Spiu, bi denes uf Gschwindigkeit und gschickti Häng druf achunnt.
Bide Affe-Hobbys spiut d Fingerfertigkeit ou ä grossi Roue: Klavierspiu, d Konstruktion vo Mobiles, Puppespiu, Tonarbeite. Affe haute nid auzuviu vom Läbe ir freie Natur, sie zieh d Stadt am Land vor, d Bank ufem Boulevard ar Wisebank zwüsche blüehedem Thymian.
D Eigeschafte, mit dene d Mönsche usde Affe-Johr im Bruef Erfoug hei: Ihri bewundernswärti Überzügigschraft, d Füeui vo ihrne Ideeä, die grossi Apassigsfähigkeit, wes drum geit, neui Ideeä ds verwürkleche. Affe schaffe am beste aus Journaliste, Verchöifer, Politiker, im Wärbegschäft.

[ändere] Was zude Affe passt

Länder, wo mitde Johre vom Aff i Verbingig stöh söue, si d USA und Vietnam, Portugal und Ungarn, dr Sudan und Ägypte - dr Ufstang ds Ungarn und d Suez-Invasion hei beidi 1956, äs Affejohr, stattgfunge -, Kamboscha und Marrokko.
D Edusteine und Haubedusteine, wo mit Affejohre zämmehänge söue: Bärgchristau, Aquamarin, Achat, Marmor, Topas, Beryll, Chrysolit.
Erfingige, Entdeckige und neui Entwicklige us Affejohr ergäh ds gliche Biud, sie hei aui mit Kommunikation, Gschwindigkeit und neui Arte vom Dänke ds tüe: Ds Radio, ds Fernseh-Telefon, d Radio-Astronomie, die vierdimensionali Geometrie, ds Ungerwassergwehr.

[ändere] Bekannti Affe

• Gaius Julius Cäsar (*100-†44v.Chr.) Römischä Schtaatsma und Fäudherr
• Leonardo da Vinci (*1452-†1519) italiänische Universauglehrte und Künschtler (ou ä Ketzer i sire Zit, da är Sache übere mönschlich Körper gwüsst het, wome garnid het chönne/dörfe wüsse.)
• Charles Dickens (*1812-†1870) änglische Schriftsteuer (David Copperfield, Oliver Twist)
• Oswald Mosley (*1896-†1980) eig. Sir Oswald Ernald Mosley, 6. Baronet, britische Politiker und Gründer vor faschistsche Partei British Union of Fascists (BUF)
• Ian Fleming (*1908-†1964) gebr. Ian Lancaster Fleming, britische Schriftsteuer (James Bond-Erfinger)
• Nelson A. Rockefeller (*1908-†1979) gebr. Nelson Aldrich Rockefeller, US-amerikanische Politiker und 41. Vizepresidänt vor USA.
• Johannes Paul II. (*1920-†2005) polnischä Kardinau und Papscht
• Reinhold Messner (*1944) Südtiroler Bärgschtiger (aui 14 Achttusiger) und Schriftschteuer
• Mick Jagger (*1943) britische Rocksänger (The Rolling Stones)
• George Lucas (*1944) US-amerikanische Regisseur (Star Wars)
• Jennifer Aniston (*1969) gebr. Jennifer Joanna Anastassakis, US-amerikanischi Schouspilerin (Das total verrückte Ferienlager, … und dann kam Polly, Er steht einfach nicht auf Dich)

[ändere] Zämmeläbe mit angerne

So chömme d Affe im guete und im böse mitde angerne Tier ds rächt:

• mit angerne Affe: So guet wie zwöi ufgweckti Schueuching - vou Begeisterig, Unsinn, Quatsch und Redensarte, Neid, Wettkampf und innigr Liebi.
• Mit Rattene: Sehr guet, solang meh die Verbingig ganz natürlich wachse und rife loht, ohni öpperen ds ermuntere und adsstosse.
• Mit Büffle: Sie finge sie ordentlich, aber längwilig, d Büffle finge sie aregend, aber unzueverlässlich. Wen jede d Schwächi und Gränze vom angere klar erkennt, cha das ä gueti Mischig wärde.
• Mit Tigere: Aus ziemlich aggressivi Verbingig bekannt, bi dere Zärtlichkeit sofort ire Schlägerei usarte cha. Äs isch uf jede Fau immer öppis los.
• Mit Hase: Sie si ihne ds schnäu, aber jede Zappuphilipp brucht ä Muetter und Hase chöi eim vorzüglech mit Brathärdöpfle und Liebi versorge.
• Mit Drachene: Sehr viu Verglichbars und Verwandts, de sie chöi ä gueti gestlechi Partnerschaft ufboue und über jedi Enttüschig lächle.
• Mit Schlangene: Sie schüttle und winde sich aui beidi - sie ruhelos und verachtigsvou übere verbohrt Stouz vor Schlange, d Schlange vor Verachtig über ihri Oberflächlechkeit.
• Mit Röss: Kei Problem, wen beidi offe und ufrichtig blibe. Ross hasse ihri Doppuzünigkeit, während sie ihri Säubstgfäuigkeit nid usstoh chöi.
• Mit Geisse: Guet ufem Gschäftssektor, sehr kompliziert, wens um Gfüeu geit. Im Grund gnoh chomme sie mit dr Chüeli im Charakter vode Geisse nid zrächt.
• Mit Güggle: Sie behandle sie aus Flöigegwicht, sie versueche sie ds überträffe und was drbi usechunnt, isch äs Läbe ufemne Vueukan.
• Mit Hüng: Gar nid so schlächt, wiemes erwarte chönnt. Sone brave aute Hung het ou sini guete Site. Sie wärde sie scho entdecke, wen sie sich numme Zit gnue drfür löh.
• Mit Söi: Äs git einigi Ähnlechkeite i ihrne Nature, aber ou sehr viu Antiphate. Wens zuere Hürat chunnt, chöi d Fätze flüge.

[ändere] Literaturnachwis

• Die chinesische Astologie, Roger Elliot, Wilhelm Heyne Verlag München, 1998, ISBN 3-453-03419-8