Jahr des Hahns

Us der alemannische Wikipedia, der freie Dialäkt-Enzyklopedy

Dr "Güggu" als Tierchreiszeiche im Kowloon Walled City Park z Kowloon City, Hong Kong

Dr Güggu (鷄 jī) isch eis vode zwöuf Tiere im chinesische Kaländer. Güggujohr (酉 yǒu) si gsi:

• 22. Jänner 1909 bis 9. Februar 1910 - Erde
• 8. Februar 1921 bis 27. Jänner 1922 - Metall
• 26. Jänner 1933 bis 13. Februar 1934 - Wasser
• 13. Februar 1945 bis 1. Februar 1946 - Holz
• 31. Jänner 1957 bis 17. Februar 1958 - Füür
• 17. Februar 1969 bis 5. Februar 1970 - Erde
• 5. Februar 1981 bis 24. Jänner 1982 - Metall
• 23. Jänner 1993 bis 9. Februar 1994 - Wasser
• 8. Februar 2005 bis 28. Jänner 2006 - Holz
• 28. Jänner 2017 bis 15. Februar 2018 - Füür

[ändere] Ds Charakterbiud

Ihri hervorragenste Eigeschafte si ihre Pioniergeist und ihre Drang, wit übere Horizont hinusdsblicke und ihr Wüsse dür Läse, Gspröch und eigene Forschige ds erwitere. Ihri unagnähmste Site isch dür Agäberei, Aggressivität, dür Luune und Sarkasmus kennzeichnet, düre unstiubar Wunsch, us auem Chlihouz ds mache. Zwüsche dene beidne Extreme schwanke sie hin und här, im eine Ougeblick si sie überläge und unabhänig, ganz Hochspannig, Empfingsamkeit und Energie, im nöchste Ougeblick si sie chlikarierti Miesepeter, wo numme darum angeri Mönsche um sich ume brucht, wöu är sie abkanzle chönne muess.
Damit hängt zämme, dass sie ä läbhafti und überzügendi Sexualität besitze, warm, aber glichzitig drohend. Sie si immer i Gfahr, diejenige am töifste ds verletze, wo sie am meiste liebe.
Ihres Läbe isch uf Leistig usgrichtet. Obglich sie eher praktisch si, putze sie aues mitemne säutene Ifausgeist so uf, dass ou dr Autag imene höhere Glanz erstraut. Güggle si chum einisch töifschürfendi Theoretiker und ätherischi Tröimer, sondern Mönsche vo Fleisch und Bluet, wo sich nach chli romantik sehne, um ihri ganzi Existänz mitemne Huch vo Poesie verchläre ds chönne.
Da sie säuber ohni Arg si, cha öpper, wos druf aleit, sie liecht innelege. Äs faut ihne schwär, härzhaft und ohni Bitterkeit über sich säuber ds lache und das verfahrt sie zure gwüsse Säubstüberschetzig, wo liecht chli ufblosse würkt. Im beste Fau verfüege sie über Schwung und Säubstvertroue und märlihafte Tröim. Im schlimmste Fau si sie ä Egozentriker.

[ändere] Ds Güggu-Ching

Dr chli Güggu isch nid grad bescheide und weis ide meiste Fäu nid, wie är uf angeri würkt. Si natürlech Charme setzt dr Güggu ersch den berächnend i, wen är erwachse wird, jungi Güggle i ungernähmigslustig, gärn vorlut und begierig, sich ids voue Läbe ds stürtze. Sie hei keni usgsprochene Begabig für die rein akademische Fächer, obglichs do ou Usnahme git, sondern sie tribe eher Sport und stürze sich lieber i jedi Art vo Gseuigkeit, aus ihri Nase ines Buech ds stecke.

[ändere] Dr extrovertiert Güggu

Meh isch entweder ä extrovertierte oder ä introvertierte Güggu, mängisch mischt sich beides, aber ei Site isch doch stercher usprägt. Die meiste Güggle si extrovertiert, fründlich, immer drzue barat und imstang, ä Situation ds verstoh, ziemlich säubstbewusst und ganz druf versässe, die gsamti Wäut vo ihrer Persönlechkeit ds beidrucke.

[ändere] Dr introvertiert Güggu

Sie si ä sonderbari Mischig, ä Mönsch, wo sich ufs Innere konzentriert und trotzdäm ä nach usse grichtete Charakter bsitzt. Das cha zu Frustratione füehre und sie chöi sich drüber beklage, dass niemer sie versteit. Sie müesse mit Muet und anhang vo Erfahrige lerne, d Wäut mit Glasseheit ds erfasse.

[ändere] Was Güggle gärn mache

Typischi Güggu-Sportarte si Fächte, Boxe und Ringe, aui Arte vo Zwöikämpf auso, bi dene dr Best gwünne cha. Güggle si insgesamt lideschaftlechi Sportfründe und gniesse jede gsunge Zwöikampf, wo ihne Spass bringt.
Güggu-Hobbys beruehe meistens uf ihrem Gschick uf aune praktische Gebiete, sigs numme, dass drbi ä nützleche Gägestang usechunnt, sigs, dassmeh im Rahme vore Gseuschaft bi angerne Idruck schinde cha. Drzue ghöre ou Amateur-Theater-Vorsteuige, Singe und Tanze, Metauarbeite und angeri Basuleie, während d Dame gärn öppis dekorativs fürs eigete Heim entwärfe.
D Eigeschafte, mit dene d Mönsche usemne Güggujohr im Bruef Erfoug hei: Ihri usgsprocheni Begabig zur Füehrerschaft, solang die Füehrerschaft vo ihrne Ungergäbene akzeptiert wird und ä gwüssi Elastizität, mit dere meh ou ä Rückschlag überwindet. Güggle passe am beste dörthäre, wo Muet, Ungernähmigsgeist und iserni Närve verlangt wärde und wo dr Lohn imene Zuewachs a persönlichem Prestige besteit.

[ändere] Was zude Güggle passt

Länder, wo mitem Johr vom Güggu i Verbingig brunge wärde chöi, si Ängland und Oustralie, Westindie und Haiti und wahrschinlech ou Ghana und Paraguay.
D Edusteine und Haubedusteine, wo mitde Güggujohr korrespondiere, si Diamant, Rubin, Granat und Topas.

[ändere] Bekanti Güggle

• Katharina die Große (*1729-†1796) Katharina II., Zarin vo Russland
• Johann Wolfgang von Goethe (*1749-†1832) dütsche Schriftschteuer und Dichter (Faust, Götz von Berlichingen)
• Richard Wagner (*1813-†1883) gebr, Wilhelm Richard Wagner, dütsche Komponist (Tristan und Isolde, Ring der Niebelungen)
• Giuseppe Verdi (*1813-†1901) gebr. Giuseppe Fortunino Francesco Verdi, italiänische Komponist (Aida)
• Anthony Eden (*1897-†1977) gnaue Name und Titu: Robert Anthony Eden, 1. Earl of Avon, ehemalige britische Premierminister
• Papst Paul VI. (*1897-†1978) burg. Giovanni Battista Enrico Antonio Maria Montini, italiänische Kardinau und 261. Papst
• Philip Mountbatten, Duke of Edinghburg (*1921) bekannter als Prinz Philip, Prinzgemahl vo Königin Elizabeth II., vo Grossbritannie
• Yoko Ono (*1933) japanisch-US-amerikanischi Künstlerin, Witwe vom John Lennon (Beatles)
• Eric Clapton (*1945) Gebr. Eric Patrick Clapton, änglische Musiker (Slowhand)
• Steffie Graf (*1969) gebr. Stefanie Maria Graf, dütschi Tennisspilerin
• Oliver Kahn (*1969) dütsche Fuessbauspiler

[ändere] Zämmeläbe mit angerne

So chömme Güggle mit Verträter vo angerne Johre us:

• Mit angerne Güggle: Chöi sich zwöi ei Thron teile? Äs cha ä brilianti und erfougrichi Partnerschaft wärde, aber mi muess ad Fuessnägu dänke.
• Mit Rattene: Glich viu Ähnlechkeite und Gägesätz. Sie si beidi vo Ehrgiz erfüeut, doch währends d Ratte mit charmanter List versuecht, benütze sie ihre marktschreierisch Glanz.
• Mit Büffle: Ä gueti Ehekombination, wen jede Partner die schwache Steuene vom angere genau erkennt und sie nei für sini Zwäck usnützt.
• Mit Tigere: Sie besitze meh Energie aus ä Tiger, aber sie si beidi drzue gschaffe, Zueneigig lieber entgägedsnäh aus sie ds verschänke.
• Mit Hase: Sie wäre gueti Eutere, de ihri Eigeschafte ergänze sich i jedere Hinsicht ufs schönschte. Jede vo ihne muess aber viu vom angere lehre.
• Mit Drachene: Jede het si Ehriz, wobi dr Drache immer origineu si wot, während sie am liecht igängige, autmodische Ruhm hänge.
• Mit Schlangene: Sie bewärte d Ding nach ihrem üssere Aschin, Schlange zerbräche sich über die töifere Bedütige ihre Chopf. Kei schlächti Partnerschaft für gerisseni Gschäftslüt.
• Mit Röss: Sie hei viu mitenang gmeinsam, was nid unbedingt zum gmeinsame Glück füehrt. Sie chömme guet mitenag zrächt, wen sich dr eint vo Zit zu Zit vom angere erhole cha.
• Mit Geisse: Ihri verschidene Läbenszieu löh kei töiferi Sympathie ufcho, aber wen jede igseht, wo d Stärchene vom angere lige, chöi sie änang schätze lehrne.
• Mit Hüng: Für die glassene Hüng si sie ds beläbend und besitze ä ds wankumüetige Charakter, aber sie bringe d Hüng wenigstens in Schwung und haute sie Lebändig.
• Mit Söi: Sie hei meh Muet, d Söi hei meh Sinn für Grächtigkeit. Sie verfüege über schrankelosi Chräft, jeni zieh die leibliche Gnüss vor.

[ändere] Literaturnachwis

• Die chinesische Astologie, Roger Elliot, Wilhelm Heyne Verlag München, 1998, ISBN 3-453-03419-8