Jahr der Schlange

Us der alemannische Wikipedia, der freie Dialäkt-Enzyklopedy

D "Schlange" als Tierchreiszeiche im Kowloon Walled City Park z Kowloon City, Hong Kong

D Schlange 蛇 shé) isch eis vode zwöuf Tiere im chinesische Kaländer. Schlangejohr (巳 sì) si gsi:

• 4. Februar 1905 bis 24. Jänner 1906 - Holz
• 23. Jänner 1917 bis 10. Februar 1918 - Füür
• 10. Februar 1929 bis 29. Jänner 1930 - Erde
• 27. Jänner 1941 bis 14. Februar 1942 - Metall
• 14. Februar 1953 bis 2. Februar 1954 - Wasser
• 2. Februar 1965 bis 20. Jänner 1966 - Holz
• 18. Februar 1977 bis 6. Februar 1978 - Füür
• 6. Februar 1989 bis 26. Jänner 1990 - Erde
• 24. Jänner 2001 bis 11. Februar 2002 - Metall
• 10. Februar 2013 bis 30. Jänner 2014 - Wasser

[ändere] Ds Charakterbiud

Sie betrachts aus ihri grossi Ufgab vo ihrem Läbe, sich ganz und gar dr einte Tätigkeit oder Person oder ihrem Gloube ds widme, für dä sie sich bestimmt füehle. Sie si vöuig drvo überzügt, dass ä grossi und wichtegi Ufgab ihne harrt und sie warte mit ihrer ganze Energie, mit aune ufgspicherte Gfüeu druf, ds Bestätigunsfäud ds entdecke, wo ihr Schicksau isch. Bis sies glücklich gfunge hei, chöi sie ä rächt schwirige Mitmönsch si, säubstkritisch und stritsüchtig, ä Plag nid numme füre anger, sondern ou für sich säuber. Isch ds Läbenszieu jedoch entdeckt, gseht aues uf einisch ganz angers us. Das Bewusstsi vom innere Konflikts spieglet sich i ihrer ganze Läbensisteuig wider. Sie si kei Durchschnittsmönsch, wo sich mi Ploudereie und Oberflächlichkeite dsfriedegäh. Sie si ufene gwichtigi Herusforderig igsteut, wo ihne zwar nid dr ganz Spass am Läbe roubt, äs ihne aber unmüglich macht, sich numme dä Oberflächlichkeite hidsgäh. D Johre vor Schlange schine hüfig Übergangsperiodene ir Wäutgschicht ds si, Wasserscheide, wo künftige Strömige und Entwicklige ihri Richtig gäh. Ihres Läbe wird sich vermuetlich inere Reihe vo dütlech begränzte Episode iteile loh, us dene sie im Rückblick immer ä Lehr zieh chöi und wen sie die Lehr akzeptiere, sich dr Zuewachs a Erkenntnis ds eige gmacht hei, isch die Episode ou beändet. Ihri Fähler uns Schwächene: Ä Neigig, ihri Mitwäut ds beschwindle, Dickchöpfigkeit und äs heftigs Tempramänt, wo sie bi jeder Chlinigkeit zur Explosion tribt. Sie si sech säuber ihr schlimmste Feind, wöu sie viu ds hochi Asprüch a sich säuber steue. Doch wen sie sech zue sich säuber düregrunge hei, verfüege sie überne Aziehigschraft, wo sich niemer entzieh cha.

[ändere] Ds Schlange-Ching

Ade chline Schlange muessme erloube, mit sich säuber fertig ds wärde, die schützendi Hang vode Eutere bruche sie numme säute.Was sie drfür bruche, isch Ermuetigung. Die chlini Schlange het Zuespruch und Ermunterig nötig, wen sie sich verletzt füeut, süsch gratet sie is Schmoue oder versinkt im Säubstmitleid. Wen sie sech fausch behandlet gloubt, cha sie tückisch wärde. Eutere und Lehrer hei bsungers ir früeche Chindheit dei verantwortigsvoui Ufgabe, am Ching genau ds richtige Glichgwicht zwüsche Disziplin und Freiheit ds vermittle. Dr Leitsatz vom spötere Ärwachseneläbe wird Säubstdisziplin si, wo jedoch säubstständig entwicklät wärde muess und nid ufzwunge sie darf.

[ändere] D extroverteti Schlange

Schlangene si extrovertiert oder introvertiert oder öppis vo beidem, neige jedoch meistens chli meh zum einte Extreme. Extrovertierti Schlange si überus sexy, sie kenne genau d Macht über angeri Mönsche und si besträbt, ihres Zieu im Läbe dür Dienstleistige, gschäftlechi Tüchtigkeit oder dür prakteschi Arbeit ds erreiche. Sie bruche jedoch trotzdäm und immer wider d Glägeheit, sich ungstört i ihrne vier Wäng zrügzieh ds chönne.

[ändere] D introvertierti Schlange

Die eigene vier Wäng si sehr wichtig für sie und sie si ihne beides, Schutz und Versteck. Äs faut ihne schwär, ängi Fründschafte ds schliesse, aber wes ihne glingt, dure die Fründschafte ds ganze Läbe. Ou a ihri Fründe steue si überus hochi Asprüch.

[ändere] Was Schlange gärn mache

Typeschi Sportarte: Bärgstige, Töifseetouche, Fischä, Sägle und villech no Rugby. Dr Nachdruck muess uf dr persönliche Usfüehrig lige chönne, d Schlange meuss säge chönne: "Das muess so und nid angers gmacht wärde - wöu ig das säge." Schlange-Hobbys si öppis für Eisidler: Läse, Vögu beobachte, Amateur-Geologie, Briefmargesammle. Schlange si keni geborene Gseuschaftler, sie ziehs vor, inere private Manier ds brilliere. Wed Schlange zum Bispiu Giige spiut, de wird sie lieber Solist aus Chammer- oder Orchestermusiker si. D Eigeschaft, wo Mönsche us Schlangejohr im Bruef entwickle, si besässeni Konzentration, äs scharfs Oug für Chlinigkeite, uszeichnets Organisationtalänt und d Fähigkeit, inere Kriese d Füehrig ds übernäh. Sie haute sech immer chli abseits, blibe für sich und äs faut ihne schwär, Mönsche um sich ds dueude, wo nid so gschiht si, wie sie säuber. Ihre Stouz vernäblet ihne mängisch dr Blick, sie merke nid, dass und wo sie säuber Fähler gmacht hei und wen sies würklich erkenne, so dänke sie nid dra, äs zuedsgäh.

[ändere] Was zude Schlangene passt

Länder, wo öppis mitde Schlangejohr söue dstüe ha, si Mexiko, Peru, Indiä, Saudi-Arabie, dr Iran, Äthiopie und d ehemaledi UdSSR. D Edusteine und d Haubedusteine, wo mitde Schlangejohr korrespondiere söue, si Topas, Malachit, Jaspis, Bluetstei, Magnetit und Füürstei.

[ändere] Zämmeläbe mit angerne

So chömme Schlangene mit angerne Tierjohre guet oder weniger guet us:

• Mit angerne Schlangene:Das git entweder ä beruschendi und fürd Ewigkeit begründeti Liebi oder ä genauso töif verankerte Hass. Äs chunnt jewieus uf die beträffendi Schlange a.
• Mit Rattene: Ratte chöi öppis farblos würke, obglich sie viu gmeinsami Inträsse entdecke chöi, versueche sie d Rattene ds beherrschä.
• Mit Büffle: Sehr guet, usser wen dr eint genau ds Gägeteu vom angere plant. We sie ä gueti Fründschaft mit ihne ufboue wei, so muess eine d Eigeart vom angere akzeptiere.
• Mit Tigere: Sie neige drzue, wesentlich extrovertierter aus d Tigere ds si, gschmeidiger, apassigsfähiger. Aus Verbündeti si sie äs unwiederstehlechs Paar.
• Mit Hase: Schlange versueche immer, sich Hasee gägeüber fründlich ds verhaute, aber d Füehrig ds übernäh. Kurioserwis, sis jedoch hüfig d Hase, wo ufd Dur ds Renne gwinne.
• Mit Drachene: Wen sie sich druf irrichte, sich uf habem Wäg ds entgägecho, so cha äs belastigfähigs, guets Verhäutnis entstoh. Äs cha jedoch genausohüfig passiere, dass jede vo ihne äs angers Zieu vor Ouge het.
• Mit Röss: Ade extrovertierte Röss finge sie ihri Hiterkeit und Vergnüege wäge Gfaue. Die sensible, ruhige Röss chöi drgäge ihri beste Gchäftspartner wärde.
• Mit Geisse: Ä hervorragendi Partnerschaft uf gschäftlechem und politischem Gebiet, bi deres friedlech aui Naslang zumene Zämmeprau vode Meinige cho cha. Geisse bewundere ihre Muet.
• Mit Affe: Sie si ungloublich verschide vonenang und grad das isch dr Grund, warum dr eint dr anger unwiederstehlech azieht. Wens überhoupt klappet, ergäh sie beidi äs Paar, wo aues glingt.
• Mit Güggle: Das isch ä vorzüglechi Kombination fürne Ehe, de zäme geit ihne aues schnäu vor Hang und sie eroberre sich äs wits, richs Fäud vode gmeinsame Gfüeu.
• Mit Hüng: Unger dere Bedingig guet, wen sich d Hüng zuetroue, nie d Kontoue ds verlüre und i dere Allianz d Füehrig ds übernäh.
• Mit Söi: Sie ergänze d Schlange, schmichle ihne aber nid. D Sou isch äs Tier, wo sie vou Wonne hasse und umgekehrt. Uf jede Fau dr eint vom angere faszinierd si.

[ändere] Bekannti Schlangene

• Fjodor Michailowitsch Dostojewski (*1821-†1881) russische Schriftsteuer (Arme Leute, Erniedrigte und Beleidigte, Der Idiot)
• Sarah Bernhardt (1844-†1923) gebr. Marie Henriette Rosine Bernardt, französischi Schouspilerin (Mein Doppelleben, Petite idole)
• Joseph Conrad (*1857-†1924) polnische Schriftsteuer (Romance, Spiel des Zufalls)
• Mahatma Gandhi (*1869-†1948) geischtiga Führa vo da gewaltlosa indischa Unabhängigkeitsbewegung
• Béla Bartók (*1881-†1945) ungarische Komponist, Pianist und Musigethologe (Herzog Blaubarts Burg, Der holzgeschnitzte Prinz, Der wunderbare Mandarin)
• Pablo Picasso (*1881-†1973) spanische Maler, Grafiker und Biudhouer
• Mary Pickford (*1892-†1979) kanadischi Schouspilerin und Fiumproduzäntin (Secrets, Rosita, Pollyanna)
• Mao Zedong (*1893-†1976) ou Mao Tse-tung, chinesische Presidänt und Gründer vom Maoismus
• Anne Frank (*1929-†1945) dütsche Jüdin im Zwoata Wältkriag, bekannt wegs era sinem Tagebuach
• Audrey Hepburn (*1929-†1993) britisch-holländischi Schouspilerin (Einmal Millionär sein, Frühstück bei Tiffany, Robin und Marian)
• John Osborne (*1929-†1994) gebr. John James Osborne, Änglische Dramatiker (Blick zurück im Zorn, England, mein England)
• John F. Kennedy (*1917-†1963) gebr. John Fitzgerald Kennedy, 35 Presidänt vode USA

[ändere] Was isch in Schlangajohr passiert

• Massaker ufm Tiananmen (Platz vum Himmlische Friede) (1989)
• Öffnung vo da Berliner Muur (1989)
• D Terroraschläg vom 11. September 2001

[ändere] Literaturnachwis

• Die chinesische Astologie, Roger Elliot, Wilhelm Heyne Verlag München, 1998, ISBN 3-453-03419-8