Jahr des Schweins

Us der alemannische Wikipedia, der freie Dialäkt-Enzyklopedy

D "Sou" als Tierchreiszeiche im Kowloon Walled City Park z Kowloon City, Hong Kong

D Sou (猪 zhū) isch eis vode zwöuf Tier im chinesische Kaländer. Soujohr (亥 hài) si gsi

• 30. Jänner 1911 bis 17. Februar 1912 - Metall
• 16. Februar 1923 bis 4. Februar 1924 - Wasser
• 4. Februar 1935 bis 23. Jänner 1936 - Holz
• 22. Jänner 1947 bis 9. Februar 1948 - Füür
• 8. Februar 1959 bis 27. Jänner 1960 - Erde
• 27. Jänner 1971 bis 14. Februar 1972 - Metall
• 13. Februar 1983 bis 1. Februar 1984 - Wasser
• 31. Jänner 1995 bis 18. Februar 1996 - Holz
• 18. Februar 2007 bis 6. Februar 2008 - Füür
• 5. Februar 2019 bis 24. Jänner 2020 - Erde

[ändere] Ds Charakterbiud

Ds Houptmotiv vo ihrem Läbe isch d Suechi nach dr Wahrheit. Sie chöi die Ufgab uf vornähmi Art mache - aus Wüsseschaftler und Forscher oder aus stets a sich säubst arbeitende Suechende. Sie chöis aber ou aus Schnüffelei betribe und zwar nid zu bessere Zwäckä, sondern um dr Schnüffelei ihre Wiue. Sie konzentriere sich jewius usschliesslech uf ei Sach, ds übrige Läbe muess de so abroue, wies grad chunnt. Us dere Besässeheit resutiert d unordenlichi, fulänzerischi Site vo ihrer Natur.
Ihri Fähler bestöh drin, dass sie am Mönsch, wo nid so gschit si wie si, mit Verachtig begägne, dass sie drzue neige, dick ds wärde (äs Zeiche fürd Glichgüeutigkeit, mit dere sie bestimmti Bereiche vom Läbe behandle) und dass sie unsystematisch si.
Zue ihrne Tugende ghöre ihri grächti Empörig, bsungers über Mönsche, wo unger schwirige Bedingige existiere müesse und ihr moralischs Gwicht, dass sich unger Umstäng ersch im Auter entwicklet.
Sie gseh, dass sie ä rächt viuschichtige Charakter si, stouz uf ihri intellektuellä Fähigkeite und Leistige, aber nie dsfride mit ihrne gfüeusmässige Bingige. Zwar si sie fähig, Liebi und Treui ds bewise, aber eigentlech bruche sie eher ä fründleche und witzige Kamerad aus Partner für grossi Lideschäft. Wen sie aber die grossi Liebi packt, so setzt sie das i gröschti Verlägeheit. Natürlech chöi d Söi vo dere Wäut ou sinnlech si und mängisch kenne sie ihri Gränze nid ganz; lideschaftlechi Gfüeu passe eifach nid so rächt zu ihne.
I Gfüeussache müesse sie Gedueud und Glasseheit entwickle. Sie hei ä bewunderigswürdig gradlinige Verstang ds biete, wo ihne häufe cha, kreativ ds si, sich düredssetze und angeri ds beflügle.

[ändere] Ds Sou-Ching

Äs isch immer ä Vorteu fürnes chlises Söili, wens i Rueh und Regumässigkeit erzoge wird, drmits Zit und Glägeheit het, müglechst viu verschideni Wüssensgebiet kennedslehre. Äs brucht wie jedes Ching äs geborgnigs Deheim, aber sini Eutere dürfe sich nid wungere, wens relativ früeh ä Drang zur Unabhänigkeit entwicklet. Mit angerne Ching geits fründlech um, aber äs möcht i aune mügleche Chlinigkeite sini Überlägeheit bewise. Dür Drohige chas überhoupt nid igschüchteret wärde, sie verstärche höchstens si Muet. Äs suecht jedoch nie Ärger und Strit.

[ändere] Die extrovertierti Sou

Dir sit äs extrovertierti oder ä introvertierti Sou, oder öppis vo beidem, wobi ds eine gwüss chli stercher usprägt si wird. Wen dir zude extrovertierte Söi ghöret, wärdet dir angeri Mönsche ds beidrucke sueche und ä füehrendi, aber gheimi Roue i öffentliche Aglägeheite spile wöue. Dir besitzet Säubstvertroue, aber dir machet klar, wie dir uf angeri würket, darum chöit dir taktlos und grob und trotzdäm mit euch säuber höchst dsfride si.

[ändere] Die introvertierti Sou

Dodüre, dass sie sich vor auem mit ihrne eigete Gfüeu und Asichte befasse, chöi sie im Ungwüsse si, wie angeri Mönsche uf sie reagiere - und das cha Ärger und Ufregig bedüte. Sie hei wahrschinlech eher äs paar treui Busefründe aus ä grossi Azau vo Bekannte.

[ändere] Was Söi gärn mache

Typischi Sou-Sportarte si Schifahre, Kricket und Baseball, Gouf und Tennis.
Söi-Hobbys si meistens intelektueu: Krüzworträtsu, Wettbewärbe, Amateurschriftsteuerei. Sou-Metli beschäftige sich miem Entwärfe vo neue Frisure und experimentiere mit Make-up und Chorbflächterei.
Die guete Eigeschafte, wo Mönsche us Söijohr für ihre Bruef mitbringe, si Begeisterigsfähigkeit, Genauigkeit im Detai, beachtlechä Verstang und d begrüessigswärti Fähigkeit, mit angerne Kompromissä ds schliesse. Sie chöi die rächti Hang vom Chef oder dr gschäftsfüehrend Diräktor si, aber äs wird ihne schwärfaue, i auer Öffentlichkeit mitere grosse Gruppe Mönsche dsrächtdscho.

[ändere] Was zude Söi passt

Länder, wo mite Johre vor Sou i Verbingig brunge wärde, si Dänemark, Israel, Brasilie, Afghanistan, Burma, Island, Malaysia und Pakistan. D Edusteine und Haubedusteine, wo zude Söijohr passe, si Moos-Achat, Koraue, Lapislazuli, Beryll und Alabaster.

[ändere] Bekannti Söi

• Otto von Bismarck (*1815-†1898) gebr. Otto Eduard Leopold von Bismarck-Schönhausen, dütschä Staatsma und Richskanzler
• David Lloyd George (*1863-†1945) genaue Name und Titu: David Lloyd George, 1. Earl Lloyd George of Dwyfor, britischä Politiker und Prömierminister währnedem Erschte Wäutchrieg
• Thomas Mann (*1875-†1955) gebr. Paul Thomas Mann, dütschä Schriftschteuer (Die Buddenbrooks, Der Tod in Venedig)
• Ernest Hemingway (*1899-†1961) gebr. Ernest Miller Hemingway, US-amerikanische Journalischt und Schriftschteuer (Wem die Stunde schlägt, Der alte Mann und das Meer)
• Humphrey Bogart (*1899-†1957) gebr. Humphrey DeForest Bogart, US-amerikanische Schouspieler (Casablanca, African Queen)
• Vladimir Nabokov (*1899-†1977) eigentlich: Wladimir Wladimirowitsch Nabokow, russisch-US-amerikanische Shriftsteuer, Literaturwüsseschaftler und Schmätterlingsforscher (Maschenka, Die Mutprobe, Lolita, Schachspiuzug Nabakov)
• Charles Laughton (*1899-†1962) US-amerikanische Schouspiler und Regisseur (Das Haus des Grauens, Das Gespenst von Canterville, Abbott und Costello als Piraten wider Willen, Sturm über Washington)
• Duke Ellington (*1899-†1974) gebr. Edward Kennedy „Duke“ Ellington, US-amerikanische Pianist, Bandleader, Komponist und Freimuurer (The Washingtonians, Duke Ellington Orchestra)
• Noël Coward (*1899-†1973) eigentlich: Sir Noël Peirce Coward, änglische Schouspiler, Schriftsteuer und Komponist (Private Lives, Mit Dir ins Glück, Flüchtige Begegnung, Easy Virtue)
• Georges Pompidou (*1911-†1974) gebr. Georges Jean Raymond Pompidou, französische Politiker und ehemalige Presidänt vo Frankrich
• Loriot (*1923)burg. Bernhard Victor Christoph-Carl von Bülow, dütschä Karikaturischt, Schriftschteuer, Schouschpieler und Regisseur
• Luciano Pavarotti (*1935-†2007), italienische Operesänger (die drü Tenöre /Pavarotti, Domingo und Carreras)
• Elton John (*1947) burg. Sir Elton Hercules John, britischä Sänger, Pianist und Komponist (I've Been Loving You Too Long, Runaway Train, Are You Ready for Love, Circle of Life (Bekannt us: Der König der Löwen))

[ändere] Zämmeläbe mit angerne

SO chömme d Söi mit Verträter angerne Tierjohr dsrächt:

• Mit angerne Söi: Cha sehr ufregend wärde, bsungers wen dr eint dr anger matt ds setze versuecht. Hüfig ä Partnerschaft vouer Strit und Rederei.
• Mit Rattene: Sie si voukomme verschideni Wäse und wen sie sich zämedüe wei, so wärs empfälenswärt, wen sie d Dänkarbeit übernäh, während drgäge d Ratte mit ihrem Charme d Ussearbeit erledigt.
• Mit Büffle: Sie neige beidi zu Fuuheit und Musse, womit sie immerhin ä Gmeinsamkeit hei. Bi ihne cha jedoch mängisch ä Art inneri Rastlosigkeit usbräche, wo am Büffu-Charme widerspricht.
• Mit Tigere: Sie chömme guet mitenang us, wen das de angere Lüt ou nid warschinlech erschint. Äs isch äs Schwöster- und Bruederverhäutnis mitere intressanter Prise Sex.
• Mit Hase: Do herrscht ä Reihe vo Überistimmige, den obglich sie usgsproche unabhänig si, bruche sie vo Zit zu Zit Entspannig, wo sie bsungers guet bi Hase gniesse chöi.
• Mit Drachene: Äs cha zwüsche ihne ä bednidenswärt aregendi und befruchtendi Partnerschaft entstoh, aber wen das nid uf Ahib klappt, de hüte sie sich vorde Chraue und am Füüratem!
• Mit Schlangene: Ihr Gägebiud. Wen sie die richtigi Schlange erwüsche, so geit ihne ds Zämmeghörigkeitsgfüeu dür March und Chnoche.
• Mit Röss: Nid schlächt. Ihri Heiterkeit cha ihne chli ufd Närve goh, aber sie gniesses beidi, immer für Wirbu und Ufregig sorge ds chönne.
• Mit Geisse: Sie si flissiger, was ä wunderbari Basis fürne Zämmearbeit ergäh cha.
• Mit Affe: Sie wärde viu zämme lache chönne, hüfig uf Choste vom angere. Äs isch Asichtssach, öb meh sone Verbingig usboue oder töifergoh loh söu. Äs chunnt ufene Versuech ah.
• Mit Güggle: Ihrer Meinig noche si d Güggle chli ds ufdonneret; Nätt und dekorativ für ei Obe, aber nid fürs ganze Läbe.
• Mit Hüng: Ä reizvoui Ehekombination, wen sie sich drvor hüete, ihri geistigi Überheblichkeit zur psychologische Fouter wärde ds loh.

[ändere] Literaturnachwis

• Die chinesische Astologie, Roger Elliot, Wilhelm Heyne Verlag München, 1998, ISBN 3-453-03419-8