Jahr des Tigers

Us der alemannische Wikipedia, der freie Dialäkt-Enzyklopedy

Dr "Tiger" als Tierchreiszeiche im Kowloon Walled City Park z Kowloon City, Hong Kong

Tiger 虎 hŭ gälten noch m chinesischen Kalender als vawäaga. Tigerjohr (寅 yín) sin gsi:

• 8. Februar 1902 bis 28. Jänner 1903 - Wasser
• 26. Jänner 1914 bis 13. Februar 1915 - Holz
• 13. Februar 1926 bis 1. Februar 1927 - Füür
• 31. Jänner 1938 bis 18. Februar 1939 - Erde
• 17. Februar 1950 bis 5. Februar 1951 - Metall
• 5. Februar 1962 bis 24. Jänner 1963 - Wasser
• 23. Jänner 1974 bis 10. Februar 1975 - Holz
• 9. Februar 1986 bis 28. Jänner 1987 - Füür
• 28. Jänner 1998 bis 15. Februar 1999 - Erde
• 24. Februar 2010 bis 2. Februar 2011 - Metall

[ändere] Ds Charakterbiud

D Houptatribschraft i ihrem Läbe isch d Notwändigkeit, ihri eigete Säubstachtig ds pflege. Das tönt nid guet und vo Zit zu Zit tribt ihri Itukeit dr Räscht vor Mönschheit ou ufd Paume. Aber sie verfüege drnäbe über Warhärzigkeit und Fiingfüeu, über ä Usstrahlig vo ihrer Person, wome sich numme schwär entzieh cha, so dass sich immer wider ä Chreis vor Bewunderig um sie sammlet. Ohni die treue Sklave wärde sie liecht gritzt, zynisch und unglücklech, aber solang sich numme ei einzigi Person um sie chümmeret, isch ds Läbe für sie läbenswärt.
Angeri gueti Eigeschafte, wo sie i usreichendem Mass bsitze, si Muet, Ufrichtigkeit und d Bereitschaft, fürne gueti und grächti Sach jedes Risiko uf sich ds näh.
Kei Tiger drängt sich unbedingt nach Strit und Usenangsetzige, aber wen är öppis aus Herusforderig empfingt, füeut är sich liecht i sire Ehr agriffe und de cha ihn nüt meh zrüggha. Das cha mängisch fausch si, aber sini Hautig bringt ihm Zueneigig und Bewunderig i: dä Sinn fürd Korräktheit vore bestimmte Hautig, sogar wen sie jeglicher Vernunft wiederspricht. Äs ghört ou zum Charakterbiud vom Tiger, dass är die autmodische Tugende vo Ehr, Ritterlichkeit und Höfflichkeit über aues und jedes angere steut.
Ihri Fähler und Schwäche, abgseh vo dene, wo scho erwähnt worde si: d Neigig, mit de Gfüeu vo angerne Lüt so ds spile wiene Chatz mitere gfangere Muus. Ä glägentlichi Blindheit in bezug ufd Tatsach, dass mängisch Kompromisse abrunge si. Tiger wüsse gar nid, was das Wort bedütet. Sie wei jedi Gruppe säuber füehre, isch das im Bruef, ufem Sportfäud oder im Privatläbe. Und bi auem bewegt sich dr Tiger mitere rüehrende Unschueud, wie ä Märliprinz, wiene tapfere, junge Offizier, wo dr Chrieg no fürne Ehrehandu hautet.

[ändere] Ds Tiger-Ching

Dr chli Tiger entwicklet ä Fröhligkeit, wo unerhört asteckend würkt. Äs chunnt numme ds früeh d Zit, wo är nachemne Opfer suecht, wo är sini Chraue drane cha schärfe. Är cha sich ine Wuetafau steigere, wen öppis nid nach sim Chopf geit und är brucht vo sim Vater oder vore angere männliche Bezugsperson äs guets Bispiu, damit är für spöter lehre cha, dases kei Outorität ohni Säubstbeherrschig git. Dr chli Tiger isch meistens sehr sportlich, fründlich und nid bsungers a Glehrsamkeit und Wüsseschaft intressiert, obschon Theaterspiu und Malerei ä gwüsse Idruck uf ihn mache.

[ändere] Dr extrovertiert Tiger

Dir sit aus Tiger entweder extrovertiert oder introvertiert, oder dir schwanket zwüsche beidne Extreme, wobi dir aber zu eim vo beidne meh neige düet. Aus Extrovertierte isch euch sehr dütlich bewusst, dass dir immer äs Publikum und si Bifau bruchet. Dä Bifau cha euch dr Chopf verdräie, so wie dir dür euri eitli Säubstbewunderig uf angeri liecht aus ufblossnige Agäber würke chönntet.

[ändere] Dr introvertiert Tiger

Äs fäut euch a Vertroue, angeri mit eurer Warmhärzigkeitfür sich idsnäh chönne, so dass dir euch hingerre Hautig vo Arroganz verschanzet, wo gar nid zu euem normale Wäse passt.

[ändere] Was Tiger gärn mache

Typischi Tiger-Sportarte: Outorenne, Polo Rossrenne, Ringstäche, Churzstrckälouf und Tennis. Äs faut ihm schwär, sich bi Mannschaftsspiu ds iordne, sie wei immer ir erste Linie spile.
Tiger-Hobbys si Sunnebade, Bronzeguss und angeri Metauarbeite, Laiespiu, Musig mit Blächinstrumänt, am liebste Trumpete, und modischi Chleidig.
Die guete Eigeschafte, wo d Mönsche us Tigerjohre fürs Bruefsläbe mitbringe, si dr Wunsch, Herr vor Situation ds wärde und drfür ds sorge, dassd Sach louft. Sie wei bewundert wärde, aber lieber ihri persönliche Eigeschafte aus ihrer bruefliche Fähigkeite wäge. Sie chöi unghür attraktiv si, aber starchem Druck si sie mängisch nid gwachse.

[ändere] Was zu de Tiger passt

Länder, wo mitem Johr vom Tiger im Zämehang stoh söue, si Italie und Frankrich, Chile und Ecuador, Uganda und Bedschuanaland. Äs isch bemerkenswärt, dass grossi internationali Krisejohr hüfig i Tigerjohr agfange hei: Dr Afang vom Erste Wäutchrieg, dr änglisch Generaustreik, ds Münchner Abkomme, wo am zwöite Wäutchrieg vorus gange isch, dr Afang vom Krieg z Korea, d Krise z Kuba und aues, wo 1974 passiert isch.
D Edusteine und d Haubedusteine, wo zude Tigerjohr passe söue, si Rubin, Diamant, Hyazinth, Granat, Tigeroug.
Zwöi wichtigi Erfinige, wo ide Tigerjohr gmacht worde si, charakterisiere ufs beste die drohendi Gwauttätigkeit und de theatralisch Glanz vode Tiger: ds Dynamit und ds Fernsehe.

[ändere] Zämeläbe mit angerne

So chömme Tiger mit Verträter vo angerne Tierzeiche im guete (oder böse) us:

• Mit angerne Tiger: wie zwöi Monarche, im beste Fau vereinigt gäg die ganzi Wäut, im schlimmschte Fau im ständige Wettstrit gägenang.
• Mit Rattene: Cha ä ziemlich temperamäntvoui Aglägeheit wärde, wen sie ihri Zieu mit Charme und Unnachgibigkeit ds erreiche versuech, während d Ratte mit Charme und List schaffet.
• Mit Büffle: Sie gniesses, vor ihne agäh ds chönne, aber im töifste Winku vo ihrer Seele verachtet sie dr Büffu - oder beneide sie äs bitzli.
• Mit Hase: Gits nid viu Gmeinsamkeite und genau das isch dr Grund, warum dr eint vom angere azoge wird. Sie finge d Hase friedlich und müetterlich.
• Mit Drachene: Sie dänke, gspüre und läbe uf verschideni Wäuelängine. Trotzdäm chöi sie sehr guet zämmeschaffe. Sie achte und respektiere d Entschlosseheit vom Drache.
• Mit Schlange: Cha i gwüsse Zite zu fürchterliche Stritereie cho, mit immer neue Argumänte und viu ds viu starrchöpfigem Stouz. Trotzdäm si Fründschafte müglech.
• Mit Röss: Viu Gmeinsamkeite, aber grad gnue Ungerschide, um eine ufe anger neugierig ds mache. Mit Röss chömme sie vo aune Tier am beste us.
• Mit Geisse: Zwüsche ihne chnisterets nüt, aber äs cha säubstverständlich zure durchus befridigende Arbeitsgmeinschaft cho. Für sie gueti zwöi Lüüt.
• Mit Affe: Ihr läbhafts Ghabe rizt dr Tiger und zieht ihn ou i wider ihrem Wiue a, sübst wen sie sich gägeüber immer öppis affig benäh.
• Mit Güggle: Viu Asätz für Ehrgitz und Wettbewärb, was jedoch zur Bewunderig und nid zu Hass füehre cha. Wen sie sich zämetüe, so cha das unger Umstäng dsviu Glanz und Gloria si.
• Mit Hüng: Natürlich wei sie sich zum Führer ufschwinge, aber wen sie sich Zit löh und lehrwiuig si, chöi sie vode Hüng viu Wisheit erbe.
• Mit Söi: Weniger offesichtlechi Kontaktpünkt, was bedütet, dass sie bire begränzte und genau umrissene Ufgab guet zämmeschaffe und zämmepasse, während sie d Söi uf Duur längwilig finge wärde.

[ändere] Bekannti Tiger

• Ludwig van Beethoven (*1770-†1827), dütscha Komponischt in da Romantik (Für Elise, Mondscheinsonate)
• Elizabeth Barrett Browning (*1806-†1861) Änglischi Dichterin (Wie liebe ich dich? Lass mich zählen, auf wie viele Arten und Weisen ich dich liebe …)
• Karl Marx (*1818-†1883) Dütsche Philosoph, politische Journalist (Das Kapital)
• H.G. Wells (*1866-†1946) Änglische Schriftsteuer (Die Zeitmaschine, Der Krieg der Welten, Der heilige Terror)
• Marie Curie (*1867-†1934), französischi Chemikare und Nobelpriisträgerin
• Dwight D. Eisenhower (*1890-†1969) 34. US-Amerikanische Präsidänt Ruefname Ike
• Charles de Gaulle (*1890-†1970) Französische Generau (2. Wäutchrieg) und Präsidändt
• Heinz Rühmann (*1902-†1994), dütscha Film- und bühnenschauschpiela (Die Feuerzangenbowle)
• Königin Elizabeth II. (*1926) gebr. Elizabeth Alexandra Mary Windsor Königin vom Verinigte Britische Königreich (UK)
• Prinzessin Anne (*1950) gebr. Anne Elizabeth Alice Mountbatten-Windsor Tochter vor Königin Elizabeth II.
• Robbie Williams, (*1974) britische Popsänger

[ändere] Was isch in Tigerjohr passiert

• Afang vom Erschta Wältkriag (1914)
• Erschte Kernschpaltung (1938)
• Sendebeginn vo Radio Free Europe (1950)
• Reaktorunfall im Atomkraftwerk Tschernobyl (1986)

[ändere] Literaturnachwis

• Die chinesische Astologie, Roger Elliot, Wilhelm Heyne Verlag München, 1998, ISBN 3-453-03419-8