Jahr des Rindes

Us der alemannische Wikipedia, der freie Dialäkt-Enzyklopedy

Dr "Büffu" als Tierchreiszeiche im Kowloon Walled City Park z Kowloon City, Hong Kong

Dr Büffu (牛 niú) isch eis vode zwöuf Tier im chinesische Kaländer. Büffu oda Rinderjohr (丑 chǒu) si gsi:

• 19. Februar 1901 bis 7. Februar 1902 - Metall
• 6. Februar 1913 bis 25. Jänner 1914 - Wasser
• 25. Jänner 1925 bis 12. Februar 1926 - Holz
• 11. Februar 1937 bis 30. Jänner 1938 - Füür
• 29. Jänner 1949 bis 16. Februar 1950 - Erde
• 15. Februar 1961 bis 4. Februar 1962 - Metall
• 3. Februar 1973 bis 22. Jänner 1974 - Wasser
• 20. Februar 1985 bis 8. Februar 1986 - Holz
• 7. Februar 1997 bis 27. Jänner 1998 - Füür
• 26. Jänner 2009 bis 23. Februar 2010 - Erde

[ändere] Ds Charakterbiud

Ä tribendi Chraft i ihrem Läbe isch ihri Sehnsucht nach Sicherheit, finanzieu, gfüeusmässig - jedi Spiuart vo Sicherheit, wo meh sich numme cha vorsteue. Sie fürchte sich vor dr Einsamkeit, Armuet, Heimatlosigkeit und sie füehle sich am glücklichste, we sie äs paar Läbensversicherige und Pensionverträg i ihrer Täsche und ä nätte, treue und charakterfeschte Ehepartner a ihrer Site wüsse.
We sie sich uf die Wiis im Läbe abgsicheret hei, si sie ä bewunderswürdige, solide und vertouenswürdige Mönsch. Ä Kärl us autem Schrott und Chorn und je äuter sie wärde, desto meh prägt sich das Biud us. Die liebliche Gnüss vom Läbe - Ässe, Trinke, Liebi und ä bequeme Sässu - bedüte ihne viu und im Louf vor Zit wei sie ihres warme Näst gar nümme verloh.
Fasch aui Büffle verspüre ä starche Drang zum Schöpferische; mängisch verwürkliche sie ihn dürne Ufbou vomene Gschäft oder im Rahme vore fruchtbare Ehe, mängisch begäbe sie sich ou ufem Gebiet vor Kunst, male, schribe Büecher und bsungers gärn wände sie sich em Theater zue. Sie lege grosse Wärt druf, ou Chlinigkeite guet ds erledige, doch we sie einisch wüsse, wo ihri Stärchi ligt, neige sie zur Routine und damit zure gwüsse Eisitigkeit.
Ihri Fähler und Schwächine: Trägheit und Langsamkeit, wo bi mängne Büffle d Gsundheit gfährde chöi und ä egoistische Hang zur Gwinnsucht, wo züglet wärde sött. Büffle si gseuig, aber sie verfüege über verborgeni Chraftqueuene, wo sie drzue befähige würde, ou ufere verlohrnige Insle ds überläbe.

[ändere] Ds Büffu-Ching

Dr chli Büffu isch äs robosts, säubstdsfridnigs Ching, wo scho früh drmit afoht, sich vode Eutere unabhänig ds mache. Wemeh ihn i Rueh loht, de blibt är friedlech und wemeh nid auzuviu a ihm umezieht, entwicklet är ä fründliche Charakter. Ide Schueujohr zeigt är äs starchs Inträsse für praktischi Fächer, het aber glichzitig Freud ar Musig, Zeichen und Theaterspiu. Obwou ds Büffu-Ching vo Natur us ziemlich tolerant isch, chas ä Koller übercho, wemes reizt.

[ändere] Dr extrovertiert Büffu

Dir wärdetet entweder zude extrovertierte oder zu de introvertierte Büffle ghöre und wen dir vo beidne öppis i euch träged, so wird die einti Form entscheidend überwiege. We dir ächt extrovertiert sit, wärdet dir ä bsungrig gseuige Mönsch si, wod Seeu vo aune Fescht und Parties, vo Fründe und Bekannte immer mitemene lute Hallo begrüesst. Eui Umwäut wird euch aus grosszügig bezeichen, mängisch ou aus äxtravagant und eui Neigige, angerne Vorschifte ds mache, wird mit lächlendem Wouwöue ertreit.

[ändere] Dr introvertiert Büffu

Dir verfüeget über d Fähigkeit, töif und erschöpfend über grundlegendi Froge vom Läbe nachedsdänke, aber we dir euch säuber zrüggzieht, cha euch ä Minderwärtigkeitskomplex befoh, wo voukomme unbegründet isch.

[ändere] Was Büffle gärn mache

Typischi Sportarte für Büffle: Fuessbau und Rugby, Langstreckelouf, Höline erforsche und Gwicht hebe. Am Büffu bereite reini köperlichi Erschöpfig immer Freud und Befridigung.
Büffu-Hobbbys: Malerei und Biudhouerei, Bastuarbeite, ds eigete Outo versorge und flicke und Börsespekulatione. Viu Büffle erhole sich bi Gartearbeit.
Über Büffu-Bruefe chame numme im augemeine Agabe mache, aber sie schaffe dört am beste und am erfougrichste, wo Sorgfaut, Verstang und Stätigkeit verlangt wärde. Büffle schaffe gärn mit angerne zäme, aber wesi sich für öppis entschide hei, fauts ihne schwär, umdsdänke. Ufem Gebiet vom kunstlerische und vode Finanzbruefe ergäh sich viu Müglichkeite.

[ändere] was zue de Büffle passt

Länder, wo mite Johre vom Büffü öppis ds tüe söue ha, si Irland, Zypere, Palästina, Syrie und Jordanie. Argentinie, Nigeria und Neuseeland si wahrschinlich ou Büffu-Länder. Ou Venezuela chame drzue rächne.
Edusteine und Haubedusteine, wo mitem Büffujohr verbunge si: Moosachat, Smaragd, Koraue, Jade, Alabaster und Lapislazuli.
Fougendi naturwüsseschaftlechi Entdeckige und Entwicklige si i Büffu-Johr gmacht worde: d Härsteuig vo Adrenalin, d Entdeckig vom Chlorophyu, die reini Darsteuig vode Vitamine A, B und B2, Nylonstrümpf, Überschauflugzüg und Motorräder.

[ändere] Zämeläbe mit angerne

So chömme Büffle im Guete und Schlächte mit de Verträter us angerne Johr dsrächt:

• Mit angerne Büffle: ä gueti, zueverlässigi Partnerschaft mit dr Fähigkeit und Neigig, gärn und viu zäme ds lache.
• Mit Rattene: Erträglich, we ihri Flinkheit ou mängisch Verwirrig stiftet. Ihri Fähigkeit, ds Hemli gäge Wind ds hänge, erschint em Büffu oft aus Charakterlosigkeit.
• Mit Tiger: Sie chöi vor Wuet, vor Ufregig und vor Widerwiue über sie choche, aber sie chöi am Zouber vo ihrem Wäse nid wiederstoh.
• Mit Hase: Ä vorzüglechi Kombination, vor auem wens sich um familiäri Bingige handlet, wo de vou Rueh und Usglicheheit si. Bruefleche Partnerschafte fäut dr gmeinsam Atrieb.
• Mit Drachene: Ihri geistigi Verränkige und Sprüng näh dr Büffu ganz gfange, aber wed Meinige ufenang praue, isch kene vo beidne parat, nochedsgäh.
• Mit Schlangene: Bi dere Kombination chas zur ideale Verträglichkeit cho, bsungers zwüsche Ehepartner. Jede het Respäkt vor dr Chraft vom angere, jede gniesst d Gägewart vom angere.
• Mit Röss: Bi aune praktisch Ufgabe äs guets Verhäutnis, wo sich jedoch zitwis dürne vöuige Mangu a Gfüeu oder Sympathie uszeichnet. Gueti Zitgnosse.
• Mit Geisse: Cha ä klassischi Hass-Liebi ergäh. Bestimmti Eigeschafte vode Geiss zieh sie magnetisch ah und angeri Eigeschafte wiederum stosse sie ufs Krassiste ab.
• Mit Affe: Sie si fürd Büffle viu ds grisse und ihri Isteuig zur Wäut und de Mönsche isch ihne ds houtertipouter und liechtfertig.
• Mit Güggle: Cha äbefaus ä usgezeichneti Verbingig si, bsungers ir Liebi. D Beständigkeit und dr Richtum vo ihrem Charakter verschmeuze mit de positive Merkmale vo de Güggle.
• Mit Hüng: We sie sich gägesitig numme aknurre, chömme sie mitenang nid wit. We sie sich jedoch Müeh gäh, chöi si mitde Hüng guet Fründ wärde.
• Mit Söi: Viuversprächendi Chance, wöu sie viu Gmeinsamkeite hei. D Schwirigkeit besteit drin, dass eine uf d Schwächine vom angere Rücksicht näh muess.

[ändere] Bekannti Büffle

• Napoleon I. (*1769-†1821), zersch Konsult uf Lebenszit, schpöta Kaisa vo da Franzosa
• Pierre-Auguste Renoir (*1841-†1919) französische Maler
• Vincent van Gogh (*1853-†1890) Holländische Maler
• Rudyard Kipling (* 1865-†1936) britische Schriftsteuer und Dichter (Das Dschungelbuch)
• Adolf Hitler (*1889-†1945) Dütsche Politiker, Reichskanzler, "Füehrer"
• Charles Chaplin (*1889-†1977) eigentli Charles Spencer Chaplin jr., bekannt aus Charlie Chaplin. Änglische Schouspiler, Komiker, Regisseur, Produzänt (Vagabund/The Tramp, Der Vagabund, Der große Diktator)
• Walt Disney (*1901-†1966) US-Amerikanische Fiumproduzänt (Micky Maus, Bambi, die Wüste lebt, 101 Dalmatiner....)
• Werner Heisenberg (*1901-†1976), dütscha Physika, Mitbegründa vo da Quantenmechanik
• Willy Brandt (1913-†1992) Dütsche Politiker, 4. Bundeskanzler, Friedensnobäupristräger
• Margaret Thatcher (*1925), konsavative britische Politikarin und erschta wiiblicha Premierminischterin
• Peter Sellers (*1925-†1980) britische Schouspiler und Komiker (Ladykillers, Der rosarote Panther (1963), Der rosarote Panther kehrt zurück (1975), Inspektor Clouseau, der „beste“ Mann bei Interpol (1976), Inspector Clouseau – Der irre Flic mit dem heißen Blick (1978), Der rosarote Panther wird gejagt (1982) Dä Fium isch zwöi Johr nach em Peter Sellers sinem Tod unger Verwändig vo bereits vorhangene Fiummateriau ersteut worde.)
• Richard Burton (*1925-†1984) Britische Schouspiler gebr. Richard Walker Jenkins jr. (Der längste Tag, Cleopatra, Die Wildgänse kommen)
• Tony Curtis (*1925) US-Amerikanische Schouspiler, Maler und Künstler (Flucht in Ketten, Das große Rennen rund um die Welt, Der Graf von Monte Christo)
• Anthony Hopkins (*1937), britischa Schauschpiila (Das Schweigen der Lämmer)
• Bruce Springsteen (*1949), US-amerikanischa Sänga

[ändere] Was isch in Büffeljohr passiert

• Aschluss vo Öschtriich as Dritte Riich (1938)
• Drü vo siiba Aschtronauta im Space Shuttle Challenger kummen bim Wiidaitritt in d Erdatmosphäre um.

[ändere] Literaturnachwis

• Die chinesische Astologie, Roger Elliot, Wilhelm Heyne Verlag München, 1998, ISBN 3-453-03419-8