Jahr des Schafs

Us der alemannische Wikipedia, der freie Dialäkt-Enzyklopedy

D "Geiss" als Tierchreiszeiche im Kowloon Walled City Park z Kowloon City, Hong Kong

S Schof (羊 yáng) oder Geiss (未 wèi) isch eis vode zwöuf Tiere im chinesischä Kalenda. Schofjohr/Geissejohr si gsi:

• 13. Februar 1907 bis 1. Februar 1908 - Füür
• 1. Februar 1919 bis 19. Februar 1920 - Erde
• 17. Februar 1931 bis 5. Februar 1932 - Metall
• 5. Februar 1943 bis 24. Jänner 1944 - Wasser
• 24. Jänner 1955 bis 11. Februar 1956 - Holz
• 9. Februar 1967 bis 29. Jänner 1968 - Füür
• 29. Jänner 1979 bis 15. Februar 1980 - Erde
• 15. Februar 1991 bis 3. Februar 1992 - Metall
• 1. Februar 2003 bis 21. Jänner 2004 - Wasser
• 19. Februar 2015 bis 7. Februar 2016 - Holz

[ändere] Ds Charakterbiud

Sie si Mönsche, wo sich fürd Gseuschaft intressiere und ihres höchste Zieu isches, ä erfougriche Gschäftsmaa ds wärde. Aber säubst we ihre Bruef überhoupt nüt mit Handu und Wirtschaft ds tüe het, so si sie ussergwöhnlich ehrgizig und wen sie gar kei Bruef usüebe, so si sie doch besträbt, ihres Läbe praktisch, rationeu und effektiv ds idsrichte.
Das si ihri beste Eigeschafte: Sie wüsse instinktiv, wieme Mönsche behandle muess, wieme zu rasche, klare Entscheidige chunnt, wo vom gsunge Mönscheverstang diktiert worde si, wieme sich ds Läbe am beste irichtet. I ihrer schlimmste Form isch d Geiss ä Stifuabläcker, pingelig, aber beschränkt. Me cha sie nid aus Durchschnittsmönsche bezeichne und sie schine immer meh am Chärn vore Sach intressiert ds si aus a üssere Verzierige. Sie hei ä guete, praktische Verstang und säubst wen sie ä künstlerische Bruef usüebe, so blibe ihri Phantasie ärdverbunge.
Trotz irem Ehrgiz erreiche numme äs paar Geisse Spitzepositione. Irgendeinisch und irgendwo geit dr Atrieb verlore und sie erreiche nie ds höchste Zieu.
Erwisenermasse besitze sie aber Dürehautechraft, we sie die Zähigkeit ou hüfig numme drzue benütze, um sich ä Pansionberächtigung ds erhocke. Churz gseit: sehr abentürlustig si sie nid. Was d gfüeusmässigi Bingig betrifft, so hei sie ä Muur um ihres Härz zoge und äs wird numme sehr wenige ganz bsungerne Mönsche gstattet si, das private Heilligtum ds beträte. Wen sie äuter wärde, verstärkt sich die Hautig no. Sie wärde sträng und unerbittlech und s besteit sogar d Gfahr, dass sie starrchöpfig und verchnöchert wärde.
Trotz audäm verfüege sie immer überne Schatz vo vernünftige Ratschläg und Läbensregle und d Lüt wärde sie wäge ihre Gründsätz achte.

[ändere] Ds Geisse-Ching

Die chline Geiss het ä grossi Fröid a eigete Leistige, sie schätzt Ermuetigunge, aber uf Hiuf leit die kei grosse Wärt. Sie isch villech nid sehr gfüeuvou und überschwänglich, aber we sie sich ersch ämau ane Situation gwöhnt het, so het sies ou gärn, we sie öppis mit angerne Ching zämme cha ungernäh. Ir Schueu muess sie sehr flissig si, sie isch gründlich, aber vorauem am Afang chli langsam. Äs paar dicki Fründe si ihre lieber wie ä ganzi Schar vo lose Bekannte. D Familie bedütet ihre sehr viu. Im Louf vor Entwicklig wot sie ou unabhänig si, aber ir früehe Chindheit brucht sie die unwandubari Sicherheit und ds Gfüeu, behüetet ds wärde.

[ändere] Die extrovertierti Geiss

Aus Geiss ischme entweder extrovertiert oder introvertiert, oder me zeigt d Eigeschafte vo beidne Extreme, wobi me sich immer meh am einte zueneigt. Aus extrovertierti Geiss wärdet dir schnippischi, zünischi und wäutgwandti Ungerhautige schätze. Dir wärdet i Gruppene, Usschüss und Klubs aktiv si, ir Verwautig ä Roue spile wöue oder ehreamtlechi Arbete übernäh. Eurer Umwäut gägeüber gäht dir euch offe und unziert, aber dir sid immer vomene Drang erfüeut, ä Teu vo eurer Persönlichkeit ganz elleini für euch ds reserviere.

[ändere] Die introvertierti Geiss

We dir introvertiert sid - und das trifft uf die meiste Geisse zue -, so dänket dir noche, bevor dir ds Muu uftüet und beobachtet jede Mönsch sorgfäutig, bevor dir mit ihm Fründschaft schliesset. Dir zerbrächet euch insgeheim dr Chopf, was die angere Lüt vo euch dänke.

[ändere] Was Geisse gärn mache

Typischi Geisse-Sportarte: Mannschaftsspili jeglecher Art, Badminton und Tennis, Schwümme, Gymnastik. Geisse-Hobbys wärde meistens dinne usgüebt: Schach- und angeri Brättspieu, Inneirichtige, Bastle, am liebste mit Houz, chli Schriftsteuerei. Wesie sich im freie ufhaute, müesse sich Geisse immer praktisch bestätige, so dass sie säubst am Strand Burge, Wäue und angeri Sangkonstruktione boue müesse.
Die positive Eigeschafte, wo Lüt usde Geissejohre für ihri Bruefe mitbringe: Ä gsunge Mönscheverstang, wo sich ar Erfahrig usrichtet, Takt, Logik und d Fähigkeit ou unagnähmi Entscheidige ds fäue. Geisse si gueti Verwauter, Ingenieure, Stadtplaner, Architekte. Sie chöi angerne sehr guet bir Lösig praktischer Problem häufe, während sie Distanz wahre, wens um Gfüeusproblem geit.

[ändere] Was zude Geisse passt

Länder, wo mitde Johr vor Geiss verbunge si söue, si Dütschland und Schottland, Pole und die ehemaligi Tschechoslowakei, Schwede, dr Irak, [[Laos}} und wahrschinlich ou Kolumbie und Grönland.
D Edusteine und d Haubedusteine, wo öppis mitde Geissejohr ds tüe söue ha, si dr wiss Onyx, dr Mondstei, Jetsteine, Saphire und villech ou Jade.
D Dampfwauzi, langsam aber stetig, isch imene Geissejohr erfunge worde. Die amerikanischi Monroe-Doktrin, wo ade europäische Mächt im 19. Johrhundert befohle het, sich nid id Politik uf dr angere Site vom Atlantik ds imische, charakterisiert dr Geisse-Wunsch, ä ghörigi Distanz zwüsche sich und die übrigi Wäut ds schiebe.

[ändere] Bekannti Geisse

• Christoph Kolumbus (*1451-†1506) italienischä Seefahrer und Entdecker vo Amerika (was aber so gseh nid ganz richtig isch, da d Chinese und ou d Wikinger vorem Kolumbus ds Amerika gsi si.)
• Michelangelo Buonarroti (*1475-†1564) italienische Bildhouer, Maler und Architekt (Sixtinischi Kapäue in Rom)
• Franz Liszt (*1811-†1886) ungarische Komponischt und Pianischt
• Mark Twain (*1835-†1910) US-Amerikanische Schriftschteuer (Tom Sawyer und Huckleberry Finn)
• Thomas Alva Edison (*1847-†1931) US-Amerikanische Erfiger und Ingenieur (zB Glühbire und ds Mikrofon)
• Walter Gropius (*1883-†1969) Dütsche Architeckt und Gründer vom Bouhuus
• Margot Fonteyn (*1919-†1991) Britischi Baletttänzerin (Prima Ballerina Assoluta)
• Leslie Caron (*1931) gebr. Leslie Claire Margaret Caron, französischi Tänzerin und Schouspilerin (Ein Amerikaner in Paris, Der große Wolf ruft, Eine Affäre in Paris)
• Michail Gorbatschow (*1931) Generalsekretär vom Zentralkommitee vor KpdSU, letschtä Präsident vor Sowjetunion
• Janosch (*1931) gebr. Horst Eckert, dütsche Illustrator, Chinderbuechoutor und Schriftsteuer (Die Geschichte von Valek dem Pferd, Post für den Tiger, Morgen kommt der Weihnachtsbär)
• Umberto Eco (*1932), italiänischä Schriftschteuer und Schprochwissenschaftler (Der name der Rose)
• Kurt Cobain (*1967-†1997) US-Amerikanische Sänger (Nirvana)

[ändere] Zämmeläbe mit angerne

So chömme Geisse mit angerne Tierzeiche dsrächt:

• Mit angerne Geisse: Usgezeichnet sowou im Privatläbe aus im Bruef. Jede blibt für sich und glich im Umgang mitem angere fründlich und agnähm.
• Mit Rattene: Unger bestimmte Vorussetzige sehr guet, doch füeut sich die ehrlechi Geiss mängisch vom Charme vor Ratte chli abgstosse. Sie isch uf jedefau dr stercher Partner.
• Mit Büffle: Sie si sich uf viune Gebiete so ähnlich, wie sie sich uf angerne Ungerscheide. D Geiss chad Dickköpfigkeit vom Büffu nid usstoh und dä fingt ihre lammfromme Arbeitsifer unerträglech.
• Mit Tigere: Wenn uf beidne Site gnueg Respäkt vorhande isch, cha das bländed loufe. Sie si aber voukomme verschdeni Type.
• Mit Hase: Zaurichi Überistimmige. Bi Hase chöi sie sich erhole, sie chöi vo ihne inspiriert wärde. Wen sie sich zämmetüe, ergäh sie äs vorzüglechs Team, nüt cha sie trenne.
• Mit Drachene: Für ihre meh traditioneu Gschmack si sie villech ds schnäu und ds origineu. Aber im Grund gnoh möge sie sich gägesitig sehr gärn.
• Mit Schlangene: Wen jede vo beidne parat isch, öppis für die Verbingig ds mache, so cha sie sehr erfougrich wärde. Wenme sie eifach loufe loht, wärde Problem entstoh.
• Mit Affe: Niemer cha bhoupte, dass sie sich ähnlech si, aber mitemne erwachsene und grifte Aff chas trotzdäm geistigi und emotionali Überistimmige gäh.
• Mit Güggle: Äs wird zersch ä Kampf gäh, wär vo beidne d Füehrig übernimmt. Drüber use si jedoch zaurichi gägesitigi Aziehigspünkt vorhande.
• Mit Hüng: Normali Hung jage gärn Geisse, während sich die mönschleche Hüng de Geisse i auer Seelerueh ungerordne und zfride die zwöiti Gige spile. Äs fridlechs Familiemodäu.
• Mit Söi: Das isch i gwüssem Sinn die besti Konstellation. Söi steue kei Asprüch a sie, während sie uf geistigem Geibiet bsungers harmonisch mit ihne überistimme.

[ändere] Literaturnachwis

• Die chinesische Astologie, Roger Elliot, Wilhelm Heyne Verlag München, 1998, ISBN 3-453-03419-8