Jahr des Hundes

Us der alemannische Wikipedia, der freie Dialäkt-Enzyklopedy

Dr "Hung" als Tierchreiszeiche im Kowloon Walled City Park z Kowloon City, Hong Kong

Dr Hung (狗 gŏu) isch eis vode zwöuf Tier im chinesische Kaländer. Hundejohr (戌 xū) si gsi:

• 10. Februar 1910 bis 29. Januar 1911 - Metall
• 28. Januar 1922 bis 15. Februar 1923 - Wasser
• 14. Februar 1934 bis 3. Februar 1935 - Holz
• 2. Februar 1946 bis 21. Januar 1947 - Füür
• 18. Februar 1958 bis 7. Februar 1959 - Erde
• 6. Februar 1970 bis 26. Januar 1971 - Metall
• 25. Januar 1982 bis 12. Februar 1983 - Wasser
• 10. Februar 1994 bis 30. Januar 1995 - Holz
• 29. Januar 2006 bis 17. Februar 2007 - Füür
• 16. Februar 2018 bis 4. Februar 2019 - Erde

[ändere] Ds Charakterbiud

Aus Füehrer chöi sie schitere, drfür si sie dr gebornig zwöit Ma: Treu, zueverlässig, gründlich ir Arbeit, grossmüetig ir Beurteilig vo angerne. Äs steckt ä Bedächtigkeit i ihne, wo angeri aus Ängstirnigkeit oder Beschränktheit bezeichne wärde, aber sie si sicher ir Asicht, dassäs besser isch, sini Gränzene ds kenne, statt sich i Wagnissä idsloh. Sie hei Sinn für trochene, lise und liebenswürdige Humor. Ihri gsamti Hautig angerer Mönsche gägeüber wird dür gedudigi Fürsorg und unerschütterlicher Beständigkeit uszeichnet. Gfüeususbrüch lige ihne gar nid, was sich mängisch aus unagnähm usesteut, de sie wüsse nid, was sie mit ihrne Gfüeusüberschüss afoh söue; sie blibe i ihne stecke und quäle sie. Aus Fründ - und eigentlech verhaute sie sich aune Mönsche gägeüber fründschaftlich - si sie so zueverlässig und gmüetlech wiene guet ighockte Lähnstueu. D Johr vom Hung entspräche dä Hundstage im Summer: Äs si längi, gmachlechi und meistens konservativi Periodene ir Gschicht, i dene sich dr Zitgeist lieber uf die gueti auti Zit aus uf die radikale Gedanke grichtet het. Uf fasch unuffäuiger Art und Wiis ordne sich d Ding und füege sich i, so wies sich ä Hung i sire Egge gmüetlech macht, wen är ischlofe wot. Ihri grossi Stärchi isch ds Gfüeu vor Zueverlässlichkeit, wo sie usstrahle, bsungers wen sie die mittlere Johre überschritte hei. Angeri Mönsche finges agnähm, mit ihne zämmedsläbe. Sie si ds Pousterchüssi, wo schinbar so müehlos aui Püff und Schläg uffoht.

[ändere] Ds Hunde-Ching

Dr chli Hung cha mängisch chum bis zur eigete Nasespitz luege, aber dr beschränkt, wouvertrout Ablick sire Auttagsumgäbig bedütet ihm die ganzi Wäut. Är isch nid sonderlich abentürlustig, isch gärn barat, sich vo erfahrene Lüt belehre ds loh, loht sich gärn knuddle und verwöhne und üebt aues so lang, bis ärs würklech cha.

[ändere] Dr extrovertiert Hung

Entweder ischmeh ä extrovertierte oder ä introvertierte Hung, oder meh fingt beidi Eigeschafte i sich vereint, wobi meistens die einti erhäblich überwiegt. Wen dir ä extrovertiert Hung sid, gniesste dir d Gseuschaft vo angerne Mönsche, dir loset ihne zue und nämet a ihrne Problem Ateu, belästigt sie aber nid auzufescht mit eune eigete Problemä. Dir sid begierig, dr Wäut ds bewise, was dir ds leiste vermöget, obglich dir eigentlich nid sehr ehrgitzig sid, und dir gäht euch eher mitemne nätte, gmüetleche Mittumass dsfride, aus dasses unbedingt die höchsti Spitze si muess.

[ändere] Dr introvertiert Hung

Sie wei am liebste müglechst viu Zit mit sich alei verbringe. Sie si sich ihres Platzes ir Wäut nid sehr sicher und bruche ziemlech viu Ermunterige und Zuespruch vo angerne, bevor sie ä füehrendi Roue inere Gmeinschaft übernäh chöi. Ou sie si fründlech, aber nid so sehr wie dr extrovertiert Hung uf Gseuschaft agwise.

[ändere] Was Hüng gärn mache

Typeschi Hunde-Sportarte si Sägle, Gwichthebe, Witsprung, Seilizieh. De Hüng machts Spass, sich im Kreis vo Fründe ds vergnüege und sie hei nüt gäge Wettbewärb, wen är nid ds asträngend wird. Hunde-Hobbys erstrecke sich überne länge Zitrum, drmit sie vou zur Entfautig cho chöi: Gartearbeit, kuntvoui Konstruktione us Metau, risigi Wangteppichä oder Stickereie, umfassendi innearchitektonischi Veränderige, wo ds Hus unger Umstäng monatelang ine Bouplatz verwandle. Wen Möbu oder Wäng gstriche wärde müesse, maches Hüng nid unger drü Astrichä. Sie si sehr gründlechi Nature, säubst bim Spiu. D Eigeschafte, wod Mönsche vode Hundejohr i ihrem Bruef zum Erfoug verhäufe, si ä gmütlechi Gedueud, Organisationstalänt und d Fähigkeit, Sache und Zuestäng so ds erhaute, wie sie si. Sie chöi sich fasch jedi Arbeit zuemuete, für die meh nid auzuviu Genialität bsitze muess, aber sie wärde angerersits vo ihrer Umgäbig hüfig ungerschätzt.

[ändere] Was zude Hüng passt

Länder, wo mitde Johre vom Hung i Verbingig brunge wärde, si ä sonderbari Mischig: Luxemburg und Malta, Costa Rica und Guayana, Angola, Guinea und Korea. D Edusteine und Haubedusteine, wo öppis mitde Hundejohre ds tüe ha söue, si rosa Bärnstei, Hyazinth, Achat, Mondstei und Karneol.

[ändere] Bekannti Hüng

• Winston Churchill (*1874-†1965) genaue Titu und Name: Sir Winston Leonard Spencer Churchill, britischä Premier- und Verteidigungsminischter im Zwöitä Wäutchrieg
• William Somerset Maugham (*1874-†1965) änglische Schriftsteuer, Dramatiker, Arzt und Gheimagänt (Der Magier, Auf Messers Schneide, Books and You : Eine kleine persönliche Geschichte der Weltliteratur)
• Gilbert Keith Chesterton (*1874-†1936) änglische Buechoutor und Journalist (Der geheimnisvolle Klub, Der Dichter und die Verrückten. Episoden aus dem Leben von Gabriel Gale, The Paradoxes of Mr. Pond)
• Ava Gardner (*1922-†1990) gebr. Ava Lavinia Gardner, US-amerikanischi Schouspilerin (Die Ritter der Tafelrunde, Hexensabbat, Rebell der Wüste)
• Sophia Loren (*1934) gebr. Sofia Villani Scicolone, italiänischi Schouspilerin (Hausboot, El Cid, Nine)
• Elvis Presley (*1935-†1977), US-amerikanische Rocksänger
• Bill Clinton (*1946) gebr. William Jefferson Blythe III., US-amerikanische Politiker und 42. Presidänt vor USA
• Oliver Stone (*1946) gebr. William Oliver Stone, US-amerikanische Regisseur, Dräibuechoutor und Produzänt (Alexander, Platoon, W. – Ein missverstandenes Leben)
• Candice Bergen (*1946) US-amerikanischi Schouspilerin (Kanonenboot am Yangtse-Kiang, Gandhi, 2010 – Das Jahr, in dem wir Kontakt aufnehmen, Bride Wars - Beste Feindinnen)
• David Bowie (*1947) burg. David Robert Heyward-Jones, britischä Musiker, Sänger, Produzänt, Schouspiler und Maler
• Madonna (*1958) gebr. Madonna Louise Ciccone, nach dr Komunion: Madonna Louise Veronica Ciccone, US-amerikanischi Sängerin, Schouspilerin, Tänzerin, Buechoutorin, Fiumregisseurin, Modell und Designerin (Evita, 4 Minuts)
• Kevin Bacon (*1958) gebr. Kevin Norwood Bacon, US-amerikanische Schouspiler (Footloose, Ein Ticket für Zwei, JFK – Tatort Dallas, Taking Chance)

[ändere] Zämmeläbe mit angerne

So harmonisch oder konfliktbelade läbe d Hüng mitde Verträter angerer Tierjohr:

• Mit angerne Hüng: Hüng begrüesse ä Artgnoss gärn uf die authärbrungeni Art, tusche Neuigkeite us, loufe äs Stück gmeinsam, schlofe gmüetlech zäme. Do mas mängi Entsprächige gäh.
• Mit Rattene: Ihre Charme cha ihne mängisch ds viu wärde, aber sie si beidi fridlechi Lüt, wo nüt angers aus äs ruigs Läbe füehre wei und darum schaffe sies ir Regu ou sehr guet, gmeinsami Ufgabe ds erledige.
• Mit Büffle: Einigi Ähnlechkeite, cha aber ä ziemlich reizlosi Verbingig wärde, i dere nüt chnisteret und keine am angere öppis würklech intressants ds biete het.
• Mit Tigere: Wen keine versuecht, vom angere Besitz ds ergriffe, chas zure blüehende Verbingig cho. Sie si sehr verschide und darum zieh sie sich heftig a.
• Mit Hase: I jeder Beziehig sehr guet, wöu beidi dra intressiert si, zämmedsblibe. Äs cha jedoch Gfahr bestoh, dass sie äs längwiligs Paar wärde.
• Mit Drachene: Ä ächti Hass-Liebi. Mängisch si sie so unwiderstehlech rizvou, mängisch so unusstehlichi Besserwüsser.
• Mit Schlangene: Ihri Läbenasichte si intensiver, aber eisitiger aus ihri, wen sie jedoch ä Schlange liebe, so hautet die Zueneigig zu ihm oder ihre äs ganzes Läbe lang a.
• Mit Röss: Zaurichi Entsprächige und Verträglichkeite. Das isch vermuetlich die besti Kombination vom ganze Tierkreis.
• Mit Geisse: Äbefaus rächt guet, äs cha jedoch passiere, dass sie sich beidi ändlos dr Chopf über Problem zerbräche, wo äs angers Tier im Nu glöst ha würd.
• Mit Söi: Söi reize und necke sie, während sie ihne glichzitig ufd Närve göh, aber wen sie die Schwirigkeite ersch mau überwunde hei, chöi sie zure ächte und härzleche Verbingig cho.

[ändere] Literaturnachwis

• Die chinesische Astologie, Roger Elliot, Wilhelm Heyne Verlag München, 1998, ISBN 3-453-03419-8