Ignazio Cassis
.jpg)
De Ignazio Cassis (* 13. April 1961 z Sessa; heimatberächtigt z Biasca und z Sessa) isch en Schwizer Politiker (FDP) us em Tessin. Sit em 1. November 2017 isch er Bundesrot und Vorsteher vom Eidgenössische Departemänt für usswärtegi Aaglägehaite (EDA).
Läbe
[ändere | Quälltäxt bearbeite]Bi sinnere Geburt hät de Ignazio Cassis di italienischi Staatsaaghörigkait vo sim Vater gha. Im 1976 isch er i de Schwiz iibürgered worde und und hät doozmol de italienisch Pass müese abgee. Spöter isch er schwizerisch-italienische Doppelbürger worde, wa ab 1992 rächtlich mögli worden isch. Im Zämehang mit de Kandidatur för d Bundesrotswahl 2017 hät er dänn uf di italienisch Staatsbürgerschaft verzichtet.[1]
De Cassis hät a de Uni Züri Medizin gstudiert (Arztdiplom 1987), sich för Inneri Medizin und Volksgsundhait spezialisiert (Master i Public Health 1996).[2] 1998 isch er bim Fred Paccaud a de Uni Lausanne zum Dr. med. promoviert.[3] Vo 1996 bis 2008 isch er Tessiner Kantonsarzt gsi.[2] Er isch vo 2008 bis 2012 Vizepräsident vo de Schwizer Ärztevereinigung FMH gsi.[4] Im Militär isch er, noch de Gebirgsinfanterii-Rekruteschuel als Trompeter, wäge sim Medizinstudium Bataillonsarzt (Major) im Stab vom Tessiner Gebirgsschützebataillon 9 worde, und nochhär isch er im Stab vom Oberfeldarzt tätig gsi.[5]
De Ignazio Cassis wohnt z Montagnola und isch ghürote.
Politik
[ändere | Quälltäxt bearbeite]De Ingnazio Cassis isch vo 2004 bis 2014 Gmaindrot z Collina d’Oro gsi. Er isch bi de Nationalrotswahle 2007 i de Nationalrot gwählt worde. Döt isch er under anderem Mitgliid vo de Kommission för Soziali Sicherhait und Gsundhait gsi. Im Nationalrot sind füüf vo sine Mozione aagnoo worde. Er isch im 2011 und 2015 widergwählt worde und chorz drufabe in ere Kampfwahl gege de Christian Wasserfallen zum Frakzionspräsident vo de FDP-Bundeshuusfrakzion gwählt worde.[6]
De Cassis isch Präsident vom Haim-Verband Curaviva, vo de Equam-Stiftig, wo d Qualität vo de Huusarzt-Praxe fördered und vo de Gsundhaitsstiftig Radix.[7] Witer isch er Mitgliid vom ehrenamtliche Stiftigsrot vo FAIRMED.[8]
Noch de Aakündigung vom Bundesrot Didier Burkhalter, er weli uf Endi Oktober 2017 zruggträtte, isch de Cassis am 20. September vom gliiche Johr vo de verainigte Bundesversammlig in Bundesrot gwählt worde. Er hät under de drü Kandidate, wo zwee devo us em Wälsche cho sind (d Isabelle Moret, Nazionalröti us em Kanton Waadt und de Pierre Maudet, Regierigsrot im Kanton Gämf), as ussichtsrichschte Kandidat golte, wil s Tessin sit em Flavio Cotti, aso scho sit 18 Johr, känn Bundesrot me ka hät.[9]
Weblink
[ändere | Quälltäxt bearbeite]
Commons: Ignazio Cassis – Sammlig vo Multimediadateie- Porträt uf de Website vom EDA
- Ignazio Cassis uf dr Websyte vo dr Bundesversammlig
- d Website vom Ignazio Cassis
Fuessnote
[ändere | Quälltäxt bearbeite]- ↑ Cassis gibt italienischen Pass zurück Artikel im Tagi vom 25. Augschte 2017
- ↑ 2,0 2,1 Ignazio Cassis. Archiviert vom Original am 18. Juni 2011; abgruefen am 20. September 2017. uf fmh.ch
- ↑ Titelufnahm vo de Dissertation, Katalog vom Bibliotheksverbund Renouvaud, abgruefe am 20. September 2017
- ↑ Legislatur 2012–2016: Erneuerung im Zentralvorstand (Memento vom 26. Augschte 2017 im Internet Archive) (PDF; 61 kB) Mediemitteilig vo de FMH vom 26. November 2011
- ↑ Bekenntnis zur Armee Artikel im Schweizer Soldat vom September 2017, S. 7, gfunde uf ignaziocassis.ch
- ↑ FDP-Fraktionschef: Wasserfallen oder Cassis? (Memento vom 1. Septämber 2017 im Internet Archive) Artikel im Tages-Aazaiger vom 11. November 2015
- ↑ Der «Kranken-Cassis» und Morets «problematische» Rüstungs-Lobby uf watson.ch vom 7. Augschte 2017
- ↑ Über uns → Stiftungsrat uf de Website vo FAIRMED
- ↑ Fast alles spricht für Ignazio Cassis (Memento vom 26. Augschte 2017 im Internet Archive) Artikel im Tagi vom 15. Juni 2017
| Vorgänger Didier Burkhalter |
Mitgliid im Schwiizer Bundesrat sit 2017 |
Nochfolger — |
|
Dä Artikel basiert uff ere fräie Übersetzig vu dere Version vum Artikel „Ignazio_Cassis“ vu de tüütsche Wikipedia. E Liste vu de Autore un Versione isch do z finde. |