Uncilin

Dr Uncilin (lat. Uncelenus, † 613) isch en alamannische Herzog vun 588 bis 607 gsi.

587 het dr austrasisch Kini Childebert II. de Alamanneherzog Leutfred I. abgsetzt un de Uncilin zu siinem Nochfolger bstimmt. Nochm Tod vum Childebert II. 595 sin dr Thurgau, dr Kembsgau un s Elsass an Burgund gonge un dr Uncilin domit unter d frankoburgundisch Oberhoheit vun Kini Theuderich II. cho. 605 het dr Uncilin im Heer vum Theuderich II. gege de Brueder vum Theuderich Theudebert II. kämpft. Vermuetli im gliiche Johr (oder 606) het de Uncilin de burgundische Husmeier Protadius umbringe lo. Us Rache fir d Ermordung vum Prodadius het d Kinigin Brunichild 607 em Uncilin e Fuess abschloge lo, er isch dodurch als Herzog omtsunfähig wore. Nochem Lex Alamannorum, em alamannische Rechtsbuech, isch e Herzog numme den omtsfähig, wenn er selber uf e Ross kon stiige. Er isch entaignet wore und i nidrigi Dienscht gstellt worde.

Literatur

• Thorsten Fischer: Uncelen. In: Reallexikon der Germanischen Altertumskunde (RGA). 2. Auflage. Band 31, Walter de Gruyter, Berlin / New York 2006, ISBN 3-11-018386-2, S. 433 f.
• Karlheinz Fuchs, Martin Kempa, Rainer Redies: Die Alamannen (Ausstellungskatalog). Verlag Theiß, Stuttgart 2001, ISBN 3806215359.
• Dieter Geuenich: Geschichte der Alemannen. Verlag Kohlhammer, Stuttgart 2004, ISBN 3170182277 / ISBN 3170120956.

Weblink

• Mittelalter Genealogie: Herzog Uncilin