Protadius
| Protadius | |
|---|---|
| Huusmeier vo Burgund | |
| Regierigsziit | 604-606 |
| Gstorbe | 606 |
| Dodesort | Quierzy-sur-Oise |
| Vorgänger | Berthoald |
| Nochfolger | Claudius |
Dr Protadius († 606) isch Huusmeier vo Burgund am Afang vom siibte Johrhundert gsi.
Läbe
[ändere | Quälltäxt bearbeite]Dr Protadius isch dr Liebhaber vo dr Grossmueter vom burgundische König Theuderich II. gsi, wo denn no d Regäntin für ihr Änkelchind gsi isch. Sie het alles gmacht für zum im Protadius d Ländereie vom Herzog Wandalmar, wo 604 gstorbe isch, z verschaffe und für zum dr Protadius zum Huusmeier z erhebe, het si dr burgundisch Huusmeier Berthoald uf e Mission gschiggt, won er wohrschiinlig wurd umcho drbii. So isch dr Berthoald mit nume dreihundert Manne von ere Armee vom Chlothar III. vo Neustrie agriffe worde und er het chönne noch Orléans flüchte, bis dass dr Theuderich mit ere Armee isch cho iigriffe, wil dr Agriff vo de Neustrier gege d Bedingige im Friidensverdrag zwüsche de beide Riich gsi isch. Dr Berthoald isch im Kampf gege d Neustrier under em Huusmeier Landrich und em Chlothar III. sim Sohn Merowech gfalle, und dr Protadius isch 604 Huusmeier vo Burgund worde.
Dr burgundisch Chronist Fredegar het dänggt, ass dr Protadius zwar d Fähigkeite vo siim Vorgänger gha haig, aber nit siini Tugende. Er isch missdrauisch gegenüber de Adlige gsi und het as e gruusame Erprässer gulte. Si Liebhabere, d Brunhilde, het dr Theuderich drzue brocht, gege ihre andere Änkelsohn, dr Theudebert II. vo Austrasie Chrieg z mache. As dr burgundisch Huusmeier hät dr Protadius d Armee sötte afüehre. Dr Theuderich het 606 si Armee z Quierzy-sur-Oise zsämmezoge, aber d Manne hai nit gege ihri Landslüt welle kämpfe. Dr Herzog vo Alemannie, de Uncelen het behauptet, ass dr König dr Dod vom Protadius befohle haig. D Chrieger hai druff dr Protadius umbrocht und dr Theuderich het sich mit däm müesse abfinde und e Verdrag underschriibe.
| Vorgänger Berthoald |
Huusmeier vo Burgund 604-606 |
Nochfolger Claudius |