König

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Heraldischi Königschrone

E König isch s Staatsoberhaupt vom ene Königriich. Er verkörperet si Staat und het, je noch dr Staatsform, mehr oder weniger mit em Regiere sälber z due. Symbol vo siim Amt si d Chrone und s Zepter, wo uf eini vo de ursprünglige Ufgobe vom ene König hiiwiise, die vom Chrieger, wo siis Land verdeidigt. Historisch het er siis Amt aadrätte, wenn er krönt worden isch, in de meiste modärne Monarchie zieht me hüte die eifacheri Inthronisierig vor. Bi dr Chrönig, je noch dr Dradition, setzt er sich sälber d Chrone uf oder wird vom ene Verdräter vo dr Staatsreligion krönt. D Salbig mit heiligem Öl cha au Deil vo dr Chrönigszeremonii si.

In dr Rangornig vo dr internationale Diplomatii stöhn König grad under de Kaiser. Em wiiblige Pendant vom König sait me Königin, e Begriff, wo ehrehalber au für d Frau vom ene regierende König bruucht wird. Manne vo regierende Königinne bechömme im Allgemeine Titel wie Brinz.

Sprochligs[ändere | Quälltäxt bearbeite]

S Wort "König" chunnt us em Germanische (kuningaz) über s althochdütsche kuning und s middelhochdütsche künic. In de romanische Sproche wird dr equivalänt Titel vom latiinische rex abgleitet. D Slawe leite ihri Herrschertitel vo de Näme vom Karl em Grosse und em Julius Cäsar ab. In andere Sproche git me em Dräger vo dere Funktion Titel wie lugal (Sumerisch), melech (Hebräisch), basileus (Griechisch), malik (Arabisch), raja (Sanskrit). Für e König vom Alte Ägypte brucht me hüte s Wort Pharao, wo sich dank dr Bible in ähnliger Form in alle europäische Sproche iiheimisch gmacht het.