Schloss Brattele

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
p3
Schloss Brattele
Schloss Brattele

Schloss Brattele

Entstehigsziit: 1275
Erhaltigszuestand: erhalte
Ort: Brattele
Geografischi Lag 47° 31′ 6,8″ N, 7° 41′ 42,8″ O47.5185484222227.6952147472222Koordinaten: 47° 31′ 6,8″ N, 7° 41′ 42,8″ O; CH1903: 619327 / 263121
Schloss Brattele (Schweiz)
Schloss Brattele
Dialäkt: Baseldütsch

S Schloss Brattele isch en ehemoligs Weiherschloss im Zentrum vo der Baselbieter Gmeind Brattele. Ursprünglig isch s Schloss elei am nördlige Rand vom Dorfchärn gläge. Hüt stoht s zmidzt in ere Überbauig us em 19. Johrhundert.

Beschriibig[ändere | Quälltäxt bearbeite]

S Schloss het e quadratische Grundriss mit abgrundete Egge, ergänzt mit eme Durm und ere Doraalag uf dr Südsiite, und ere Chuchiaalag uf dr Ostsiite. Öbbe d Helfti vo der Grundflechi nimmt s vierstöckige Hauptgebäud ii, wo uf dr Ostsiite lit, dr Räst isch en Innehof, wo vo zwei Näbedräkt uf dr Nord- und dr Südsiite und ere Muure uf dr Westsiite begränzt isch.

Die üsseri Fassade isch gwiissget. Der oberi Deil vom Iigangsdor isch as Fachwärk baut, grad wie d Innesiite vo de Näbeträkt und Deil vo dr Fassade vom Chuchiaabau. An dr Doraalag isch früehner e Ziehbrugg agmacht gsi. Dr Hauptbau het am üssere Rand zwei rundi Eggedürm und e Chrüppelwalmdach. E Durm, wo näbe dr Doraalag stoht, verbindet dr Hauptbau mit em südlige Drakt. Währed dr Durm am undere Deil no rund isch, het dr oberi Deil e polygone Grundriss.

Gschicht[ändere | Quälltäxt bearbeite]

S Schloss Brattele vo Norde und Südoste uf ere Fäderzeichnig vom G. F. Meyer us em Johr 1678.

1275 isch s Schloss vo de Herre vo Eptige baut worde, im gliiche Johr wie d Burg Madle. Bim Basler Ärdbebe isch s Schloss am 18. Oktober 1356 komplett zerstört worde. Churz druf hai s d Eptiger widerufbaut. Wäge Gäldnöt und Striitereie under de Eptiger, het 1521 dr Hans Friedrich vo Eptige s Schloss mit em Dorf Brattele für 5000 Gulde an d Stadt Basel verchauft. Nochdäm 1549 Östriich uf d Herrschaft Brattele verzichtet het, isch s Schloss e Basler Herresitz und dr Münchesteiner Landvogtei zuedeilt worde. Dr Schlossherr isch vo denn aa e private "Landedelmaa" ohni hoheitligi Befuegniss gsi. D Bsitzer vom Schloss si Basler Bürger gsi, wo öfters gwächslet hai. 1773 isch s Schloss und si grosse Grundbsitz an die öffentligi Hand gfalle. D Gmeind het s allerdings im nechste Johr parzellewiise ihre Iiwohner verchauft, het aber s Schloss bhalte und en Armehuus drus gmacht.

1910 het d Bürgergmeind vo Brattele s Schloss dr Iiwohnergmeind gschänggt, und die het am 24. Juni 1963 an dr Gmeindiversammlig e Totalrenovation beschlosse für 1'100'000 Franke. Am 8. September 1968 isch s Schloss mit eme grosse Fest wider igeweiht worde. Es stoht hüt under em Schutz vo der Eidgenosseschaft.

Weblingg[ändere | Quälltäxt bearbeite]



Information icon.svg Dä Artikel basiert uff ere fräie Übersetzig vum Artikel „Schloss_Pratteln“ vu de dütsche Wikipedia.

E Liste vu de Autore un Versione isch do z finde.