Ruine Rifestei

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Dialäkt: Baseldytsch
Ruine Rifestei
Ruine Rifestei

Ruine Rifestei

Entstehigsziit: öbbe 1200
Burgetyp: Höchiburg
Erhaltigszuestand: Ruine
Ort: Reigetschwyl
Geografischi Lag 47° 24′ 3″ N, 7° 42′ 5,5″ O47.400827.701541620Koordinaten: 47° 24′ 3″ N, 7° 42′ 5,5″ O; CH1903: 619847 / 250033
Höchi: 620 m ü. M.
Ruine Rifestei (Schweiz)
Ruine Rifestei

D Ruine Rifestei isch e Ruine in dr Nöchi vo Reigetschwyl im Bezirk Waldeburg im Kanton Basel-Landschaft in dr Schwiz.

Lag[ändere | Quälltäxt bearbeite]

D Ruine lit zwüsche Reigoldswil und Titterte, uf eme Felsvorsprung.

Ahlag[ändere | Quälltäxt bearbeite]

D Ruine wird durch d Form vom Felse in drei Teil unterteilt: dr Wohnturm uf der Felsspitze, e ummuurti Terrasse im Osten und überbauti Felsschlünd im Weste. Ursprünglich hetts bim Ihgang vom Gegehang us e Brugg über e vorglagerte Felszacke gha, wo dr Zuegang zur Burg ermöglicht hett. E Sag vrzählt, dass einisch binere Belagerig die ahgrifende Kriegslüt so zahlrich über d Brugg gstürmt sin, dass si unter dr grosse Last zämmebroche isch. Wenn me dur s Tor goht, chunt me uf die ummuuerti Terrasse. D Muure folgt dr unregelmässige Linie vo dr Felskante. Im tiefer glegene südliche Teil vo dr Terrasse isch wahrschinlich e Zisterne gsi. Do isch die originali Muure fast komplett zerstört und das, wo me hütt no gseht, isch künstlich ufgmuuret worde. Ganz neu isch dr Ufstiig uf e Wohnturm vo do us. Ursprünglich hets an dere Stell nur e Verbindig zu de überbaute Felsschlünd geh. Dr schmali Weg het über e ufgmuureti Rampe um d Felsnase umme und nit über e Brugg gfiert. Uf de überbaute Felsschlünd findet me an de Felswänd usgmeisselti Balkelager und verschideni Muureteili, wo vom ene überdachte hölzerne Gebäudekomplex stamme.

Vo do us hett me ursprünglich au über e Stäge dr Wohnturm beträte chönne. Dr Turm bildet e unregelmässigs Viereck mit emä Durchmesser vo 11 bis 16 Meter und wird von ere 2 Meter dicke Muure umgäh. Dr Ihgang in Turm isch uf dr gegenüber ligende Site vom hüttige Ihgang gsi. Für d Muure vom Turm sin viili grossi und unbearbeiteti Stei verwendet worde. Uf em Turm hets e Holzkonstruktion mit öppe drei Obergschoss und emä Holzdach gha.

Gschicht[ändere | Quälltäxt bearbeite]

D Gschicht vo dr Burg isch no sehr unklar. D Usgrabige sin nonig fertiggstellt und werde vorläufig au nit witer gefiert. D Bodefund, wo me bis jetzt het, belege e Nutzig vo dr Burg zwüsche 1200 und 1350. In de schriftliche Überliiferige wird d Burg üsserst selte erwähnt. Das loht vermuete, dass dr Burgherr nur wenig Land bsässe hett und nit sehr ihflussrich gsi isch.

Dr Zerfall vo dr Burg[ändere | Quälltäxt bearbeite]

Über e Untergang vo de Herre vo Rifestei gits nur Vermuetige. Eini seit, das dr Ritter vo dr Burg vom ene Chrüzzug nüm heichoh isch. In dr Folg isch s Gschlecht usgestorbe und dodermit isch d Burg leer gstande.

E anderi Möglichkeit isch, dass d Burg bim grosse Ärdbebe 1356 zerstört worde isch. S eine schliesst s andere jedoch au nit us.

Weblink[ändere | Quälltäxt bearbeite]

 Commons: Ruine Rifestei – Sammlig vo Multimediadateie