Repower AG

D Repower AG isch es Undernääme, wo in dr Schwiiz und im Ussland tuet elektrischi Energy härstelle und verchaufe.

Gschicht

D Firma het bis ane 2010 Rätia Energie AG ghäisse. Dr Hauptsitz isch z Poschiavo im Kanton Graubünde. D Firmegschicht het do agfange, wo ane 1904 d Kraftwerke Brusio AG ggründet worden isch. Die het im Puschlav s Chraftwärch Campocologno bout.

Im Joor 2000 händ d Chraftwärch Brusio sech mit de Firmene Bündner Kraftwerke z Chlooschtersch und Rhätische Werke für Elektrizität AG z Thusis zämetoo und die drüü sind gmäinsam d Rätia Energy worde. Ane 2004 isch au no d aurax ag z Ilanz derzuechoo. Dr gröscht Aktionäär vo dr Repower isch s Elektrizitätswärch vom Kanton Züri, dr zwäitgröscht dr Kanton Graubünde.

S Undernäme gschäftet usser em Bünderland au z Italie, wo s de Chunde au tuet Ärdgas verchaufe, z Dütschland, i dr Tschechei und z Rumänie. Das Gebiet im Bünderland, wo d Repower de Stroomchunde diräkt Energy tuet lifere, isch im Engadin, im Prättigau, im Rhyntel (d Gmainde Zizers, Landquart und Malans) und i dr Surselva.

Chraftwärch

D Chraftwärch vo dr Repower sind:

• Chraftwärch Madulain, Engadin
• Chraftwärch Silvaplana
• Chraftwärch Morteratsch, Pontresina, Engadin (s eltischte Chraftwärch vo de repower; bout ane 1890; 2015-2017 Nöibou)
• Chraftwärch Chloschters (dr Davosersee als Wasserresärve)
• Chraftwärch Schlappin
• Chraftwärch Küblis
• Chraftwärch Taschinas
• Chraftwärch Igiser Mülibach, Landquart
• Chraftwärch Robbia, Poschiavo (dr Lago Bianco uf em Berninapass als Wasserresärve)
• Chraftwärch Palü
• Chraftwärch Cavaglia, Puschlav
• Chrfatwärch Campocologno 1
• Chraftwärch Campocolongo 2
• Chraftwärch Lunschania, Vals
• Chraftwärch Ferrera
• Chraftwärch Truns, Surselva
• Chraftwärch Ladral, Walteschburg, Surselva
• Gas-Kombichraftwärch Teverola, Italie
• Windpark Corleto Perticara, Italie
• Windpark Lucera, Italie
• Windpark Prettin, Dütschland
• Windpark Lübbenau, Land Brandeburg, Dütschland

Weblink

• Website vo dr Repower AG