Riichenau GR
| S GR im Lemma isch s offiziell Chürzel vom Kanton Graubünde und wird bruucht, zum Verwächslige mit Yträäg vom Name Riichenau vermyde, wo öppis anders meined. |
| Riichenau | ||
|---|---|---|
| Basisdate | ||
| Staat: | Schwiiz | |
| Kanton: | Graubünde (GR) | |
| Region: | Imboden | |
| Gmeind: | Tamins | |
| Poschtleitzahl: | 7015 | |
| Koordinate: | 750325 / 187839 | |
| Höchi: | 604 m ü. M. | |
| Website: | www.tamins.ch | |
| Charte | ||
| ||
Riichenau isch es Dorf im Bündnerland i dr Schwiiz, wo zu dr Gmeind Tamins ghört.
Dä geografisch Ort isch e wichtigi Stell im Flusssischteem vom Rhy. Di chlyni Ortschaft Riichenau ligt dört, wo sech dr Vorderrhy und dr Hinderrhy träffe und zäme dr Alperhy bilde; dä flüsst den vo dört wyter bis zum Bodesee. Di beide Kwellflüss vom Rhy bringe meischtens Wasser mid ganz andere Farbe bis uf Riichenau, wo sech den dört langsam vermischt.
Uf emene Hügel näbe de Flüss ligt s Schloss Riichenau. Grad bim Schloss zue hed s vier Brügge über d Flüss, und mid dene isch Riichenau sid Joorhunderte eine vo de bedütendschde Pünkt im Vercheersnetz vom Bündnerland. Dr Wääg vo Kuur s Rhydaal uf verzwiigt sech do zu de Stroosse dur d Surselva zum Oberalpbass und zum Lukmanier und s Domleschg uf zu de Bäss vom San Bernadino bis zum Julier. Di einti Brügg goot vo Tamins über de Vorderrhy uf Bonaduz, di anderi übere Alperhy zu der Ysebaanstazioon Riichenau-Tamins, wo aber im Gmeindbann vo Domat/Ems ligt. Die Brügg, wo au Schlossbrügg heisst, isch no us em 1881i.
Dr Hinderrhy überkweere noch bi Riichenau no zwoo Brügge: Do isch emol di alti Ysebrügg us em Joor 1895, gmacht vo dr Basler Staalboufirma Buess und dr Firma Bell vo Chriens, für d Ysebaanlinie vo dr Rätische Baan, wo sech grad nochär ufdeilt i d Linie uf Bonaduz und Thusis einersyts und id Surselvastreki anderersyts, wo au d Züg vom Glacier-Express is Wallis dürefaare. Und drnäbe goot sid ane 1963 d Autobaan vo dr Bernardino-Rute is Tessin uf ere nöje Brügg, wo dr Inscheniör Christian Menn entworfe hed, übere Fluss.[1] Di Räätisch Baan wott jetz näbe irere alte Ysebrügg no en nöji Brügg übere Hinderhy mache und derby di alti Brügg, wo für d Technikgschicht wärtvoll isch, erhalte.
Dr Name vo Riichenau chunt vo däm, ass s Chloschter Riichenau am Bodesee do am Rhy obe scho sid em früene Middelalter Güeter psässe hed. Am Ändi vom Middelalter sind den d Brügge übere Rhy bout worde, und d Bündner hend do e Zollstell ygrichtet. S Schloss Riichenau isch im 17. und 18. Joorhundert entstande.[2]
Riichenau stoot im Schwiizer Inväntaar vo de wärtvolle Ortsbilder (ISOS).
-
wo dr Hinderrhy (vo rächts) und dr Vorderrhy (vo links) zämechöme -
Riichenau im früene 19. Joorhundert mid emene Floss uf em Alperhy und dr alte Holzbrügg, wo ane 1757 d Brüeder Johannes und Hans-Ulrich Gruebema bout hend -
d Schlossbrügg bim Schloss Riichenau übere Alperhy
Literatur[ändere | Quälltäxt bearbeite]
- Armon Planta: Verkehrswege im alten Rätien. Band 4. Kuur 1990.
Weblink[ändere | Quälltäxt bearbeite]
Commons: Riichenau – Sammlig vo Multimediadateie- Linus Bühler: Reichenau (GR). In: Historisches Lexikon vo dr Schwiiz.
Fuessnoote[ändere | Quälltäxt bearbeite]
- ↑ Brücken am vereinigten Fluss (Site cha nüme abgrüeft wärde; Suche im Webarchiv) TEC21 – Schwizerischi Bauzytig, Artikel vom 26. November 2015 uf espazium.ch
- ↑ Schloss Riichenau (Memento vom 4. März 2016 im Internet Archive) uf graubuendenkultur.ch