Karsamstag

Us der alemannische Wikipedia, der freie Dialäkt-Enzyklopedy
Hops zue: Navigation, Suech
S Hyle iber dr Chrischtus. E Fresko vom Giotto di Bondone in dr Cappella degli Scrovegni z Padua.

Dr Charsamschtig, au Oschtersamschtig oder Hochsamschtig, isch dr letscht Dag vu dr Charwuche un dr zweet Dag vum Eschterlige Triduum. No ihm chunnt dr Oschtersunntig. No dr draditionälle chrischtlige Vorstellig isch dr Charsamschti dr Dag vu dr Hellefahrt Christi, wu dr Jesus in dr Nacht no syre Chryzigung in d Hell soll aabegstige syy un dert bzw. in dr Vorhell, em „Schoß vum Abraham“, d Seele vu dr Grächte syt em Adam befreit soll haa.

Dr Charsamschtig isch dr Dag, wu d Chilche an d Grabruei vum Chrischtus dänkt un mit Faschte un Gebätt uf sy Uferstehig wartet. S wäre kaini Sakramänt gfyrt, wu mit Feschtfraid verbunde sind, vor allem kai Eucharisti, di Hailig Kommunion wird nume verwart (viaticum). Wel d Fyyr vu dr Oschternacht e Vigil isch, wu im Dunkle soll abghalte wäre, fangt si in vile Chilche in dr spote Oobestund vum Charsamschtig aa. D Oschternacht ghert derno scho zue dr Liturgi vum Oschtersunntig.

Vor allem in Kathedralchilche wäre am Morge vum Griendunschtig, vum Charfrytig un vum Charsamschtig fyyrligi Karmette mit dr Gmai gsunge. D Dagzyte vum Stundegebätt un vor allem Chryzandachte wie dr Chryzwäg wäre au gfyyrt.

Dr Altar vu dr Chilche zaigt dr nackig Stai, as Zaiche vum „Eckstai“ Chrischtus,[1] un isch nit mit Altarduech, Cheerze oder Blueme gschmickt.

Fueßnote[ändere | Quälltäxt bearbeite]

  1. Jes 28,16 EU, Eph 2,20 EU 1 Petr 2,4 EU, 1 Petr 2,8 EU


Dä Artikel basiert uff ere fräie Übersetzig vu dere Version vum Artikel „Karsamstag“ vu de dütsche Wikipedia.

E Liste vu de Autore un Versione isch do z finde.