Heinrich Meltinger

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Dialäkt: Baseldütsch

Dr Heinrich Meltinger (* vor 1471 z Baasel, † 1531 z Colmar) isch e Baasler Politiker in dr Zit vor dr Reformazioon gsi und isch nochhär as Altglöibige vom Root usgschlosse worde. Er isch äine vo de füerende Ussepolitiker vom vorreformatorische Baasel gsi.

Biografii[ändere | Quälltäxt bearbeite]

Im Meltinger si Vater isch dr Zumftmäister zum Schlüssel Ulrich Meltinger. Dä het noch eme Brozäss im Joor 1494, wo s um Underschlaagige im Joggeli-Siechehuus gange isch, vo alle politische Ämter het müesse zruggdräte.[1] Wo si Vater iigspert worde isch, isch dr Meltinger für e baar Joor as Söldner uf Frankriich.[1] 1501 isch er noch em Biidritt vo Baasel zur Äidgenosseschaft zrugg khoo. Er isch mit dr Magdalena Meyer, dr Tochter vom Junker und Rootsher Michael Meyer vo Baldersdorf verhürootet gsi. Dank dere Hüroot isch er in dr Hooche Stuube ufgnoo worde.[1]

Vo 1509 bis 1512 isch er Vogt z Waldeburg gsi. Vo 1512 bis 1515 isch er denn as äine vo de Verdräter vo dr Hooche Stuube im Root gsässe. Vo 1516 bis 1521 het er dr Boste vom Oberstzumftmäister iignoo. 1518 isch er für elf Joor Drizääner (Ghäime Staatsroot) worde. Dr Meltinger isch au Grichtsher in verschiidene Baasler Gricht gsi: im Stadtgricht, im Fümfergricht und im Appellazioonsgricht. Er het e wichdigi Rolle im Baasler Milidäär gspiilt. As Nüüner isch er Chriegsroot gsi und er isch Hauptmä 1513 bim Novarazuug und 1515 bim Marignanozuug drbii gsi. Er isch mit e hufe Gsandschafte in d Äidgenosseschaft gschiggt worde und in dr Umgääbig vo Baasel underwäggs gsi.

Vo 1522 bis 1529 het er mit em Adelbärg Meyer zum Pfiil as Bürgermäister abgwäggslet, äi Joor äär, s neggste dr Meyer. Dr Meyer isch in Religioonsfrooge gmäässigt gsi und dr Root het in de 1520er Joor nume chliini Schrittli in dr Richdig von ere Reformazioon gmacht. Wo die aber 1529 vo de Zümft forsiert worde isch, het mä dr Meltinger as Altglöibige us em Root usgschlosse und er het d Stadt verloo. Er isch zwäi Joor druf z Colmar gstorbe.

Kwelle[ändere | Quälltäxt bearbeite]

Fuessnoote[ändere | Quälltäxt bearbeite]

  1. 1,0 1,1 1,2 Markus A. Denzel, Jean Claude Hocquet, Harald Witthöft, Kaufmannsbücher und Handelspraktiken vom Spätmittelalter bis zum beginnenden 20. Jahrhundert, Franz Steiner Verlag, 2002