Bischtum Lausanne, Gämf und Friburg

s Bischtum Lausanne, Gämf und Friburg

S Bischtum Lausanne, Gämf und Friburg (lat.: Dioecesis Lausannensis, Genevensis, et Friburgensis) isch e Diözese vo de römisch-katholische Chile i de Schwiz.

Es umfasst d Kantöön Waadt (ohni de Bezirk Aigle), Gämf, Friburg und Nüüeburg. Es isch us de Schwizer Gebiet vo de ufghobene Bischtümer Gämf und Lausanne entstande. D Bischofschile isch d Friburger Kathedrale St. Nikolaus.

Gschicht

S ehemalige Bischtum Gämf

die chirchlichi Yteilig vo de Schwiz im Middelalter

d Kathedrale St. Peter, wo bis zur Reformation d Gämfer Bischofschile gsi isch

S Bischtum Gämf isch vermuetli im 4. Joorhundert entstande. Es het zerscht zum Erzbischtum Vienne ghört. Im Middelalter isch als Bischofschile d Kathedrale St. Peter buut worde.

Nach de Reformation under em Johannes Calvin het sich de Bischof Ange Justiniani 1569 z Annecy in Savoje niderglah. Sy bekanntischti Nachfolger isch vo 1602 bis 1622 de Franz vo Sales gsi. D Predige, wo är zwüsched 1594 und 1597 ghalte het, hend zäme mit de Predigttätigkeit vo de Kapuziner zur Rekatholisierig vom Chablais gfüehrt. S Chablais am Südufer vom Gämfersee isch 1564 vo Bärn a Herzog vo Savoye abträtte worde.

Im Zug vo de Nüüorganisation vo de französische Bischtümer under em Papscht Pius VII. isch de Titel vom Bischof vo Gämf 1801 ufe Bischof vo Chambéry überträit worde, scho 1815 isch er aber a Bischof vo Lausanne übergange. Die französische Teili vom Bischtum sind 1822 im nüüerrichtete Bischtum Annecy zämegfasst worde.

S ehemalige Bischtum Lausanne

au d Kathedrale Notre-Dame z Lausanne isch en ehemaligi Bischofschile

Gäge Ändi vom 5. Jahrhundert het de Marius, de Bischof vo Avenches (Aventicum), sy Bischofssitz vo Avenches uf Lausanne verläit. S Gebiet vo de Diözese, wo vo Nyon bis uf Soledurn ggangen het, isch zerscht under dr Oberufsicht vom Ärzbischöf vo Lyon und schpöter under dere vom Ärzbischöf vo Besançon gsi. E langwiirige Prozäss um s Bischtum isch im 15. Joorhundert uf em Konzil vo Basel usträit worde.

Nach dr Yfüehrig vo de Reformation im Jahr 1536 isch de letschti Lausanner Bischof, de Sébastien de Montfalcon, nach Savoye gflohe. 1613 hend sich d Bischöf vo Lausanne im katholische Friburg niderglah.

S hütige Bischtum

d Kathedrale St. Nikolaus z Friburg

Ane 1815 isch d Republik Gämf e Schwizer Kanton worde. Mä het s Kantonsgebiet isch 1819 i chirchlicher Hysicht de Adminischtration dur de Bischof vo Lausanne understellt. 1828 und 1864 sind d Gebiet in de Kantön Soledurn und Bärn, wo bis det no zum Bischtum Lausanne und Gämf ghört hend, a s Bischtum Basel überegange.

1924 isch die em heilige Nikolaus vo Myra gweihti Schtiftschile vo Friburg zur Kathedrale erhobe worde und s Bischtum het de Name vo syne drü Kathedralstedt Lausanne, Gämf und Friburg übercho.

Nachdäm en erschte Aalauf im Jahr 1980 erfolglos blybe isch, het de hütigi Bischof Charles Morerod im März 2015 sym Klerus de Vorschlag underbräitet, s Bischtum z teile und es nüüs Bischtum Gämf z errichte.

Weblink

 Commons: Bischtum Lausanne, Gämf und Friburg – Sammlig vo Multimediadateie

• Website vom Bischtum Lausanne, Gämf und Friburg
• Gilbert Coutaz: Lausanne (Diözese). In: Historisches Lexikon vo dr Schwiiz.
• Catherine Santschi: Genf (Diözese, Fürstbistum). In: Historisches Lexikon vo dr Schwiiz.

Fuessnoote

Dä Artikel basiert uff ere fräie Übersetzig vu dere Version vum Artikel „Bistum_Lausanne,_Genf_und_Freiburg“ vu de dütsche Wikipedia. E Liste vu de Autore un Versione isch do z finde.