Marius von Avenches

Us der alemannische Wikipedia, der freie Dialäkt-Enzyklopedy

Dr Marius von Avenches (* 530 oder 531 z Autun im Burgund; † 31. Dezämber 594 z Lausanne) isch Bischof vo Aventicum, em spötere Wiflisburg, und drno vo Lausanne gsi. Er het es Gschichtsbuech über Ereignis im Rych vo de Franke und im Gebiet vo de Burgunder gschribe.

Dr Marius isch us ere adelige Familie vom Burgund gsi. Ane 574 isch er Bischof vo Avenches worde. 585 isch er als Deilnäämer vom Konzil vo Mâcon ufgfüert. Me weiss nid gnau, wenn ass er dr Bischofssitz vo Avenches gäge Weschte uf Lausanne übere verleit het. Ob das gsi isch, wil d Alemanne vo Oschte här immer wyter dur s schwiizerische Middelland cho sind, isch au nid sicher. Uf all Fäll sind Bischöf vo dänn aa immer z Lausanne blibe, bis d Waadt vo de Bärner eroberet worden isch.

Wo dr Bischof Marius am Sylväschter ane 594 gstorben isch, het men en i dr Chil vom heilige Thyrsius beärdiget.

I sim churze Gschichtsbuech het dr Marius als Historiker vil Sache us dr Zyt vo 455 bis 581 ufgschribe. Em Marius sini Chronik isch zäme mit andere Gschichtskwelle us em Gebiet vo de Franke in ere Handschrift überliferet, wo öppe im nüünte Joorhundert zämegstelt worden isch und hüt der Britische Biblioteek ghört. Es het dört d Signatur Additional 16974. Es git vo dere Chronik en alti und en nöji Uusgab; die erschti isch vom Theodor Mommsen, die früschi vom Justin Favrod gmacht.

Dr Marius schribt vo Sache bi de Burgunder, de Byzantiner, de Franke, de Langobarde, de Sachse und de Oschtgote. Ganz am Afang seit er, dass d Burgunder im Joor 456 is gallische Gebiet a dr Rhone cho sige. Ane 515 heig dr König Sigismund s Chlooschter vo Agaunum bim hüttige St-Maurice im Wallis gründet. Är brichtet vom grosse Bärgsturz bi Tauredunum am Gämfersee ane 563, wo gmacht het, ass d Stadt Gämf vo de höche Wälle überschwemmt worden isch. Vom Joor 574 seit er, d Langobarde sige über d Alpepäss is Wallis cho, heige sech z Agaunum ufghalte und drufabe im burgundische Gebiet gäge d Franke kämpft. Und ane 580 het d Rhone im Wallis höchs Wasser brocht und isch ufs Land use gloffe. Vo de Alemanne weiss dr Bischof Marius i sim Wärch nüt z prichte.

Literatur[ändere | Quälltäxt bearbeite]

  • Theodor Mommsen, Hg.: Monumenta Germaniae Historica: Auctorum Antiquissimorum 11. Berlin 1894.
  • Justin Favrod: La chronique de Marius d'Avenches (455–581). Lausanne 1991.
  • Justin Favrod: Les sources et la chronologie de Marius d'Avenches. In: Francia 17 (1990), S. 1–22.
  • Jan Markus Kötter, Carlo Scardino: Gallische Chroniken. Paderborn 2017.