Bukarescht

D Stadt Bukarescht het fascht 1,9 Millioone Ywooner, und derzue chöme i der stedtische Umgäbig vo der ganze Agglomerazioon no 2,2 Millioone. Do dermit isch Bukarescht die sächstgröschti Stadt vo de Europäische Union.

Geografii

Bukarescht liit i der Walachische Töifebeni und sibezg Kilometer vo de Donau wägg uf der lingge Syte vom Fluss. Dur d Stadt flüsst d Dâmbovița, en Näbefluss vo de Donau.

Politik

Bukarescht isch nit enere Bezirksverwaltig vo Rumäänie understellt und bildet en eigeti regionali Einheit im Land.

Gschicht

D Sidlig Bukarescht sell gmäss ere alte Saag vom ene Hirt gründet worde sy, wo Bucur gheisse heg. Im ene hischtorische Dokumänt chunt d Stadt ane 1459 s erschte Mol vor. Si isch sit em füüfzääte Joorhundert der Sitz vom Fürscht vo der Walachei gsi. 1545 het der Landesfürscht Mircea Ciobanul di erschti Stadtbefestigung lo boue.

1595 het der Großwesir Koca Sinan Pascha d Stadt Bukarescht für d Osmane eroberet; die hend sech aber noch churzer Zyt wider müesse us der Walachei zruggzie. Bis ane 1626 isch denn Târgoviște der Sitz vom Walachefürscht gsi; sid em Joot 1659 isch Bukarescht ändgültig der Sitz vom Landesheer blibe.

Vo 1789 bis 1791 isch d Stadt under der Herrschaft vo de Öschtriicher gsi, vo 1807 bis 1812 vo de Russe. Bis 1856 sind immer wider russeschi, türkeschi und öschtriicheschi Truppe i d Stadt cho. Sid 1862 isch Bukarescht d Houptstadt vo Rumäänie, wo ane 1878 uf em Kongräss vo Berlin als unabhängige Staat anerchannt worden isch. 1881 isch das Land es Chönigriich worde, 1945 e kommunistische Staat und noch 1989 e parlamentareschi Republik, und vo allne dene Staatsforme sind z Bukarescht Gebäu und Sümbol z gsee.

Weblink

Commons: Bukarescht – Sammlig vo Multimediadateie