Liddes

Dialäkt: Wallisertitsch

Liddes
Wappe vo Liddes
Basisdate
Staat:	Schwiiz
Kanton:	Wallis (VS)
Bezirk:	Entremontw
BFS-Nr.:	6033i1f3f4
Poschtleitzahl:	1945
Koordinate:	580391 / 9344745.99237.185581346
Höchi:	1'346 m ü. M.
Flächi:	60.2 km²
Iiwohner:	745 (31. Dezämber 2022)
Website:	www.liddes.ch
Liddes Liddes
Charte
Charte vo Liddes w

Liddes isch en Munizipaalgmei im Bizirk Entremont im Kanton Wallis, Schwiz.

Geografii

Di Gmei liggut im Taal vaner Dranse d'Entremont aner Höiptstraass 21, wa va Martinach zum Grossu Sankt Bernhard emüf geit. Witer ferüs im Taal Entremont liggut di Gmei Orsières, witer feri liggut Sankt Petersburg.

Üsserum Doorf Liddes-Ville gcheerunt zer Gmei öi nu di Bärgdeerfjini Chandonne, Dranse, Rive-Haute, Fontaine-Dessous, Fontaine-Dessus, Les Moulins, Vichères, Fornex, Chez-Petit und Palasuit.

Daana dum Bäärg Mont Brulé, entlang dum Füesswäg uberu Pass Col de Mille, geit ds Gmeigibiet witer uber d Wasserscheida emuber in ds Taal vam Bach Torrent des Places, wa uf Versegères im Bangistaal embri geit. Zobrusch im Taal het Liddes en Alpa mit dum Namu Les Plans.

Im Oschtu verlöift di Gmeigärnza bis zum Schneefääld am Gipfel vam Petit Combin uf uber 3600 Meter. Witer unnena am Bäärg liggut dr Gletscher Glacier de Boveire. Boveire isch dr Flurnamu vam Alpugibiet unnerhalb vam Gletscher.

Visavi vam Doorf Liddes liggut ufer anner Sita vam Bach ds Deerfi Dranse. Va daa geit mu in ds Situtelli Combe de l'Â. In dem chleinu Telli mit dum Bach Torrent de l'Â liggut d Alpa Vouasse, und va da fiert en Füesswäg uberu Col du Névé de la Rousse feremuber in ds Ferrettaal. Di ganz Combe de l'Â isch es groossus Natüürschutzgibiet.

Gschicht

Inu Felsu oberhalb vaner Alpa Boveire d'en haut liggunt d Uberräschte vanera uraaltu Trochumüüra und d Ruiine vanera Sidlig. Dische Oort hent dr Gschichtsforscher und Dichter Theo Lathion va Liddes und annri sit Jaarzääntu vilfach bischribu, und sit 2006 chuntsch vanera eigunu Organisazioo, dr RAMHA, mit der Hilf va Universitääte iner Weschtschwiz erforscht. Mu het bi Üsgrabige Sache gfunnu üser Zit churz vor dr Erobrig vam Wallis durch d Röömer und öi nu Sache va spääter. Di güet gschützt Alaag wit embrüf inu Bäärga het scho sit Langum dr volkstümlich Namu Mur d'Annibal.

Ds Doorf Liddes chunt scho sit dum 12. Jh. in Dokumänt vor. Im Jaar 1228 hets schi vaner frienru Gmei Orsière gleest, fer en eiguni Gmei z bildu. Äs het dum Bischof va Sittu und nu churz naam Mittelaalter dum Härzog va Savoju gcheert.

Di Doorfchircha vam Sankt Georg isch im Bsitz vam Hoschpiz vam Groossu Sankt Bernhard gsi.

Iwoner

Quälla: Bundesamt fer Statistik 2005

Jaar	1850	1860	1870	1880	1888	1900	1910	1920
Iwoner	1347	1308	1237	1267	1189	1076	1079	983
Jaar	1930	1941	1950	1960	1970	1980	1990	2000
Iwoner	832	824	720	713	635	639	620	659

Dr Üsländerateil isch 2010 bi 6,9 % glägu.

Religioo

90 % vanu Iwoner sind im Jaar 2000 römisch-katholisch gsi, 3,3 % evangelisch-reformiert.

Politik

Dr Gmeipresidänt va Liddes isch dr Stève Lattion (Stand Oktoober 2017).

Büüte

• Kapälla vam Sankt Laurenz

Weblink

 Commons: Liddes – Sammlig vo Multimediadateie

• Website vaner Gmei Liddes
• Albano Hugon: Liddes. In: Historisches Lexikon vo dr Schwiiz.