Sankt Petersburg (Entremont)
| Bourg-Saint-Pierre | |
|---|---|
 | |
| Basisdate | |
| Staat: | Schwiiz |
| Kanton: | Wallis (VS) |
| Bezirk: | Entremont |
| BFS-Nr.: | 6032 |
| Poschtleitzahl: | 1946 |
| Koordinate: | 582142 / 88648 |
| Höchi: | 1'632 m ü. M. |
| Flächi: | 90.2 km² |
| Iiwohner: | 211 (31. Dezämber 2020)[1] |
 Sankt Petersburg im Wallis | |
| Charte | |
  | |
Sankt Petersburg isch e Munizipalgmeind (politeschi Gmeind) im Bezirk Entremont vom Kantoon Wallis i dr Schwiiz. I däm Landesteil redt me franzöösisch, un di Gmeind heisst drum offiziell Bourg-Saint-Pierre (fp. [y bɔr də sɛ̃ˈpjɛr].
Geografii und Gschicht[ändere | Quälltäxt bearbeite]
S Dorf lit a dr Strooss vom Roonetaal bi Martinach ufe Bärgpass vom Bärnhardsbärg und noch Augschd z Itaalie. Ufem Bärg goot dr Gmeindbann bis a d Landesgränze zu Itaalie, i dr Nöchi vom berüemte Hospiz vom Sankt Bärnhard, wo im 11. Joorhundert gründet worden isch. S wärtvolle Archiiv vo däm Konwänt wird hüt im Dorf unde ufbewaart.
Früener hei d Lüüt vo Sankt Petersburg s exklusiive Rächt gha, d Handelslüüt mid irne Waare übere Bärg z füere. Do derzue hei si dr uralt Soumpfad bruucht, wo s scho sid de Röömerzyte gää het. Als diräkti Ruute i Süüde isch dr Pass au für Wallfaarer, Chönige, Päbscht, Bischöf und Äpt, und de au für s Milidäär immer wichtig gsi. Im Dorf Sankt Petersburg heds drum Raschthüüser bruucht. E Wäg zum ufe Bärg faare isch erscht im 1905i gmacht worde. I dr nöje Zyt hed di Strooss, wo immer mee verbessered worden isch, d Nummere 21 vo de Haupstroosse vo dr Schwiiz übercho, und si isch e Deil vo der Europastrooss 27, wo vo Belfort im Franzöösische über Losann is Augschdtaal füert. Sid em 19. März 1964 cha me oben a Sankt Petersburg im ene Dunnel under em Pass durefaare, wo uf iteliäänisch Traforo del Gran San Bernardo heisst.[2]
Vom Dorf us, wo uf dr Höchi vo 1600 Meter über em Meer lit, stigt d Strooss s Taal duri gli über d Baumgränze ufe. Noch sächs Kilometer chunnt si zum Dunnel. Die Stell heisst no hütt Sankt Bernhardsburg (uf franzöösisch Bourg Saint Bernard). Obe dra isch früener d Schiischtation Super Saint Bernard gsi. Vo dört us goot di alti Strooss no vil steiler öppe sibe Kilometer witer bis uf d Passhöchi uf 2460 Meter.
Vom Bärg oben abe chunnt d Dranse, dr Bach, wo oben am Dorf sid em 1963i im Toules-Stausee ufgfange wird und s Wasser für di zwöi Chraftwärch bi Liddes und bi Orsières witer unde n im Entremont liferet.[3] Unden a Sankt Petersburg heisst der Bach Dranse d’Entremont. Zäme mid dr andere Dranse, wo usem Bangistaal chunnt, bildet er bi Sembrancher di grossi Dranse, und die flüsst bi Martinach id Roone.
S Dorf hed wärtvolli alte Gebäu:
- d Dorfchille mid em Durm, wo fasch duusigjöörig isch
- s Hoschpiiz uf em Bärg, wo au no wäge de Bärnhardinerhünd bekannt isch
- d Ruiine vo dr Burg Allinges
- d Burgschtell vo dr ehemolige Burg Quart
- e Loretokapälle
- dr alt Spittel
- s Woonhuus vo de Challant
- s alte Priorat
Gschicht[ändere | Quälltäxt bearbeite]
Bourg-Saint-Pierre ischt zum eerschtu Mal gnennt choo im Jaar 1125 als Burgus Sancti Petri.
Iwoner[ändere | Quälltäxt bearbeite]
Quella: Bundesamt für Statistik 2005[4]
| Jaar | 1850 | 1860 | 1870 | 1880 | 1888 | 1900 | 1910 | 1920 |
| Iwoner | 305 | 336 | 400 | 392 | 393 | 355 | 327 | 271 |
| Jaar | 1930 | 1941 | 1950 | 1960 | 1970 | 1980 | 1990 | 2000 |
| Iwoner | 266 | 295 | 227 | 524 | 236 | 218 | 200 | 212 |
Dr Üsländeraateil ischt 2010 bi 7,3 % glägu.[5]
Religion[ändere | Quälltäxt bearbeite]
85,4 % vannu Iwonru sint im Jaar 2000 remisch-katholischi gsii, 4,2 % evangelisch-reformierti.[5]
Politik[ändere | Quälltäxt bearbeite]
Dr Ggmeindspresident va Bourg-Saint-Pierre ischt dr Gilbert Tornare (Stant Oktober 2017).
Spraach und Tialäkt[ändere | Quälltäxt bearbeite]
Bi dr Volchszellig 2000 heint vannu 212 Iwonru 92 % Franzeesisch als Höiptspraach aagigää, 0,9 % Titsch, 2,8 % Talienisch und 4,3 % anneri Spraache.[5]
Dr tradizionäll Tialäkt va Bourg-Saint-Pierre gcheert zum Frankoprovenzalisch.
Bilder[ändere | Quälltäxt bearbeite]
dr fasch duusig Joor alt Chilledurm
dr röömisch Mäileschtei im Dorf
s Huus vo de Challant
s Hoschpiiz uf em Bärnhardsbärg
dr Gipfel vom Vierduusiger Grand Combin ganz im Oschde vo Sankt Petersburg
s Huus, wo dr Napoleon uf em Wäg noch Itaalie drin übrnachded het
dr Stausee vo Toules
s Huus vo de Zöllner im Dorf, mid eme Gmäld vo de Schmuggler
.jpg)
Litratuur[ändere | Quälltäxt bearbeite]
- Louis Blondel: L'Eglise et le Prieuré de Bourg St Pierre. In: Vallesia 1, 1946, S. 21–41.
- Lucien Quaglia: Les services du passage du Saint-Bernard établis à Bourg St Pierre. In: Annales valaisannes, 1973, S. 43–76.
- Pierre Dubuis: Ceux qui passent et ceux qui restent. Etude sur les trafics transalpins et leur impact local. Actes du Colloque de Bourg-Saint-Pierre, 23–25 septembre 1988. Saint-Maurice 1989.
Weblink[ändere | Quälltäxt bearbeite]
Commons: Bourg-Saint-Pierre – Sammlig vo Multimediadateie- Catherine Raemy-Berthod: Bourg-Saint-Pierre In: Historisches Lexikon vo dr Schwiiz.
Amerkige[ändere | Quälltäxt bearbeite]
- ↑ Ständige Wohnbevölkerung nach Staatsangehörigkeitskategorie, Geschlecht und Gemeinde, definitive Jahresergebnisse, 2020. Bei späteren Gemeindefusionen Einwohnerzahlen aufgrund Stand 2020 zusammengefasst. Abruf am 17. November 2021
- ↑ Dunnel vom Sankt Bärnhard
- ↑ Chraftwärch vo de Forces Motrices d'Orsières
- ↑ Bundesamt für Statistik: Eidgenössische Volkszählung 2000: Bevölkerungsentwicklung der Gemeinden 1850–2000. Bern 2005 (Online uf bfs.admin.ch (Site cha nüme abgrüeft wärde; Suche im Webarchiv) , Date im Aahang (Site cha nüme abgrüeft wärde; Suche im Webarchiv) )
- ↑ 5,0 5,1 5,2 Bundesamt für Statistik: Regionalporträts 2012: Kennzahlen aller Gemeinden (Site cha nüme abgrüeft wärde; Suche im Webarchiv) , Mai 2012
