Emma Coradi-Stahl

d Emma Coradi-Stahl um 1908

D Emma Coradi-Stahl (* 9. Novämber 1846 z Sunneberg, Hefofe; † 8. April 1912 z Züri; haimetberäächtigt z Obernüüfere) isch e Schwyzer Fraueräächtleri gsii.

Lääbe

Si isch e Doochter vum Jakob Stahl un däm syre Frau Karoline geb. Schoop gsii. Si isch z Dozwil im Kanton Thurgau ufgwagse, isch zytwyys in Kanton Nöiebuurg gange go Franzeesisch leere un het druf e Leer as Textiil-Handarbaiteri gmacht. Anne 1868 het si dr Leerer Adam Coradi ghyroote. Si het zeerscht Haimaarbet gmacht un derno 1874 z Aarau e Stickerei-Gschäft ufgmacht.

Anne 1885 het si dr Gmainnitzig Fraueverain Aarau grindet un het si mit däm wäge ire aigene schläächte Erfaarige fir besseri Uusbildigsmeegligkaite fir Fraue in Huuswiirtschaft un Gwäärb engaschiert. Si het dr Ufböu vu Huushaltigsschuele unterstitzt un het speeter d Bfläägerneschuel z Züri mitblaant.

Im nämlige Joor isch si Mitgliid vum Schwyzer Fraue-Verband (SFV) woore, wu au 1885 grindet woooren isch. Scho 1888 sin sii un iri Voorstandskollegene Emma Boos-Jegher un Rosina Gschwind-Hofer us em SFV uusdrätte un hän dr uubolitisch Dachverband vu Schwyzerische Gmainnitzige Fraue (SGF) nei grindet. Uf dr Baasler Gwäärbuusstellig 1892 het si as Expeerti fir Handaarbetsfrooge referiert un het vum Bund un vu dr Kanteen finanziälli Unterstitzig fir d Maidli- und Frauebildig gfoorderet.

Voor 1893 isch si mit irem Mann uf Züri zooge, wu äär derno au as Verleeger gschafft het. Iber iin het si bis zue irem Dood di sälbschtgrindet Zytschrift Schwyzer Frauehaim uusegee un het Biecher iber Huuswiirtschaft gschriibe, wu in hooche Uflaage druckt woore sin. 1896 isch si vum Bundesroot zur aidgnessische Expeerti un Inschpäkteri fir gwäärbli un huuswiirtschaftli Bildigswääsese ernännt woore un isch ab doo im Ufsriichtsroot fir Fachschuele fir Daameschnyyderei un vu dr Uusbildigskiirs ghockt. Derzue het si vu 1903 bis 1908 as SGF-Laiteri vu dr Sekzioon Züri, derno bis bis 1912 as Bresidänti vum Dachverband SGF gamtet. In dääre Funkzioon isch si au bi internazionaale Kungräss gsii.

No irem Dood het dr SGF e soziaali Stiftig yygriichtet, wu no iire gnännt wooren isch.

Wäärch

• Wie Gritli haushalten lernt (1902)
• Gritli in der Küche (1904)
• Gritlis 234 Kochrezepte

Literatuur

• Regula Ludi: Coradi-Stahl, Emma. In: Historisches Lexikon vo dr Schwiiz.
• Ursula Köhler-Lutterbeck; Monika Siedentopf: Lexikon der 1000 Frauen, Bonn 2000, S. 73f. ISBN 3-8012-0276-3

Weblink

• Publikazioone vu un iber d Emma Coradi-Stahl im Kataloog Helveticat vu dr Schwyzerische Nazionaalbiblioteek

Dä Artikel basiert uff ere fräie Übersetzig vu dere Version vum Artikel „Emma_Coradi-Stahl“ vu de dütsche Wikipedia. E Liste vu de Autore un Versione isch do z finde.