Emma Boos-Jegher

D Emma Boos-Jegher (* 26. Februar 1857 z Triest; 21. Dezämber 1932 z Züri; haimetberäächtigt z Òòfer un z Züri) isch e Schwyzer Fraueräächtleri gsii.

Lääbe

D Emma Jegher isch e Doochter vum Triester chaufmännische Aagstellte Gaudenz Jegher un syre Frau Adèle geb. Geislinger gsii. Si het Främdsproocheleereri gleert un an ere Maidlischuel z Züri unterriichtet.

Anne 1885 het si dr Eduard Boos (1855–1928) ghyroote, mit iim het si ab 1886 z Züri d «Kunst- und Frauenarbeitsschule Neumünster» glaitet. Si hän zäme vier Chinder ghaa un in irem sozialbolitische Wiirke äng zämegschafft. D Schuel hän si anne 1910 ufgee.

Ab dr 1880er Joor het d Boos-Jegher in dr Frauebildig gschafft un s fir Abschtinänz un d Abschaffig vu dr Proschtituzioon engaschiert. 1885 isch si Mitgrinderi vum Schwyzer Fraueverband (SFV) gsii un isch deert Vizebresidänti woore. 1887 isch si Mitgrinderi vum «Zürcher Frauenbundes zur Hebung der Sittlichkeit» gsii. Us em SFV isch si 1888 zäme mit ire Mitstryterne Emma Coradi-Stahl un Rosina Gschwind-Hofer im Stryt uusdrätte, statt däm hän si dr nei Schwyzerische Gmainnitzige Fraueverain (SGF) grindet. Au deert het si im Voorstand mitgmacht, ire Aaliige vu dr Frauebildig isch ere deert aber z chuurz chuu, wäge däm het si bim SGF ufgheert.

Anne 1893 het si dr «Zürcher Verein Frauenbildungs-Reform» grindet, wu si Bresidänti dervu gsii isch. Si het bim eerschte Kungräss fir Fraueinträsse z Genf 1896 mitgwiirkt. Im nämlige Joor, 1896, het ire Verain mit em Räächtsschutzverain vu dr Jurischti Emilie Kempin-Spyri fusioniert. Dr nei Verain, d «Union für Frauenbestrebungen Zürich» (speeter au: «Zürcher Frauenstimmrechtsverein»), het fir d Glyychstellig vu dr Frau zeerscht im berueflige, derno au im räächtlige un bolitische Sinn kämpft. D Boos-Jegher isch vu 1896 bis 1903 un nomol vu 1912 bis 1914 Bresidänti vu dr «Union für Frauenbestrebungen» gsii, vu 1903 bis 1911 het iri Mitsytryteri Klara Honegger des Amt ghaa. D Boos-Jegher het s bolitisch Brogramm vum Verain breegt un het um die Zyt as Woortfiereri vu dr brogressiive Feminischtene z Züri glte, au wel si ne nazionaali Koordinazioon vu dr Schwyzer Frauebeweegig aagsträbt ghaa het.

Des isch ab 1899 umgsetzt woore: D Boos-Jegher isch Mitgrinderi vum «Bund vu Schwyzerische Fraueverain» (BSF) gsii. Iri Unioon fir Frauebsträäbige het au Voordreeg un Dienschtlaischtige fir Fraue organisiert un het s 1898 gschafft, ass Fraue as Aawältene im Kanton Züri zuegloo woore sin. Au verschiideni Gsetzyygaabe het mer verfassdt. Ab 1903 het d Boos-Jegher fir d Verainszytschrift Frauenbestrebungen gschriibe. Fir dr BSF isch s au Daagige vum Frauewältbund gange. 1912 bis 1916 isch si Vizebresidänti vum BSF gsii. 1923 isch si zum eeremitgliid uf Lääbeszyt ernännt woore.

Ab 1914 het si d Boos-Jegher us dr Laitigsgreemie vu dr Frauebeweegig zruggzooge. 1928 isch ire Mann gstoorbe, druf het si si bis zue irem Dood ganz us dr Effetligkait zruggzooge.

Literatuur

• Regula Ludi: Emma Boos-Jegher In: Historisches Lexikon vo dr Schwiiz.
• d Emma Boos-Jegher in dr Daatebank Bild + Ton vum Schwyzerische Soziaalarchiiv
• Publikatione vo und über Emma Boos-Jegher im Katalog Helveticat vo dr Schwiizerische Nationalbibliothek

Fueßnote

Dä Artikel basiert uff ere fräie Übersetzig vu dere Version vum Artikel „Emma_Boos-Jegher“ vu de dütsche Wikipedia. E Liste vu de Autore un Versione isch do z finde.