Walter Buser

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
dr Walter Buser (1986)

Dr Walter Emil Buser (* 14. April 1926 z Lause; † 17. Augschte 2019;[1] haimetbrächtigt z Bättwil un z Lause (Ehreburger)) isch e Schwyzer Rächtswisseschaftler un Beamte gsii. Vu 1981 bis 1991 isch er Bundeschanzler vu dr Schwyzerische Aidgnossenschaft gsii un s eerscht Mitgliid vu dr SP in däm Amt.

Lääbe[ändere | Quälltäxt bearbeite]

Dr Buser isch e Suhn vun eme Buur gsii un isch z Lause uf eme Buurehoof ufgwachse. Är isch z Baasel uf s Humanistisch Gimnasium gange un het derno Jurisprudänz un Volkswirtschaft an dr Universideete Baasel un Bäärn studiert. Anne 1958 het er z Bäärn mit ere räächtshistorische Aarbet promoviert. Scho syter anne 1950 isch dr Buser Räächtsberooter un Redakter bi sozialdemokratische Zytige gsii. Vu 1956 bis 1962 isch er Schefredakter vu dr «Sozialdemokratische Bundeshauskorrespondenz» gsii.

Anne 1965 isch dr Buser in d Bundesverwaltig yydrätte un isch drei Johr lang Laiter vum Räächts- un Informazionsdienscht vum Aidgnessische Departement vum Innere gsii. Dr Bundesroot het en anne 1968 zum Vizechanzler gweelt. In däre Funkzion isch er fir Räächtsdienscht un Informazion vum dr gsamte Bundersverwaltig zueständig gsii. Anne 1977 het en d Universideet Baasel zum usserordelige Brofässer fir effetli Räächt gmacht, är het do vor allem s Verwaltigsräächt vum Bund gleert.

Noch em Ruggdritt vum Bundeschanzler Karl Huber (CVP) isch s anne 1981 in dr Bundesversammlig zuen ere Kampfwahl um sy Noofolg chuu. Doderby het si dr Buser geg dr Joseph Voyame[2] (CVP) un dr Hans-Ulrich Ernst (SVP) duregsetzt. Dodermit isch er dr eerscht sozialdemokratisch Bundeschanzler gsii. Dr Buser het s Amt dr gwandlete Informazionsbedirfnis aabasst, indäm er reegelmäßigi Prässekumferänze yygfiert het un d Bundeschkanzlei zuen ere Stabsstell vum Bundesroot uusgwytet het. Derzue het in syre Amtszyt di Elektronisch Dateverarbaitig Yyzuug ghalte in d Bundesverwaltig. Mit em Pänsionsalter isch er anne 1991 zruggdrätte. Sy Noofolger isch dr François Couchepin (FDP) woore.[3]

Anne 1983 isch dr Buser noch em nit erwaartete Dood vum Bundesroot Willi Ritschard as meeglige Noofolger ghandlet woore, het aber e Kandidatur abgläänt.

Dr Buser het mit syre langjehrige Frau, wu 2001 gstoorben isch, zwoo Deechtere ghaa. Di letschte Johr het er mit syre nei Partneri in ere Altersresidänz z Ittlige bi Bärn. Är isch im Augschte 2019 noch ere churze Chranket im Alter vu 93 Johr gstoorbe.[4]

Literatur[ändere | Quälltäxt bearbeite]

Weblink[ändere | Quälltäxt bearbeite]

Fueßnote[ändere | Quälltäxt bearbeite]

  1. Früherer Schweizer Bundeskanzler Walter Buser gestorben, Tages-Anzeiger online, 21. Augschte 2019.
  2. François Kohler: Joseph Voyame. In: Historisches Lexikon vo dr Schwiiz.
  3. Ein Rundgang durch die Geschichte der Bundeskanzlei, Websyte vu dr Bundeschanzlei, abgruefen am 21. Augschte 2019.
  4. Urs Marti: Ein Leben für das Bundeshaus. (Memento vom 22. Augschte 2019 im Internet Archive) In: Neue Zürcher Zeitung vum 21. Augschte 2019.


Information icon.svg Dä Artikel basiert uff ere fräie Übersetzig vu dere Version vum Artikel „Walter_Buser“ vu de dütsche Wikipedia.

E Liste vu de Autore un Versione isch do z finde.