Understraass

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
s Hotel Züri

Understraass isch es Quartier vo de Stadt Züri.

Geografy[ändere | Quälltäxt bearbeite]

Zäme mit em Nachberquartier Oberstraass macht das Quartier de Stadtchräis Sächs uus.

Die andere Nachberquartier: Understrass chunt im Süüden bis a d Limet und an Stadtchräis 1, im Südweschte isch änet de Limet s Induschtryquartier, im Weschte isch Wipkinge, im Nordweschte gränzt Understraass ännet em Chäferbèèrg an ere chlyne Stell as Quartier Afoltere, und im Noorde isch Öörlike.

Abgsee vom Wald ufem Chäferbèèrg und de Päärk – so wie s Schindlerguet und de Beckehoof – isch s Quartier ganz überbout. Es hät es dichts Straassenetz, wo sech a d Hauptachse vo de Schaffuserstraas, de Wintertuurerstraass, de Hofwiisestraass, de Buecheggstraass, de Weentalerstraass und de Wasserwèèrchstraass orientiert. Vom Tierspitaal bis a d Limet gaat s Milchbucktunäll. De Buecheggplatz isch e grosse Straassechnoote ufem Hügel zwüschem Limetdaal und em Glattdaal, und zmitzt im Guartier isch de Schaffuuserplatz.

1856 isch s Wipkingertunäll vo de Ysebaan uufggange, wo under am Gebiet vo Understraass lyt.

A de Limet isch s Chraftwèèrch Lätte.

Gschicht[ändere | Quälltäxt bearbeite]

Früener isch Understraass es sälbständigs Doorff gsy. Na i de Middi vom 19. Jaarhundert hät Understraass zwüschet wyte Fälder und Wise nu es paar Hüüserzylete gha de Landstraasse naa. D Doorfftäil händ Rietli, Letzi, Milchbuck, Röthel und Guggach ghäisse. Es hät na offeni Bech gha im Doorff, öppe de Lindebach, wo zu de Limet abegloffen isch

Ane 1893 isch das so wie en Zylete anderi uf Züri ygmeindet woorde.

Dr Naame vom Oort chunt da devo, ass er a der uralte Undere Straass is Glattdaal uf Chloote übere lyt. Es hät au die Oberi Straass ggèè, wo diräkt übere Züribèèrg ggangen isch, und das Doorff a dere Straass häisst ebe Oberstrass. Die nideri Straass isch anne 1272 in ere alte Uurkund erwäänt.

Architektuur[ändere | Quälltäxt bearbeite]

S Schuelhuus Wyybèèrg erinneret äim dra, ass s Gebiet bi Understraass früener Puureland gsi isch.

Z Understraass git’s e paar Chile:

d Chilen Understraass

Understraass hät de Fridhof Nordheim mit ere Samlig vo historische Grabmonumänt und de Fridhof Steichluppe; das isch en alte jüüdische Fridhof vo Züri, er isch vo 1900 bis 1936 vo de Israelitische Religionsgmäinschaft Züri bruucht woorde zum iri Doote z begrabe. Die alte Grabschtäi sind schööni Dänkmööler us de Afangszyt vo dere jüüdische Gmäind.

Uf em Land vo de früenere Landwirtschaftliche Schuel Strickhoof im Quartier Understraass isch de Irchelpark, wo näbedra de Irchel-Campus vo de Uni Züri und au s Staatsarchyv Züri isch.

S Föif-Stèèrn-Hotel Züri-Marriott a de Limet fallt uf, wils einzig Hochhuus im Stadtzäntrum isch. Es isch anne 1973 bout woorde.[2]

A de Hofwiisestraas isch es grosses Huus vo Schwiizer Radio und Fernsee.

Understraass hät Schuelhüüser und Sportplätz, so wie d Steichluppe vom FC Understraass; dèè Klub git’s sit 1921.[3]

Bilder[ändere | Quälltäxt bearbeite]

Literatur[ändere | Quälltäxt bearbeite]

Weblink[ändere | Quälltäxt bearbeite]

 Commons: Understraass – Sammlig vo Multimediadateie

Fuessnoote[ändere | Quälltäxt bearbeite]

  1. Flurina Pescatore und Marius Winzeler: Die katholische Pfarrkirche Liebfrauen in Zürich. Schweizerischer Kunstführer GSK, Band 612/613 Bern 1997, S. 37
  2. Zürich Marriott Hotel (Memento vom 13. Juli 2019 im Internet Archive) uf marriott.de
  3. d Website vom FC Understraass. Archiviert vom Original am 2019-05-10. Abgrüeft am 2019-08-23.