Chraftwèèrch Lätte

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

S Chraftwèèrch Lätte isch es Wasserchraftwèèrch vo de Stadt Züri.

Es staat a de Limet zmitzt i de Stadt, und es isch es schööns Dänkmal vo de Technikgschicht.

Wo ane 1868 d Zürcher Wasserversorgig gründet worden isch, hät die scho gly s mechanisch Wèèrch a de Limet boue zum d Pumpene aztrybe, wos bruucht hät zum s Wasser i die hööch glägne Stadtkwartier ufezpumpe. Am Züribèèrg oben isch als Wasserspycher de Resiweiher usgrabe worde. Sid 1878 hät s Wasserwèèrch dezue ane au scho mit ere Transmission Chraft i d Fabrigge vo de Umgäbig im Induschtrykwartier gliferet. Am Afgang hät s Wèèrch i de Limet es Naadlewehr gha zum de Fluss chly ufzstaue.

Scho 1892 hät me s Lätte-Wèèrch zum ene elektrische Chraftwèèrch uspoue. De Resiweiher isch jetz defüür daa gsi, zum mit de elektrischen Energy i Zyte, wo wenig im Stromnetz pruucht worden isch, Wasser ufezpumpe, wome dänn bi Spitzeverbruuch wider hät uf d Turbyne chönnen abelaa.

D Stadt Züri isch aber jetz so starch gwachse, ass s alte Lättewèèrch nüme glanget öät; sid 1904 isch au na Strom vom Chraftwèèrch i de Beznau a de Aare und sid 1906 vom Albulawèèrch im Pündnerland choo. 1935 staat i de Limet am Platz vom alte Naadlewehr e hööcheri Staumuur, und 1938 und 1952 isch s Chraftwèèrch modernisiert worde.

Literatur[ändere | Quälltäxt bearbeite]

  • Daniel Kurz: Kraftwerk Letten. In: Kattundruckereien, Zahngold für die ganze Welt, Ladensterben. Wipkingen Lebensräume-Verkehrsräume. Geschichte eines Zürcher Stadtquartiers 1893–1993. 1993.

Weblink[ändere | Quälltäxt bearbeite]

 Commons: Kraftwerk Letten – Sammlig vo Multimediadateie