Tainaron

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
de Lüüchtturn uf em Kap Matapan

S Kap Tainaron oder Tainaros (altgriechΤαίναρον n., Ταίναρος f.; latiinTaenarum; noigriech. Ταίναρο,Ténaro) au Kap Matapán (noigriech. Κάβο Ματαπά Kávo Matapá; venez. Cabo Matapan) isch de süüdlichsti Punkt vo de Peloponnes im üsserste Süüde vo de Halbinsle Mani.

Geographii[ändere | Quälltäxt bearbeite]

S Vorpirg Tainaron isch de Uusloiffer vom Pirg Taygetos, wo Messenie vo Lakonie tailt. De Berg us Marmorstai isch öppe fööf Kilometer lang und öppe halb so brait. De höchst Punkt Skourka isch 314 Meeter hööch. Im Norde verbindet e 540 Meter schmooli Landengi s Vorpirg mit em Festland, uf em Höchste Punkt vo de Landengi stoot e maniotische Weerturm, de Pyrgos Grigorakaki. D Landengi werd vo zwoo Buchte bildet. Im Oste litt de Pórto Kágio (ngr. Πόρτο Κάγιο; osmanisch: Porto Kalı; venezianisch: Porto Quaglio "Wachtelhafe"), wo e guete sichere Natuurhafe isch und geg de Lakonischi Golf offen isch. I de Antiki isch do de Hafe Psamathous (Ψαμαϑοῦς "Sandig") glege. Nördlich vo de Bucht isch di törkisch-venezianischi Festig La Magna (osman. Manya) gstande, wo de Hafe öberwacht hett. Im Weste litt d Bucht Marmári (ngr. Μαρμάρι n.; venez. Porto Inferno) mit eme gliichnamige Wiiler. Si isch gege de Messenischi Golf offe und weniger guet gaignet zom lande. I de Antiki hett die Bucht Achilleios-Hafe (agr. Ἀχίλλειος λιμὴν) ghaisse.

Vo de Landengi goot e Schlucht zom Pórto Stérnes (ngr. Πόρτο Στέρνες "Zisternehafe"), wo geg de Süüde offen isch und e gaignete natüürliche Landeplatz för chlinneri Schiff büütet. De antiki Name vo dere Bucht isch nöd öberliferet, obwoll do e Tempel vom Poseidon gstanden isch. De süüdlichst Spitz, s Kap Ténaro, mit eme Lüüchtturn isch knapp zwee Kilommeter südwestlich vo dere Bucht. D Vathy-Bucht (ngr. Όρμος Βαθύ "Tüüffi") im Südooste isch degege ganz schlecht för Schiff.

Gschicht[ändere | Quälltäxt bearbeite]

S Kap Tainaron isch i de Antiki e Hailigtum vom Poseidon gsii mit em Asylrecht för Helote, da sin die vo Sparta underdruckte alte Iiwooner vo Lakedaimon und Messenie gsii. Im früene 5. Jh. v.Chr. sind drumm e paar Helote i de Tempel gfloche, aber trotz dem hailige Schutzrecht, hend d Spartaner die Flüchtling umbroocht. Chorz drufabe, im Joor 485 v.Chr. isch d Stadt Sparta vom ene starche Erdbebe völig verwüestet wore und sogäär d Spartaner hend den globt, as si wege dem Mord a de Helote, vom Poseidon gstroofft wore saied, denn noch em Globe vo de alte Grieche isch de Gott au för d Erdbebe verantwortlich.

s Poseidonhailigtum[ändere | Quälltäxt bearbeite]

De Kult vom Poseidon uf em Kap Tainaron isch sicher vordorisch, obwoll mer bis hütt kai archäologischi Spuure us de Bronzezitt gfunde hett. Im lokaale dorische Tielekt het de Poseidon do Pohoidan ghaisse. Da isch uuffälig, wil uf Dorisch de Gott normalerwiis Poteidan haisst. Me ninnt drum aa, as d Dorer de mykenischi Name Poseidahon öbernoo hend, wa denn spöter ebe zu Pohoidan woren isch. Au as d Helote do s Asylrecht bsesse hend, gelt as e Hiiwiis, as de Kult vordorisch si mue. Bim alte Tempel isch e Hööli, wo i de Antiki as ann vo de Iigäng in Hades, aso i d Underwelt, ggolte het. De Herakles söll dör die Hööli de Höllehund Kerberos ufebroocht ha. Hütt stoot bi de Hööli e chliis Chappeli vo de Ajon Asomaton ("de heilige Körperloose"), zu Eere vo de Erzengel, wo a de Pfingste die Toote i d Oberwelt biglaitet.

Bim Ort isch i de Antiki o e chliini Bronzestatue gsii, wo de Arion uf eme Delphin zaigt.

Weblink[ändere | Quälltäxt bearbeite]

 Commons: Cape Matapan – Sammlig vo Multimediadateie

36.40947222.482211Koordinaten: 36° 24′ 34,1″ N, 22° 28′ 56″ O