Helotenaufstand

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

De Heloteuufstand oder Dritt Messenischi Chrieg isch en Uufstand vo de messenische Helote gege Sparta. Am Chrieg hend nöd nume underdruckti Helote tailgnoo, o di messenische Periökestädt Thouria und Aithaia hend sich draa bitailigt. Di Uufständische hend sich uf de Ithome verschanzt und zee Joor lang Widerstand gege d Spartaner glaistet.

Ablauf[ändere | Quälltäxt bearbeite]

Uusglööst woren isch de Heloteuufstand dör s groossi Erdbebe vo Sparta ane 464 v. Chr. Da isch as e Fluech vom Gott Poseidon agluegt wore, well Helote, wo Schutz im Tempel vom Poseidon am Vorpirg Tainaron gsuecht ghaa hend, vo de Spartaner gwaltsam usem Hailigtum zerrt wore und denn töödt wore sind.[1]

Grad nochem Erdbebe sind d Helote i di zerstörti Stadt marschiert um a de verhasste Underdrucker de Rest z gee. Doch de König Archidamos, de Enkel vom Latychidas II. usem Geschlecht vo de Eurypontide hett schnell reagiert und d Helote sind oni Champfhandlige i eri Hüser zruggchert, wo si die biwaffnete Spartiate gsie hend. Z Messenie, dör de Taygetos vo Sparta trennt, isch es zom organisierte Uufstand choo. D Periökestedt Thouria und Aithaia hend sich mit de Helote zämetue und uf de Ithome verschanzt. Scho bald sind meriri tuusig Rebelle zämechoo und hend erfolgriich gege d Spartaner gchämpft.

Noch zwai Joor hend d Spartaner Athener bette, si z understütze, well die mee Erfaarig i Bilagerig ghaa hend. D Athener hend sich biroote. Im End hett sich de Kimon döregsetzt und de Uuftraag öberchoo, 4000 Hoplite zo de Spartaner z füere. D Athener sind aber vo de spartanischie Bundesgnosse mit Misstraue uufgnoo wore, und wege demm grad wider vo de Spartaner zruggschickt wore. De Kimon hett dör da sini Macht iibüezt und isch ane 461 v. Chr. us Athen verbannt wore. D Folg vo dere Episode isch de Peloponnesischi Chrieg gsii.

De Uufstand hett zee Joor lang duuret. Di bilagerte Messenier hend kapituliert und d Spartaner und d Spartaner hend erlobt, as si uuswandere chönd, wenn si d Peloponnes ganz verlönd. Da isch wegeme alte Orakelspruch passiert, wo gsait hett, as d Spartaner di Schutzsuechende vom Zeus Ithomatas frailoo sölid. D Messenier sind vo de Athener i de Stadt Naupaktos am Korinthische Golf aagsidlet wore, wo si chorz vorene eroberet ghaa hend. D Helote sind aber denoo vo de Spartaner systematischer underdruckt und kontrolliert wore.

Quelle[ändere | Quälltäxt bearbeite]

  • Thukydides: Peloponnesische Chrieg 1.101-103; 1.128.1

Anzelnoowiis[ändere | Quälltäxt bearbeite]

  1. Thukydides 1.128.1

Literatur[ändere | Quälltäxt bearbeite]

  • Manfred Clauss: Sparta. Eine Einführung in seine Geschichte und Zivilisation. Beck, München 1983, ISBN 3-406-09476-7. S. 43–45, 52–53, 71, 113–115.
  • J. T. Hooker: Sparta. Geschichte und Kultur. Reclam, Stuttgart 1982, ISBN 3-15-010314-2. S. 211–213, 230–232, 237, 274.
  • Karl-Wilhelm Welwei: Sparta: Aufstieg und Niedergang einer antiken Grossmacht. S. 176-180