Schlacht bi Salamis

Us der alemannische Wikipedia, der freie Dialäkt-Enzyklopedy
Schlacht vo Salamis
Deil vo: Perserchrieg

Datum 29. Septämber 480 v. d. Z.
Ort Im Saronische Golf vor em Piräus, em Haafen vo Athen; vor dr Insle Salamis
Usgang Griechische Siig
Folge In dr erste entschäidende Seeschlacht in dr Gschicht isch die persischi Flotte us de griechische Gwässer verdriibe und dr Aagriff vo dr persische Armee verzögeret worde. Eso isch dr Peloponnes sicher gsi, aber Middelgriecheland isch bis zur Schlacht vo Plataiai (Platää) in de Händ vo de Perser bliibe.
Konfliktparteie
Grieche Perser
Befählshaber
Themistokles, Eurybiades Xerxes I.
Truppesterki
366 griechischi Triere us Athen und Ägina 600 persischi Galeere
Verlust
40 griechischi Triere 200-300 persischi Schiff
Ziil: vo de Perser: Athens und ganz Griecheland z eroobere.

vo de Griechen: die persische Invasore z verdriibe und z vernichde

D Schlangesüüle, wo die siigriiche Grieche im Apollon gweit häi.

D Seeschlacht vo Salamis het am 29. Septämber (noch andere Kwelle am 23., 24. oder 25.; s exakte Datum isch umstritte)[1] 480 v. d. Z. zwüsche Grieche und Perser bi Salamis stattgfunde, ere Insle in dr Nööchi vo Athen. D Grieche häi die persischi Flotte entschäidend gschlaage und eso dr Rückzuug vo de Perser us Griecheland erzwunge.

Die Schlacht isch äini vo de bedütendste Seeschlachte im Middelmeerruum in dr Antike.

D Vorgschicht und d Schlacht[ändere | Quälltäxt bearbeite]

Im August vom Joor 480 v. d. Z. si d Perser in Griecheland iigfalle und häi d Spartiate und anderi Verbündeti in dr Schlacht bi de Thermopyle gschlaage, und gliichzitig het sich die attischi Flotte noch dr dreidäägige, unentschiidene Schlacht bi Artemision an dr Nordsite vo Euböa in Richdig Athen müesse zruggzie. Dr Xerxes het Athen, wo dr Themistokles het lo ewakuiere, und d Landschaft Attika drumume bsetzt und verwüestet.

Die mäiste Grieche häi sich denn welle uf d Verdäidigung vom Isthmus vo Korinth konzentriere, wo aber d Perser die griechischi Flotte iigschlosse häi, häi d Grieche iiri 380 Schiff für e Kampf barat gmacht und si usgfaare. In dr Schlacht häi si e groosse Däil vo de persische Schiff versänkt und e Hufe Perser, drunder dr Fäldher Ariabignes si ums Lääbe choo, wil si nit häi chönne schwümme. Vo de Grieche, wo iir Schiff verloore häi, si vil weniger verdrunke, wil si zur Insle Salamis gschwumme si.

Noch dr Schlacht[ändere | Quälltäxt bearbeite]

Dr persisch Köönig Xerxes het denn Angst überchoo, wil d Grieche d Brugg am Hellespont chönnte zerstööre, und het sich uf Chläiasie zruggzooge.

In dr Schlacht vo Plataea im Summer vo 479 isch d Armee vo de Perser vernichdend gschlaage worde, und am Kap Mykale häi d Grieche d Räst vo dr persische Flotte vernichdet. D Perser häi denn iiri Erooberigsglüst ändgültig begraabe.

Athen het dr Attisch Seebund gründet, si Flotte usbaut und isch zur griechische Hegemoniimacht worde.

Litratuur[ändere | Quälltäxt bearbeite]

Kwelle[ändere | Quälltäxt bearbeite]

Sekundärlitratuur[ändere | Quälltäxt bearbeite]

  • Albrecht Behmel: Themistokles: Sieger von Salamis. Herr von Magnesia. Stuttgart 2000.
  • Karl Julius Beloch: Die Schlacht bei Salamis. In: Klio 8 (1908), S. 477–486.
  • Charles Hignett: Xerxes’ Invasion of Greece. Oxford 1963.
  • John S. Morrison, John F. Coates: Die athenische Triere. Geschichte und Rekonstruktion eines Kriegsschiffs der griechischen Antike. Verlag von Zabern, Mainz am Rhein 1990, ISBN 3-8053-1125-7.
  • Barry Strauss: The Battle of Salamis. The naval encounter that saved Greece. Simon & Schuster, New York 2004, ISBN 0-7432-4451-6.
  • Adolf Wilhelm: Zur Topographie der Schlacht bei Salamis. Wien 1929.
  • Ulrich Graser: Griechen besiegen Perser bei Salamis. Theiss 2011, ISBN 978-3-8062-2402-3.
  • A. A. Evans, David Gibbson: Militärgeschichte vom Altertum bis heute. Bassermann, 2009, ISBN 978-3-8094-2549-6.

Fuessnoote[ändere | Quälltäxt bearbeite]

  1. K. Bremm: Im Schatten des Desasters: Zwölf Entscheidungsschlachten in der Geschichte Europas. Books on Demand, 2008, ISBN 978-3-8334-0458-0. Das Datum der Schlacht lag drei oder vier Tage vor der Sonnenfinsternis vom 2. Oktober.
Dä Artikel basiert uff ere fräie Übersetzig vum Artikel „Schlacht_von_Salamis“ vu de dütsche Wikipedia. E Liste vu de Autore un Versione isch do z finde.