Eleutherolakone
D Eleutherolakonen (altgriech. Ἐλευθερολάκωνες „Fraji Lakone“) sin e Bund vo merere eemoolige spartanische Periökestedt gsii, wo a de Chüste vom Lakonische Golf glege hend. Si sind uursprünglich Städt gsii, wo vo Sparta abhängig gsii sind. Noch de Niderlaag vom spartanische König Nabis ane 195 v. Chr. sind si vo Sparta loosglööst wore und vo de Römer under de Schutz vom Achäische Bund gstellt wore[1].
Im Joor 146 v. Chr. hend die Städt e Bund bildet, wo sich noch de Noiorganisation ane 21 v. Chr. dör de Chaiser Augustus denn „Bund vo de Eleutherolakone“ gnennt het. D Mitglider sind selbständigi Poleis gsii. Vo dene hend e paari i de Römisch Chaiserzitt aigni Münze usegee. De Bund vo de Eleutherolakone isch ane 297 vom Chaiser Diokletian uufglööst wore, won de s Römische Riich umglideret hett.
Nochem Pausanias[2] hend im Aafang vierezwanzg Städt dezueghört, zo sinnere Zitt sinds achtzee gsii, wo zo de Eleutherolakon ghört hend:
- uf de Halbinsle Mani: Aigiai, Gythion, Las, Teuthrone, Pyrrhichos, Kainepolis am Vorpirg Tainaron, Oitylos, Leuktra, Thalamai, Alagonia, Gerenia.
- uf de Halbinsle Parnon: Asopos, Akriai, Boiai, Zarax, Epidauros Limera, Brasiai, Geronthrai, Marios
Literatur[ändere | Quälltäxt bearbeite]
- Karl-Wilhelm Welwei: Eleutherolakones. In: Der Neue Pauly (DNP). Band 3, Metzler, Stuttgart 1997, ISBN 3-476-01473-8, Sp. 987.
Anmerkungen[ändere | Quälltäxt bearbeite]
- ↑ Titus Livius, Ab urbe condita 35, 13, 2 und 38, 31, 2; Strabon, Geographika 8, 366.
- ↑ Pausanias, Raise z Griecheland 3, 21, 6f.