Herodot

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Büschde vom Herodot

Dr Herodot vo Halikarnassos (agr. Ἡρόδοτος Ἁλικαρνᾱσσεύς, Hēródotos Halikarnāsseús) isch ä altgriechische Gschichtsschriiber, Geograf und Ethnolog gsi.

Biografie[ändere | Quälltäxt bearbeite]

Dr Herodot isch öbbe um 490 vor dr Ziitwändi z Halikarnassos in Karie, wo in Chliiasie gsi isch, uf d Wält cho. Er het deilgnoh am än Ufschdand gege dr Tyrann Lygdamis, wo nid glungen isch und isch druf nach Samos gflüchtet. Won er het döfe heimgoh, het er mitghulfe dr Lygdamis z schdürze. Er het Reise dur s südweschdlige Asie und Nordafrika gmacht, het um 447 z Athen gläbt, won er mit em Perikles und em Sophokles Fründ gsi isch und isch im Jhr 444 nach Thurii in Italie gange won er öbbe um 425 begrabe worden isch.

Si Ruef[ändere | Quälltäxt bearbeite]

In dr Antike scho het men em uf dr einte Siite dr Titel vom "Vatter vo dr Gschichtsschriibig" gä, und uf dr andere het menen bezichdiget Gschichte z verzelle und Liege z verbreite.

Hützudag git s Glehrti wo dänke, ass er mögligerwiis überhaupt keini Reise gmacht het und siine Büecher as Schdubeglehrte noch Bricht vo andere gschriibe het.[1]

Wärk[ändere | Quälltäxt bearbeite]

Alles was vo siine Büecher übrigbliiben isch, isch siis Wärk vo nün Bänd über d Gschicht, Kultur und Geografii vo dr bekannte antike Wält. Es beschriibt under anderem d Chrieg vo de Grieche gege d Perser im 6. und 5. Johrhundert und in dr Euterpe d Geografii und Kultur vom alte Ägypte.

Quelle[ändere | Quälltäxt bearbeite]

dtv-Lexikon, Deutscher Taschenbuch Verlag, München 1970 Band 8, S.277

Fuessnote[ändere | Quälltäxt bearbeite]

  1. Aram Topchyan, The Problem of the Greek Sources of Movses Xorenac'i's History of Armenia, Peeters Publishers 2006, S.9