Pfarrerin Lenau
| Seriedate | |
|---|---|
| Originaltitel: | Pfarrerin Lenau |
| Produktionsland: | Deitschland |
| Produktionsjohr: | 1990 |
| Produzänt: |
Siddeitscher Rundfunk |
| Längi von erä Folg: | öbbe 50 Minute |
| Zahl vo de Folge: | 13 |
| Musik: | Eugen Thomass |
| Idee: | Felix Huby Dieter de Lazzer |
| Genre: | Familiaserie |
| Erstusstrahlig: | ab 26. November 1990 auf ARD |
| Dialäkt: Schwäbisch |
Pfarrerin Lenau ischt a 13-doiliga deitscha Fernsehserie, wo vom dômôliga Siddeitscha Rundfunk (heit: Sidweschtrundfunk) produziirt ond vom 26. November 1990 ôô em wechentlicha Abstand em Erschda Programm (ARD) ausgschdrahlt wôrra ischt. Jeda Episod hôt a Schbiildauer vo 50 Menudda. Dr Theo Mezger hôt bei älle Folga Reschii gfihrt. S Drehbuach hôt dr schwäbische Autor Felix Huby vorfasst. Ondrschditzt wôrra ischt’r bei dera Arbet vo seim Landsmôô Dieter de Lazzer, wo au theologische Erfahronga eibrôcht hôt. Dui Serie schbiilt em Schwôbalendle; drom kô mr au emmer môl wiidr a baar Dialog em schwäbischa Dialekt heera.
D Hauptrolla schbiilet[ändere | Quälltäxt bearbeite]
- d Irene Clarin als Pfarrerin Katharina Lenau
- dr Rainer Grenkowitz als ihr Môô Marcus Lenau
- d Rosemarie Gerstenberg als Diakonisse i. R. Anna-Lotte Ulmer
- dr Horst Sachtleben als Arthur Köstlin, dr Katharina ihr Vadder
- dr Walter Schultheiß als Karl Engstinger, Leiter vom Posaunachor
- d Ilse Künkele als Pfarrsekredäre Klara Treutle
- dr Reinhold Ohngemach als Mesner Walter Brodbeck
- dr Hubertus Gertzen als Ernst Bickel
- dr Oscar Müller als Dekan
- dr Rüdiger Wandel als Pfarrer Peter Kuron
- d Sabine Bräuning als Krankaschweschder Anneliese Niedlich
- d Cornelia Köndgen
- dr Dieter Kirchlechner
- dr Frank Strecker
Om was gôht’s en dera Serie?[ändere | Quälltäxt bearbeite]
Dui 33-jähriga Pfarrere Katharina Lenau tridd ihrn Denscht bei dr evangelischa Melanchthon-Kirchagmoind en Stuegert ôô. Ama Haufa vo ihre Gemeindegliider passt’s ibrhaupt et, dass-se uff oimôl a Frau kriaga sollet, wo des Amt doch viil besser vo-ma Môô ausgfillt werra kenna dät. Bisher ischt’s au so gwäa, dass em Pfarrer sei Frau viil en dr Gmoid mitgschafft hôt, abr dera nuia Pfarrere ihr Môô ischt voll beruafstätig als Archidekt ond hôt zom Mithelfa kaum Zeit. S dauret also a Weile, bis d Leit merket, dass au a Frau a guada Seelsorgere sei kôô. Ondrschditzong erfehrt d Pfarrere Lenau hauptsächlich durch ihr Sekredäre Klara Treutle, da Buechbender Karl Engstinger, wo au dr Leiter vom Posaunachor ischt, dui em Ruhestand befendlicha Diakonisse Anna-Lotte Ulmer ond durch d Krankaschweschder Anneliese Niedlich.
Titl vo de oinzelne Folga[ändere | Quälltäxt bearbeite]
- In Amt und Würden
- Der Trompeter von Jericho
- Jeden Tag eine gute Tat
- Was Gott zusammenfügt
- Ihr Land ist voll Geld und Gold
- Konfirmanden
- Der Mensch hüte sich vor der Gewalt
- Dass eure Arbeit nicht vergeblich sei
- Wo die Liebe hinfällt
- Wohlauf in Gottes schöne Welt
- Der Spieler
- Dein ist mein ganzes Herz
- Dort, wo man singt ...
DVD ond s Buach zom Film[ändere | Quälltäxt bearbeite]
Seit Sebdember 2011 kôô-mr dui Serie au uff DVD beim SWR-Shop kaufa.[1]
Dr Felix Huby hôt dui Serie au zo-ma Roman vorarbeidet: «Pfarrerin Lenau», Quell Verlag, Stuttgart, 1990, ISBN 3-7918-2379-5
Uffnahma[ändere | Quälltäxt bearbeite]
D Ussa-Uffnahma send z Stuegert, en Ludwigsburg ond z Diibenga dreht wôrra, ond d Enna-Uffnahma en de Studios vom Siddeitscha Rundfunk en Stuegert.
Vorgengerserie[ändere | Quälltäxt bearbeite]
Dr Vorgenger vo dr Serie Pfarrerin Lenau isch dui Serie Oh Gott, Herr Pfarrer mit-em Robert Atzorn en dr Titelroll gwäa. Dui Roihe hôt an riisiga Erfolg ghet. Drom hett dr Siddeitsche Rundfunk au gern a zwoida Staffel mit de gleiche Schauschbiiler produziirt. A baar vo deane, zom Beischbiil d Hauptdarsteller Robert Atzorn ond d Maren Kroymann, hend dô drzua abr koi Luscht meh ghet. Drom hend dia zwoi Autora statt-ra Fortsetzong oifach nuie Persona fir a nuia Serie entwicklet. Abr d Pfarrerin Lenau hôt da Erfolg vo dr Vorgengerserie bei weidem et erreicht.
Weblink[ändere | Quälltäxt bearbeite]
- Pfarrerin Lenau in dr Internet Movie Database
- A Beschreibong vo dera Serie bei Fernsehserien.de
- A ausfihrlicha Kridik vom Fred Maurer bei Zelluloid.de (Site cha nüme abgrüeft wärde; Suche im Webarchiv)