Oscar Müller

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Dialäkt: Schwäbisch

Dr Oscar Müller (gebora am 20. Januar 1921 z Stuegert, wo-nr am 2. Auguscht 2003 au gschdorba ischt) isch a schwäbischer Humorischt, Volksschauschbiiler, Heerschbiilschbrecher, Radiomoderator ond Sänger gwäa.

Aus seim Leaba[ändere | Quälltäxt bearbeite]

Dr Oscar Müller ischt am 20. Januar 1921 z Stuegert uf d Welt komma. Vo dr Abstammong her isch’r bloß an halbr Schwôb gwäa, weil sei Muadr em sidbadischa Steißlenga en dr Nähe vom Bodasee ihr Hoimet gheet hot ond vo-ma waschechda Stuegerter zom Weib gnomma worra ischt. Nôch dr Schualzeit hätt dr Oscar Müller am liabschda glei ebbes Kinschlerischs glernt, aber mit sellem Wonsch hot’r bei seine Eltra uf Granit bissa. Nôch deane ihrem Plôô hot’r zerscht „ebbes Reachts“ lerna miaßa. Drom hôt'r zerscht amôl ganz brav a Banklehre gmacht. Wia en Eiropa dr Zwoid Weltkriag tobt hot, isch’r em Johr 1940 zor Wehrmacht eizoga ond an d Front gschickt worra. Nôch-em Kriag schliaßlich hot’r sein heimlicha Wonsch vorwirklicht ond Schauschbiilonderricht gnomma. Oiner vo seine Ferderer ischt dr 15 Johr eltre Max Strecker gwäa, wo-nem a Engagement beim Stuegerter Luschtschbiil- ond Operedda-Theatr vrmittlet hot. D Freid dô driibr ischt abr bloß kurz gwäa, weil d Währongsreform vom 20. Juni 1948 sellem Theatr da Todesstoß vrsetzt hot. Jetzt isch-em nix Anders ibrich bliiba, wia als freischaffender Schauschbiiler sei Brot zo vrdäana ond d Rolla bei älle megliche Theater ôôznemmet.

A Glicksfall fir da Oscar Müller ischt gwäa, wia-nr da Albert Hofele vom dômôliga Siddeitscha Rondfonk (SDR) kennaglernt hot. Dr sell hot-em 1948 a Peschtle beim Radio vrschafft, wo-nr als Schbrecher ond Moderator eigsetzt worra ischt. Drneaba isch’r abr emmr môl wiidr au uf vrschiidene Bihna gschdanda, ond wia en Deitschland s Fernseha eigfihrt worra ischt, hot’r au deet Rolla ôôgnomma. Seine Partner send dô drbei ondr andrem dia schwäbische Publikomsliableng Willy Seiler, Walter Schultheiß, Willy Reichert ond Oscar Heiler gwäa. Mit de ledschde zwoi hot dr Oscar Müller en-a baar Sketsch ibr des schwäbische Duo Häberle ond Pfleiderer mitgwirkt.

Ab 1972 hot’r 20 Johr lang beim SDR dui wechentlicha Radiosendong Fröhlicher Feierabend moderiirt, wo bald druf a richdigs Margezoiche vo-nem worra ischt. Ondrem Titl Meine Tante Mechthild – Die nettesten Geschichten aus dem „Fröhlichen Feierabend“ hot’r 1984 a Buach rausbrôcht.

Am 2. Auguscht 2003 hot dr Oscar Müller en seira Hoimatstadt d Auga fir emmr gschlossa. 82 Johr alt isch’r worra.

A Auswahl vo de Fernsehfilm ond –seria, wo-nr mitgschbiilt hot[ändere | Quälltäxt bearbeite]

  • 1963: Schwäbische Geschichten, a Fernsehserie om-an schwäbischa Birgermoischtr mit-em Willy Reichert en dr Hauptroll. Dr Oscar Müller hot dô dren da Wurschtfabrikanda Bullinger gschbiilt.
  • 1967: Die Fernfahrer, en dera Serie hot’r en dr Folge Der neue Wagen a Roll ghet.
  • 1969: Nachrichten aus der Provinz, en dera TV-Serie hot’r en dr Folge Das neue Haus mitgschbiilt.
  • 1971: Eine unwürdige Existenz
  • 1972: Tatort: Kennwort Fähre
  • 1975: Tatort: Schöne Belinda
  • 1976: Tatort: Augenzeuge
  • 1977: Tatort: Himmelblau mit Silberstreifen
  • 1977: Meine Mieter sind die besten
  • 1983: Köberle kommt
  • 1984: Tatort: Verdeckte Ermittlung
  • 1988: Oh Gott, Herr Pfarrer
  • 1990: Pfarrerin Lenau
  • 1995: Drei Tage im April
  • 1995: Tatort: Bienzle und der Mord im Park

A Auswahl vo de Liadr, wo-nr gsonga hot[ändere | Quälltäxt bearbeite]

  • Dia steile Stuagerter Stäffela, des Liadle us-em Johr 1954 mit-em Tekscht vom Friedrich E. Vogt ond dr Melodii vom Hermann Schwander ischt a Zeitlang so ebbes wia d inoffiziell Stuegerter Nazionalhymne gwäa.
  • A Viertele zom Frühstück
  • Opa, was moinsch du?
  • I wünsch mir vom Christkind ...

Weblink[ändere | Quälltäxt bearbeite]