Dr Basler Letzidurm

Dialäkt: Baseldütsch

Dr «üsser» Letzidurm z Basel (im Hindergrund); vorne dr ursprünglig Letzidurm, wo wider ufbaut worden isch

Letzidurm isch dr Name vo zwei Dürm, wo nooch binenander stöhn am Ändi vo dr früehnere Stadtmuure, wo deilwiis rekonstruiert worden isch, im Basler Dalbe-Quardier.

Gschicht

Dr üsser Letzidurm isch 1676 im Dalbe-Quardier im barocke Stil baut worde näben em eigetlige Letzidurm, wo us dr Zit vo dr Gotik im 14. Johrhundert stammt. Wo dr elteri Durm, wo Zinne gha het, 1863 abgrisse worden isch, het män em barocke Durm Letzidurm afo säge und er het dä Name au bhalte, wo dr alti Letzidurm 1978/79 wider rekonstruiert worden isch.

1911 isch dr Dalbe-Rhiiwäg ufgschüttet worde, und dr underi Deil vom Durm isch im Bode verschwunde; dorum gseht er hüte vil chliiner us as früehner emol. Mit em Rhiiwäg isch 1911 au d Terrasse entstande, wo bim Letzidurm in Rhii uusestoht. Bis 1930 het mä sä bruucht zum die letzte milidärische Wehrbaute an däm historischen Ort z errichde.

Name

Letzi isch e gschichtligs Wort für d Gränzschutzwehr, also für Stadtmuure. Ursprünglig het mä mit Letzi en altschwiizerischi milidärischi Sperri in Däler bezeichnet ( letze in dr Bedütig vo ufhalte).

Beschriibig

Dr barocki Letzidurm isch früehner diräkt am Rhiiufer gstande. Im undere Stock, wo mä vo dr Muure uus iine choo isch, befinde sich in de Grundmuure, wo öbbe e Meter dick si, drei Schlüsselscharte, vo wo us mä über e Fluss wie au stromufwärts und stromabwärts uf e Find het chönne schiesse. Im obere Stock isch e Zimmer mit eifache Schlüsselscharte und drei chliine Fänster. Dr Durm isch mit eme Huubedach deckt, wo uf alle vier Site gloggeförmig gschwungen isch. Vier Holzsüüle, wo im Innere uf dr Höchi vom Dachsims aaföön, stöhn über d Dachspitze uuse und bilden e chliis Gloggedürmli, wo au mit eme Huubedach deckt isch.

Weblingg

• Der Letziturm auf altbasel.ch

Dä Artikel basiert uff ere fräie Übersetzig vu dere Version vum Artikel „Letziturm_(Basel)“ vu de dütsche Wikipedia. E Liste vu de Autore un Versione isch do z finde.

47.5551027.604029