Felix Hoffmann-Wääg

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

De Felix Hoffmann-Wääg isch en Kulturwääg im Kanton Aargau. Er verbindet sächs vo de elf aargauische reformierte Chile, wo Glasfaischter vom Aarauer Künschtler Felix Hoffmann us de Mitti vom zwänzigschte Joorhundert dinn z gseh sind.

Es isch di Reformierte Landeschile Aargau gsi, wo de Wääg het lo iirichte.

d Route[ändere | Quälltäxt bearbeite]

De Wäg isch so gmacht, ass men im Chreis zu däne Chile cha goo. Der Afang isch bi de Stadtchilen Aarau und me chunt bi de reformierte Chile vo Soor, Buchs, Robischwil und Gaueschtei verbii zu de Chile uf em Kirchbärg. Vo deete cha me wider z Fuess (oder au mit em Poschtauto) zruck uf Aarau. Di ganz Rundwanderig dur die schööni Aargauer Landschaft und es Stück em Jura noo isch öppe 28 Kilometer lang, di einzelne Abschnitt hei die Dischtanze:

  • vo Aarau uf Soor: 4,5 Kilometer
  • vo Soor uf Buchs: 3,3 Kilometer
  • vo Buchs uf Robischwil: 5,9 Kilometer
  • vo Robischwil uf Gaueschtei: 3,2 Kilometer
  • vo Gaueschtei uf e Kirchbärg bi Chüddige: 7 Kilometer
  • vo de Chile Kirchbärg uf Aarau zrugg: 3,8 Kilometer

d Faischter i de Stadtchile z Aarau[ändere | Quälltäxt bearbeite]

In de Stadtchile vo Aarau sind sächs Faischter im Chor vom Felix Hoffmann. An de öschtliche Chorwand hets drü Faischter us de Johr 1939 und 1943 zu Gschichte vom Noie Teschtament, dadervo zwei Chrischtusfaischter und es Gliichnisfaischter. An de Südsite hets im Chorruum drü Faischter us de Johr 1949 und 1953 zu Sachen us em Alte Teschtament, nämlich es Schöpfigs-, es Chönigs- und es Prophetefaischter. In dene sechs Faischter hets meh wi sächzg einzelni Szene mit Darstellige vom Chaos vor de Schöpfig bis zu de Uferstehig vo Chrischtus.

z Soor[ändere | Quälltäxt bearbeite]

In de Reformierte Chile Soor sind drüü grossi Faischter vom Felix Hoffmann. Uf de linke Siite gseht me s Passionsfaischter mit Szeene vom Abemahl, im Garte Gethsemane, de Chrüzigung und wie me de Lichnam vo Jesus vom Chrüz abgnoo het. Im Faischter im Chorscheitel gseht me s öschterliche leere Grab, d Uferstehig, de Uferstandeni mit em Thomas und de Jesus mit de Jünger uf em Wäg uf Emmaus. Im rächte Faischter werde Szeene us de Aposchtelgschicht zeigt und zwar d Steinigung vom Stephanus, de Paulus vor Damaskus, d Taufi vom Kämmerer us Athiopie und de Paulus in Seenot.

z Buchs[ändere | Quälltäxt bearbeite]

In de öschtliche Chorwand vo de Reformierte Chile Buchs hets es grosses Glasfaischter us em Joor 1970 vom Künschtler, wo s Gliichnis vom Grosse Gaschtmohl zeigt.

z Robischwil[ändere | Quälltäxt bearbeite]

Z Robischwil hets i de Reformierte Chile drüü Chorfaischter vom Hoffmann us em Joor 1938, wo d Verlügnig vo Jesus durch de Petrus, d Chrüzigung und wie d «Sünderin» em Jesus sini Füess tuet wäsche zeiget. Im Joor 1970 het de Felix Hoffmann noch zwei witeri Faischter gmacht, d Taufi vom Kämmerer und d Jünger uf em Wäg nach Emmaus. Die beide Faischter sind in de Nordwand vo de Chile z gseh.

z Gaueschtei[ändere | Quälltäxt bearbeite]

I de Reformierte Chile Gaueschtei isch s Gliichnis vo de gschiiden und de dumme Jungfraue in eme chline Faischter us em Johr 1953 z gseh.

uf em Kirchbärg[ändere | Quälltäxt bearbeite]

Im Johr 1949 het de Felix Hoffmann siibe Faischter für di alti Chile uf em Kirchbärg bi Chüddige gmoolet, vo dene sind drüü im Chorruum und vier im Chileschiff. Im Schiff isch d Vision vom Jesaja, d Taufi vo Jesus durch de Johannes, s Mahl z Emmaus und d Hochziit zu Kana. In de Chorfaischter isch di heilig Familie mit em Ängel, d Chrüzigung und d Uferschtehig.

Weblink[ändere | Quälltäxt bearbeite]