Reformierti Chile Soor

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Kirche Suhr

Di reformierti Chile Soor isch s reformiert Chilegebäud in de aargauische Gmeind Soor. Si ligt uf eme Hügelschporn oberhalb vom Dorf.

Gschicht[ändere | Quälltäxt bearbeite]

An de Schtell, wo di hütig Chile stoht, hets scho zu de Ziit vo de Karolinger en erschti Chile gäh. Dadermit isch Soor eini vo de erschte Pfarreie im Aargau gsi. Am Ändi vom 15. Johrhundert het me derte e noii Chile bout, wo im Johr 1495 iigweiht worde-n-isch. Wo im 1528 in Schtadt und Republik Bärn d Reformation iigfüert worde-n-isch, isch au d Chile vo Soor e reformierti worde. Im 1542 het me an de Nordsite vo de Chile de Kirchturm bout. Ein Ruum im Turm isch es Zitli e Gfängniszelle gsi. D Chile het me über di Johrhundert mehreri Mol umbout, so zum Bischpil nach eme Brand im 1844, wo d Holzdecki und d Chilefaischter zerschtört worde sind. Bi de Renovation in de 1950er-Johr het me versuecht, de Stilelement vo de ursprüngliche Chile wider meh Ruum z gäh. Sit em 12. April 2014 isch d Chile e Wägschtation uf em Felix Hoffmann-Wäg.

Chilebau[ändere | Quälltäxt bearbeite]

D Chile isch im spätgotische Stil bout. Bi de Renovation am Ändi vo de 1950er-Johr sind drü grossi Chilefaischter vom Felix Hoffmann igsetzt worde. Uf de linke Siite gseht me im Passionsfaischter Szene vom Abemahl, im Garte Gethsemane, de Chrüzigung und de Abnahm vom Lichnam vo Jesus vom Chrüz. Im Faischter im Chorscheitel gseht me s öschterlichi leeri Grab, d Uferstehig, de Uferstandeni mit em Thomas und Jesus mit de Jünger uf em Wäg uf Emmaus. Im rächte Faischter werde Szene us de Apostelgschicht dargstellt und zwar d Steinigung vom Stephanus, de Paulus vor Damaskus, d Taufi vom Kämmerer us Athiopie und de Paulus in Seenot.

Usstattig[ändere | Quälltäxt bearbeite]

Im Chileturm sind füf Glocke, wo uf c, e, g, a und c gstimmt sind. Im 2003 isch e noii Orgle vo de Firma A. Hauser vo Chlidöttige ibaut worde.

Weblink[ändere | Quälltäxt bearbeite]

 Commons: Reformierti Chile Soor – Sammlig vo Multimediadateie

Koordinate: 47° 22′ 23,4″ N, 8° 4′ 32,9″ O; CH1903: 648124 / 247120