Eric Flückiger

Dr Eric Flückiger, wo öppen anne 1957 uf d Wält cho isch, isch e Schwiizer Romanischt un Dialäktoloog.

Er het romanischi Filology, Latinistik und Gschicht studiert und sys Studium 1997 a dr Uni Gämf mit em Lizänziat abgschlosse.

Er het sich als Lexikograaf für romanischi Sprooche spezialisiert und isch sit 1997 Redakter bim Glossaire des patois de la Suisse romande, wo die frankoprovänzalischen und andere Dialäkt vo dr Wälschschwiiz dokumäntiert und e Täil vom «Zäntrum für Dialäktology und s Regionalfranzösisch» vo dr Uni Nöieburg isch. I dere Zyt het er mit em Redakzioonsteam under em Scheffredaktoor Hervé Chevalley und de Diräktoore vom Projäkt Anton Näf (Uniprofässer z Nöieburg und interimistische Diräkter), Federica Diémoz (interimistischi Diräktoorin) und Yan Greub (sit 2018) gschaffet. Anne 2015 isch er drby gsi, wo d Redakzioon dr sibet Band vo däm gorsse Wärch zu den Artikel mit em Afangsbuechschtaben «F» het chönne usegää. Das isch meh weder hundert Joor sit denn, wo dr Louis Gauchat mit em Projäkt agfange het.

Wo dr Maurice Casanova (1925–1995), wo bis 1990 sälber au e Glossaire-Redakter gsi isch, s ryche Patois-Wörterbuech vom Bangistaal vorbereitet gha het, isch dr Flückiger zäme mit de Redakzioonskollege Raphaël Maître un Gisèle Pannatier und mit dr Hilf vo dr Société des patoisants de Bagnes dra ggange, das Wäärch über die Waaliser Mundartregioon fertig z mache. Das Wälschwalliser Mundartbuech – Dictionnaire du patois de Bagnes. Lexique d'un parler francoprovençal alpin – isch als Ergäbnis vom ene zwänzgjöörige Projäkt vom Nöieburger «Zäntrum für Dialäktology und s Regionalfranzösisch» im Joor 2019 usechoo.

Dr Flückiger isch als Verträtter vom Glossaire bi dr wälsche Sproohgselschaft Fédération romande et interrégionale des patoisants drby.

Wärch

• mit em, Fabien Python, dr Elisabeth Berchtold, dr Laure Grüner, em Camille Legrand un dr Laurence Nicaise: Glossaire des patois de la Suisse Romande. Guide et complément. Genève 2018.
• Les patoisants et le GPSR. In: L’Ami du Patois. Trimestriel romand, 33, 2006, S. 51–55.
• zäme mit em Maurice Casanova, em Raphaël Maître un dr Gisèle Pannatier: Dictionnaire du patois de Bagnes. Lexique d'un parler francoprovençal alpin Bagnes 2019. ISBN 978-2-839926713.

Weblink

• dr Eric Flückiger uf dr Websyte vom Inschtitut für Sproochwüsseschaft und Komunikazioon vo dr Uni Nöieburg