Patois

Us der alemannische Wikipedia, der freie Dialäkt-Enzyklopedy
Hops zue: Navigation, Suech

Mit em Begriff Patois meint mer im Französische pejorativ e Sproochform, wo nit standardisiert, regional begränzt un als sozial minderwertig aagsänne wird. Des chönne d Dialäkt vo der Langues d'oïl oder aber Sprooche wie s Bretonische oder Elsässisch sy. De Begriff isch z Frankriich arg negativ bsetzt un betont, dass d Sproochform uugschrybe, ruggständig, büürlich, beschränkt bis minderwertig syg.

Im Englische wird de Begriff relativ wertfrei für en Dialäkt verwändet. In dr Schwiiz wärde mit Patois – in aller Regel au wertfrei – die lokale urtümlige französische Dialäkt in dr Romandie (v.a. Waadtland) bezeichnet.

Für vili Sprecher vo denne Sprooche isch es usserdäm au d Selbschbezeichnig vo ihrem Dialäkt. In der Normandie sait mer emene Sprecher vum Normännische zum Byspil patoissant.

In dr Karibik were verschidni Kreolsprooche als Patois bezeichnet, z. B. s Jamaikanisch, wo d Eigebezeichnig patwa isch.