Butilin

De Butilin (altgriech. Βουτιλῖνος, Boutilínos; Βουσελίνος, Bouselínos; lat. Buccellenus; alem. *Butilîn; † 554) isch en alemannische Herzog i de Diözese Avenches gsi und de Nofolger vom Lantachar. Sin Brüeder isch de Leuthari gsi.

Anne 539 isch de Merowingerkönig Theudebert I. mit eme burgundisch-fränkische Heer in Italie igfale und het, nochdem er dringet hai het müese, di fränkische Herzög Butilin, Mumolen und Aming zrugglo.

Wo d Gote im Chrieg gege de Narses, wo im Uuftrag vo Byzanz Italie zruggeroberet het, i starchi Bedrängnis cho sind, isch ane 553 uf Bitte vo de Gote e fränkisch-alemannischi Hilfsarmee under de Füerig vom Butilin und sim Brüeder Leuthari uf Italie marschiert, gege de Wile vom Merowingerkönig Theudebald. Da Heer mit ageblich 75'000 Chrieger isch dur ganz Italie zoge bis uf Apulie und Kalabrie.

Denn het sich da Heer tailt und de Leuthari het sich uf de Haiweg gmacht, doch isch de Tail an ere Süüch zum Opfer gfale. De Butilin isch z Süditalie blibe und het d Gote, won em ageblich d Krone versproche hend, im Chrieg understützt. Er isch den im Herbst 554 bi Capua am Fluss Casilinus mit sim ganze Heer in ere Schlacht gege de Narses umchoo.

Quelle

• Agathias (530/32–582) – Historiae
• Marius von Avenches (530–594)

Literatur

• Dieter Geuenich: Geschichte der Alemannen; Stuttgart 2004. ISBN 3170182277 / ISBN 3170120956

Weblink

• Mittelalter Genealogie: Herzog Butilin uf mittelalter-genealogie.de (Archiv-Version)